Read Kuranko Lankɛnimayɛ 6 Bible Online

Lankɛnimayɛ 6 - Kuranko bible

Lankɛnimayɛ 6

¹Wo kɔma, n ya a yen, saga-dan ya li-kɛɛn bɔ a fɔlɔtɛ ma ka a rafulen. N ya dali-fen nanɛ wo kelen kan lamɔɛn. Wo kan manɛ iko san-sɛrɛn-kan. A ko, “Bɔ gbɛ ma!”

² N ya so-gbɛ do yen. Min siginɛ a kuma, kalabɛn ye wo bolo. Alla ya mansaya-fulɛ di wo ma. A bɔra iko mɔgɛ min duruta nɔlɛ kɛla.

³Saga-dan ya li-kɛɛn fila nyɔgɛ bɔ a ma ka a lafulen. N ya dali-fen fila nyɔgɛ kan lamɔɛn ko, “Bɔ gbɛ ma!”

⁴ So-wulan fanan bɔra. Min mayiginɛ wo kuma, Alla ya sɛnbɛ di wo ma ka kɛlɛ lana dugu-kole kuma alako mɔgɛnu ni anu nyɔgɔn faga. Alla ya faan-yan-bɛ di wo ma.

⁵ Wo kɔma, saga-dan ya li-kɛɛn sawa nyɔgɛ bɔ a ma ka a lafulen. N ya dali-fen sawa nyɔgɛ kan lamɔɛn ko, “Bɔ gbɛ ma!” N ya so-finyɛ fanan yen. Min siginɛ a kuma fanan, fen-suman-fan[8] ye wo bolo.

⁶N ya kan do lamɔɛn min mani iko kuman-kan. Wo ye bɔla dali-fen nanɛ wonu tɛma. A ko, “Pani-kunbɛ-nya kelen fui-fan si tele-kelen-sarɛ bɔ. Fui-fan min tɔgɛ bali, wo pani-kunba-nya sawɛ si tele-kelen-sarɛ bɔ. Kɔnɔ i kana fɛɛ sa ɔlifi-tuli anubɛ nɔnbɔ-gbɔ-yi la!”

⁷Wo kɔma, saga-dan ya li-kɛɛn nani nyɔgɛ bɔ a ma ka a lafulen. N ya dali-fen nani nyɔgɛ kan lamɔɛn ko, “Bɔ gbɛ ma!”

⁸ N ya so-pɔrɔkɔsɛ yen. Min siginɛ a kuma, wo tɔgɛ “Sayɛ.” Lakira bilanɛ a kɔma. Alla ya sarati di sayɛ anubɛ lakira ma ka mɔgɛnu faga kɛlɛ anubɛ kɔnkɔ-fitinɛ anubɛ kirayɛ anubɛ sogo-feremɛnu na duninya-tonko-nanɛ wo kelan tɔ.

⁹Wo kɔma, saga-dan ya li-kɛɛn loli nyɔgɛ bɔ a ma ka a lafulen. Minnu fagara Allala-kumɛ-kawandili anubɛ anuna sereya-nyimɛla ko la, n ya wonu niyi yen saraka-bɔ-tinɛ kɔrɔ.

¹⁰Anu gbele-gbelenta kan-ba la ko, “Ma Mari Sɛnbɛ Bɛɛ Tigi, sɛninya-tigi anubɛ tonya-tigi le ile la! I si duninya-mɔgɛ bɛɛ kiti ka anu tɔrɔ ma faga-koela ko la tumɛ nyamintan?”

¹¹Alla ya duruki-gbɛ di mɔgɔ-tɔrɔnɛ wonu kelen-kelennamɛ-bɛɛ ma. Alla ya a fɔ anu ye ko anu ni anu sulen wati-ni kɔrɔ fɔlɔn. Anu ni anu wɔli-kɛ-nyɔgɛnu anubɛ anu na-kelen-nyɔgɛnuna sayɛ makɔni alako anu yatɛ ma ni kofu.

¹² Nba, saga-dan ya a li-kɛɛn wɔrɔ nyɔgɛ bɔ gbole wo ma ka a lafulen. N ya wo yen nkɛkuna, dugu-yɛrɛyɛrɛn-ba kɛra. Tele finta iko birinkan-finyɛ. Karɛ yɛlɛmanta ka wulen pui iko yele.

¹³ Lolenu bɔra san ma ka bui dugi ma iko toro-gbo-gberan si bui nya min ka bɔ toro-kuri la fɔn-bɛ wa a lamaga tumɛ min.

¹⁴ San-kole laminita iko gbolo-lamininɛ ka tunu yen! Kɔnkɛnu anubɛ yi-tɛma-dugi bɛɛ bɔra anu gbɛ rɔ.

¹⁵ Wo kɔma, duninya-mansɛnu wo, kun-tiginu wo, kɛlɛ-den-kunyɛnu wo, nɔnfulu-tiginu wo, sɛnbɛ-wa-tiginu wo, anubɛ a mɔgɔ-toe bɛɛ, a yɔɔn anubɛ a hɔrɛ, bɛɛ ya a dogon farannu na anubɛ farɛnu tɛma minnu bi kɔnkɛnu tɔ.

¹⁶ Anu ya anu kuli mayɛlɛ kɔnkɛnu anubɛ farɛnu ye ko, “Wo ni bui ma kuma ka ma dogon alako min siginɛ mansaya-sigi-fan rɔ, wo kana na ma yen. Wo ni ma bɔ ale saga-danta diminyɛ kɔrɔ,

¹⁷ ado anuna diminya-tele-wɛ ara ke. Yon si to a niyi la wulɔn?”