Read Kuranko Lankɛnimayɛ 14 Bible Online

Lankɛnimayɛ 14 - Kuranko bible

Lankɛnimayɛ 14

¹ Wo kɔma, n ya n yɛ lata tun. N ya saga-dan wo sɔnɛ yen Yerusalɛm kɔnkɛ kuma. N ya mɔgɔ waga kɛmɛ, waga bi-nani, ani waga nani (144,000) yen sɔni a fɛ. Saga-dan wo tɔgɛ anubɛ a Fa tɔgɛ sɛbɛnɛ wonu telɛ ma.

²Wo kɔma, n ya kuman-kan lamɔɛn bɔla Arinyɛni tɔ. Wo manɛ iko wasa-sɛnbɛlamɛ-kan. A manɛ fanan iko san-sɛrɛn-kan. N ya kuman-kan min namɔɛn, wo manɛ fanan iko sɔrɔn-fɔlɛnuna sɔrɔn-kan.

³Nyama-siyaman-wɛ wonu sɔra mansaya-sigi-fan anubɛ dali-fen nani anubɛ kɛmɔgɛnu yakɔrɔ. Anu ya bɛti-kurɛ do bɔ, mɔgɔ-wo-mɔgɔ ti ke min bɔla fɔ mɔgɔ waga kɛmɛ, waga bi-nani ani waga nanɛ wonu (144,000), ado wonu denu dɔrɔn kunkara ka bɔ dugu-kole kuma.

⁴Mɔgɛ wonu ma anu nyɛrɛ latinya musinu fɛ. Kei-lasolonnɛ le anu dama la. Saga-dan tara kan-bo-kan, anu si bila a fɛ nyɔ. Anu kunkara mɔgɔ-toenu tɛma, ado anu denu fɔlɔn mara Alla anubɛ saga-dantɛ la.

⁵ Anu ma foninyɛ fɔ mumɛ! Fɛɛ-wo-fɛɛ sa anu na.

⁶Wo kɔma, n ya melika-gbɛrɛ yen firifirila san ma pon! Habadan-kibara-nyimɛ ye a bolo a ye nala min fɔla duninya-mɔgɛ bɛɛ ye, a sibole bɛɛ anubɛ a bɔnsɔn bɛɛ anubɛ a mɔgɔ-su bɛɛ iko anuna kan faranɛ nya min.

⁷A ya a fɔ a kulu-mayɛlɛnɛ la ko, “Wo ni kilan Alla la ka a tanto ata gbiliyɛla ko la dɛɛ, ado mɔgɛnu-kiti-wati ara ke a bolo. Nba, wo ni wo nyɛnkin Alla kɔrɔ ka a bato. Wo ni ale Alla tanto, min ya san-kole anubɛ dugu-kole anubɛ kɔgɔ-yi anubɛ tenke bɛɛ dan!”

⁸ Melika fila nyɔgɛ bilara a fɔlɔtɛ fɛ. A ye a fɔla ko, “A ara bui. Babilɔn-so-belebele ara bui fogbo! Ala yɛlɛnya-nata min si mɔgɔ bira iko baan, a ara wo di mɔgɛ bɛɛ ma alako anu ni anu min wo la.”

⁹Melika sawa nyɔgɛ bilara filɛ wonu fɛ. A ye a fɔla a kulu-mayɛlɛnɛ la ko, “Ni mɔgɔ-wo-mɔgɔ ya sogo-feremɛ wo kɔ anubɛ ala muninyɛ ka sɔn a mandan ni sa a telɛ ma, ni wo ma, a bole,

¹⁰ Allata diminyɛ si wo bira iko baan. Ala diminyɛ min manɛ iko baan-sɛnbɛmɛ, a ara wo wuya ala diminya-yi-lafɛ rɔ. Min bɛɛ ye wo minna, wonu si nyankankantan sɔrɔn tɛ anubɛ munku-gbɛ bolo melika-sɛnimɛnu anubɛ saga-dan-yakɔrɔ.

¹¹ Tɛ min si anu tɔrɔ, wo sisi ye yɛlɛla san ma habadan! Minnu ya sogo-feremɛ wo kɔ anubɛ ala muninyɛ anubɛ minnu sɔnta a tɔgɔ-yatɛ-mandan ni sa a telɛ ma, ni wo ma, a bole, sulen mumɛ sa wonu ye su-ni-tele.”

¹²Allala mɔgɛnu ni anu munyu, ado anu ni to Allala tɔnnu birala ka lanayɛ kɛ Yisa ye.

¹³Wo kɔma, n ya kuman-kan lamɔɛn bɔla Arinyɛni tɔ. A ko, “Kɛ sɛbɛ. Ka a dabira kaka ma, minnu bi fagala Marita wɔlɛ rɔ, mɔgɔ-sewanɛ le wonu na!” Allala Ni-Sɛnimɛ ya a labira, a ko, “Ɔnde. Anu si anu sulen anuna wɔlɛ ma sewɛ rɔ bawo anu bi barayi sɔrɔnna ka a tɛgɛ anuna wɔli-kɛ-nya ma.”

¹⁴ Wo kɔma, n ya banda-fin-gbɛ yen. Min siginɛ banda-finyɛ wo kuma, wo manɛ iko mɔgɛ. Sɛnɛ-mansaya-fulɛ ye a kunyɛ la. Wɔrɔtɔ-da-diyamɛ ye a bole la.

¹⁵ Nba, melika-gbɛrɛ bɔra Alla-Bato-Bɔn la ka a kan labɔ doi wo ma min siginɛ banda-finyɛ kuma. A ko, “Ila wɔrɔtɛ bi ka fui-fan tɛgɛ bawo a wati-bɛrɛ le kɛ la. Fui-fan ara mɔ. A tɛgɛ-tumɛ ara ke duninya rɔ gbɛ!”

¹⁶Wo kɔma, ale min siginɛ banda-finyɛ wo kuma, ale ya ala wɔrɔtɛ ladon fui-fan wo kɔrɔ dugu-kole ma. Fui-fan bɛɛ tɛgɛra duninya rɔ tɛrr!

¹⁷Wo kɔma, n ya melika-gbɛrɛ yen bɔla Alla-Bato-Bɔn la Arinyɛni tɔ. Wɔrɔtɔ-da-diyamɛ ye wo fanan bolo.

¹⁸Wo kɔma, tɛ min bi saraka-bɔ-tinɛ kuma, melika doi min bi kun-tigiyɛ kɛla wo kun na, wo nara ka bɔ nyɔ-wara la. A kumara wɔrɔtɔ-da-diyama-tigi wo ye a kulu-mayɛlɛnɛ la. A ko, “Ila wɔrɔtɛ bi ka dugu-kole nɔnbɔ-gbɔɛ bɛɛ tɛgɛ bawo anu bara mɔ!”

¹⁹Woletɔ melika wo ya ala wɔrɔtɛ ladon nɔnbɔ-gbɔɛ wonu kɔrɔ. A ban anu tɛgɛla, a ya anu nafili dugu-kole ma anu burun tinɛ, Allala diminyɛ si anu sugun kan min.

²⁰ Anu ya nɔnbɔ-gbɔɛ radɔn soe kɔma. Yele bɔra nɔnbɔ-gbɔɛ radɔn tinɛ wo rɔ. A fara ka yɛlɛ iko bɛ. Ala yanyɛ si mɛli kɛmɛ fila bɔ. A rayanyɛ si nunkan-nya nani bɔ.