Read Kuranko Lankɛnimayɛ 4 Bible Online

Lankɛnimayɛ 4 - Kuranko bible

Lankɛnimayɛ 4

¹Wo kɔma, n ya Arinyɛnɛ dɛ-lakanɛ yen ko-rayirɛ rɔ. N ya kuman-kan min namɔɛn fɔlɔn, min manɛ iko buru-fɛ-kan, wo ya a fɔ n ye ko, “Yɛlɛ yan tɔ. Koe minnu si na ma yarɔ, n ni wonu yira i la.”

²Tiriyante wo rɔ, Allala Ni-Sɛnimɛ tara n na sɛnbɛ la. Mansaya-sigi-fan ye Arinyɛni tɔ nyɔ, mɔgɛ do mayiginɛ a rɔ.

³A yakɔrɛ ye malan-malanna iko kuru-da-gbɛlɛ minnu tɔgɔ yasipa anubɛ karinɛliyan. San-duri ye mansaya-sigi-fan wola foolɛ bɛɛ rɔ. Wo mafɛlɛn-nya manɛ iko kuru-da-gbɛlɛ min tɔgɔ ɛmarɔdi.[7]

⁴Mansaya-sigi-fen mogan-ni-nani ye mansaya-sigi-fen kelan wola foolɛ rɔ. Kɛmɔgɔ mogan-ni-nani mayiginɛ wonu tɔ. Anu fɛrɛya-bɔnɛ kura-gbɛ la. Sɛnɛ-mansaya-fulɛ ye anu salɛnu na.

⁵ Banda-nyin-masɔgɛ anubɛ banda-tugu-kan anubɛ san-sɛrɛn-kan ye bɔla mansaya-sigi-fan wo rɔ min bi anu tɛma. Ta-mɛlɛn wɔrɔnfilɛ ye malanna mansaya-sigi-fan wo yakɔrɔ fanan. Allata Ni wɔrɔnfilɛ le wonu na.

⁶Fan do ye mansaya-sigi-fan wo yakɔrɔ min manɛ iko dalɛ. Wo gbɛnɛ iko kuru-da-gbɛlɛ. Dali-fen nani ye mansaya-sigi-fan tɔnkɔn nani bɛɛ rɔ. Anu yarɔ anubɛ anu kɔma, ya gbansan!

⁷Dali-fen fɔlɔtɛ manɛ iko yarɛ. A fila nyɔgɛ manɛ iko turɛ. A sawa nyɔgɛ manɛ iko hadama-den-yakɔrɛ. A nani nyɔgɛ manɛ iko bibi min kanban lafulennɛ.

⁸ Kanban wɔrɔ ye dali-fen nani wo kelen-kelennamɛ-bɛɛ ma. Anu kanban bɛɛ fanɛ yɛnu na. Anu ti bandan bɛti bɔla su-ni-tele. Anu bi a fɔla ko, “Sɛnima, sɛnima, sɛnima, Mari Alla, sɛnbɛ-bɛɛ-tigi le. A ye nyɔ kebi fɔlɔ, a ye nyɔ kaka, ado a ye nyɔ habadan!”

⁹Dali-fen nani wonu bi tola bonyɛ anubɛ gbiliyɛ anubɛ baraka-birɛ bɔla a ye tumɛ bɛɛ, ale min mayiginɛ mansaya-sigi-fan rɔ, kɔni. A nimayanɛ nyɔ habadan! Anu tenbi wo mala,

¹⁰kɛmɔgɔ mogan-ni-nani wonu si anu sa a kɔrɔ. Ale min nimayanɛ habadan, anu bi wo batola ka anuna mansaya-fulɛnu sa mansaya-sigi-fan wo kɔrɔ ka a fɔ ko,

¹¹“Mata Mari le ile la anubɛ mata Alla! A bɛnnɛ i ni to bonyɛ anubɛ gbiliyɛ anubɛ sɛnbɛ sɔrɔnna. Ile le ya fan bɛɛ dan, ado ile le sɔnta wonu dan-koe ma ko anu ni nimayɛ sɔrɔn.”