Read Kuranko Lankɛnimayɛ 7 Bible Online

Lankɛnimayɛ 7 - Kuranko bible

Lankɛnimayɛ 7

¹ Wo kɔma, n ya melika nani sɔnɛ yen dugu-kole-tonko-nanɛ rɔ. Dugu-kolo-fɔn-nani biranɛ anu bolo alako fɔnyɔ kana tugu dugu-kole anubɛ kɔgɔ-yi anubɛ kɔlɔmanu ma tun.

²Alla ara dugu-kole anubɛ kɔgɔ-yi-tinya-sɛnbɛ di melika nanɛ wonu ma. A ya wonu kele a kan-bɛ la. N ya melika-gbɛrɛ namatoe yen ka bɔ tele-bɔɛ-wara la. Alla nimɛta mandan ye a bolo.

³ Melika wo ko, “Wo kana dugu-kole tinya anubɛ kɔgɔ-yi anubɛ kɔlɔmanu fɔlɔn. Fɔ ma ni mandan sigi mata Allata wɔli-kɛlɛnu telɛnu na.”

⁴Nba, Allala mandan sigira minnu telɛ ma, wonu yatɛ fɔra n ye. Wo le mɔgɔ waga kɛmɛ, mɔgɔ waga bi-nani ani waga nani bɔra Isirɛla bɔnsɔn bɛɛ rɔ (144,000).

⁵Mandan sigira mɔgɔ waga tan-ni-fila (12,000) telɛ ma ka bɔ Yuda bɔnsɔn rɔ anubɛ Rubɛn bɔnsɔn rɔ anubɛ Kadi bɔnsɔn rɔ

⁶anubɛ Asɛra bɔnsɔn rɔ anubɛ Nafatali bɔnsɔn rɔ anubɛ Manasa bɔnsɔn rɔ

⁷anubɛ Simiyɔn bɔnsɔn rɔ anubɛ Lifayi bɔnsɔn rɔ anubɛ Isakari bɔnsɔn rɔ

⁸anubɛ Sɛbulɔn bɔnsɔn rɔ anubɛ Yusufu bɔnsɔn rɔ anubɛ Bɛnyamɛ bɔnsɔn rɔ.

⁹Wo kɔma, n ya nyama-wɛ yen, mɔgɔ ti ke minnu yatɛ lɔnna mumɛ! Anu bɔnɛ mɔgɔ-su bɛɛ anubɛ sibole bɛɛ rɔ anubɛ bɔnsɔn bɛɛ rɔ iko anu kan faranɛ nya min. Anu sɔra mansaya-sigi-fan anubɛ saga-dan yakɔrɔ. Duruku-yan-gbɛ ye anu kan na. Tin-yanbɛnu biranɛ anu bolo tɔ.

¹⁰Anu ya anu kuli mayɛlɛ ko, “Mata Alla min mayiginɛ mansaya-sigi-fan rɔ, mala kisi-koe bɔnɛ ale anubɛ saga-dan le bolo!”

¹¹Melika bɛɛ sɔra mansaya-sigi-fan anubɛ kɛmɔgɛnu anubɛ dali-fen nanɛla foolɛ rɔ. Wo kɔma, anu ya anu naburun-a-ma mansaya-sigi-fan yakɔrɔ Alla bato tinɛ.

¹²Anu ko, “Amina! Tantolɛ wo, gbiliyɛ wo, hɛnkili wo, baraka-birɛ wo, bonyɛ wo, sɛnbɛ wo, anubɛ fanka-wɛ le mata Allatɛ la habadan! Amina!”

¹³Kɛmɔgɔ kelen ya n manyinika ko, “Duruku-yan-gbɛ ye mɔgɛ minnu kan na wo la, yon bi wonu na? Anu bɔnɛ mi?”

¹⁴ N ya a yabi ko, “N fa, nde ma a lɔn. Ile le ya wo lɔn.” A ya a fɔ n ye ko, “Minnu bara kisi ka bɔ bɛnsɛnkɔninya-wɛ rɔ, wonu denu bi wonu na. Anu ya anuna duruku-yannu ku ka a ma, anu ni gbɛ saga-dan-yele rɔ.

¹⁵Wo le ya a ma, anu sɔnɛ Allala mansaya-sigi-fan yakɔrɔ ka wɔlɛ kɛ a ye a Bato-Bɔn la su-ni-tele. Ale min mayiginɛ mansaya-sigi-fan rɔ, ale le si anu natanka.

¹⁶ Kɔnkɛ ti anu bira tun. Anu kan la ti gbala tun. Tele anubɛ a wuyan, wo fenfen ti anu mintan,

¹⁷ ado saga-dan min bi mansaya-sigi-fan tɔgɔfɛ, wo si anu kandan iko saga-fɛ-biralɛ ka anu nata tenke-diyamɛ rɔ min si niyi di mɔgɛ ma. Nba, Alla si anu ya-yi bɛɛ firan.”