Read Kuranko Lankɛnimayɛ 16 Bible Online

Lankɛnimayɛ 16 - Kuranko bible

Lankɛnimayɛ 16

¹Wo kɔma, n ya kuman-kan-ba lamɔɛn bɔla Alla-Bato-Bɔn la. A ye a fɔla melika wɔrɔnfilɛ wonu ye ko, “Pani-kunba wɔrɔnfilɛ minnu nafanɛ Allata diminyɛ la, wo ta wonu tawiya dugu-kole kuma pu!”

² Melika fɔlɔtɛ tara ata pani-kunbɛ rawuya dugu-kole kuma. Sogo-feremɛla mandan ye minnu ma anubɛ minnu ya ala muninyɛ bato, tɛlɛ-yogomɛnu bɔra wonu ma minnu dumara kati!

³Wo kɔma, melika fila nyɔgɛ ya ata pani-kunbɛ rawuya kɔgɔ-yi rɔ. Yi wo mara iko mɔgɔ-faganɛ-yele. Dali-fan bɛɛ fagara kɔgɔ-yi rɔ.

⁴ Wo kɔma, melika sawa nyɔgɛ ya ata pani-kunbɛ rawuya bɛnu anubɛ tenkenu tɔ. Wo dama yɛlɛmanta yele la.

⁵Melika min bi kun-tigiyɛ kɛla yinu kun na, n ya wo kuman-kan lamɔɛn. A ko, “E, ile min bi kaka, ile min bi nyɔ kebi fɔlɔ, i sɛnima. I wara kiti minnu tɛgɛ, anu telenta!

⁶Anu bara ila mɔgɛnu anubɛ nɛbinu yele labɔ. Woletɔ i wara yele di anu ma ka a min. A bɛnta anu ni min sɔrɔn, anu bara ban wo sɔrɔnna feu!”

⁷Wo kɔma, n ya kuman-kan lamɔɛn bɔla saraka-bɔ-tinɛ wara la. A ko, “Mari Alla, Sɛnbɛ Bɛɛ Tigi, i ye kiti tɛgɛla telenbagayɛ anubɛ tonyɛ le la, yɔ!”

⁸Wo kɔma, melika nani nyɔgɛ ya ata pani-kunbɛ rawuya tele kuma. Alla sɔnta ko a ni mɔgɛnu mintan a wuyan-kalamɛ la.

⁹Tele-wuyan wo ya mɔgɛnu mintan. Sarati ye Alla min bolo fitinɛ kɛnu kuma, mɔgɛ kɛnu ya ale Alla tɔgɛ rasɛ. Kɔnɔ anu ma anu kɛ-nyanu yɛlɛma ka Alla tanto ala gbiliyɛla ko la.

¹⁰ Wo kɔma, melika loli nyɔgɛ ya ata pani-kunbɛ rawuya sogo-feremɛ wota mansaya-sigi-fan kuma. Pinpi burunta sogo-feremɛ wota nyamanɛ bɛɛ kuma bɛff! Mɔgɛnu ya anu nagannu kin dumɛ wo bolo.

¹¹Anu ya Alla danka Arinyɛni tɔ anuna dumɛ anubɛ anuna tɛlɛ wonuna ko la. Kɔnɔ hali wo, anu ma fara anu kɛ-nya-yogomɛnu na.

¹² Wo kɔma, melika wɔrɔ nyɔgɛ ya ata pani-kunbɛ rawuya Yufɛrɛti-ba-wɛ rɔ. Bɛ wo gbalata ka kilɛ laka mansɛnu ye minnu bi nala ka bɔ tele-bɔɛ.

¹³Wo kɔma, n ya nyina-kɔsɔni sawa yen. Anu manɛ iko turugbɔfɔrɛnu. Anu bi bɔla ninkinankɛ wo, sogo-feremɛ wo, anubɛ foninya-nɛbi wonu dɛnu tɔ.

¹⁴Nyina-yoge le wonu na minnu duruta kabana-koenu kɛla. Nyina sawɛ wonu bi tala mansɛnu bara dugu-kole kan tinɛ bɛɛ rɔ ka mansɛ wonu madɛn kɛlɛ-kɛ-koe la Alla Sɛnbɛ Bɛɛ Tigi ka ma wo tele rɔ. (

¹⁵ Mari ko, “Wo ni wo tole masɔ! N bi nala wo latɛrɛnala iko kankan! Mɔgɔ-sewanɛ le wo tigi la min bi kila a ya la ka ala kurɛ makandan alako a lakolɔn kana na to tagamana miliyɛ bolo!”)

¹⁶ Nba, nyina-yogomɛ wonu ya mansɛ wonu madɛn kan tinɛ wo rɔ min tɔgɛ Hiburu-kan rɔ, “Aramagɛdon.”

¹⁷Wo kɔma, melika wɔrɔnfila nyɔgɛ ya ata pani-kunbɛ rawuya fɔnyɔ rɔ. Kuman-kan-ba bɔra mansaya-sigi-fan rɔ Alla-Bato-Bɔn la. A ye a fɔla ko, “A ara ban!”

¹⁸ Bandɛ ya a nyin masɔgɔ. A tugura. San serenta. Dugu-yɛrɛyɛrɛn-ba kɛra min yogo dugu-yɛrɛyɛran bɛɛ ko! Kebi mɔgɔ danta, wo nyɔgɔn dugu-yɛrɛyɛrɛn ma kɛ bɛ mumɛ!

¹⁹ Babilɔn-so-wɛ farata sigi tina sawa la. Nyamanɛ bɛɛta so-wɛnu fanan halakira. Alla ya a fonde to Babilɔn-so-belebele ko. Allata diminya-belebele ye yi-lafɛ min tɔ iko gbɛɛ, a ya a ma, Babilɔn ya a min wo la.

²⁰ Dugu-yɛrɛyɛran ya a ma, yi-tɛma-dugi bɛɛ tununta yen! Kɔnkɛ bɛɛ tununta fanan yen!

²¹ Banda-kolo-wa-belebelenu bɔra san-kole rɔ ka bui mɔgɛnu ma. Wo kelen-kelennamɛ-bɛɛla gbiliyɛ si ma iko yi kalɔn segan. Mɔgɛ wonu ya Alla danka banda-kolo-fitinɛ wola ko la. Wo gbɛlɛyara anu kuma kati!