Read Kuranko Ruti 1 Bible Online

Ruti 1 - Kuranko bible

Ruti 1

¹Yanni Isirɛla mɔgɛnu ni anuta nyamani-tigiya-koe dabira tumɛ min, kɔnkɔ-fitinɛ nara anuna nyamanɛ wo rɔ. Kei do ye Bɛtalehɛm soe burɔ Yuda bɔnsɔn-mɔgɛnuna nyamanɛ rɔ,

²a tɔgɛ Ilimilɛki. Ɛfarati kebila-mɔgɛ do le. Kei wonubɛ ala musi anubɛ ala den-kemini filɛ tara anu sigi Mohabu nyamanɛ rɔ kɔnkɔ sa kan min. Ala musi wo tɔgɛ le Neyomi. Anuna den-kemini filɛ wonu tɔgɛ le Malɔn anubɛ Kaliyɔn.

³Anu tora nyɔ, anu fa kɛmɔgɛ fagara. A ya musi wonubɛ ala dannu to kelengboyɛ rɔ.

⁴A ma mɛ, ala den-kemini filɛ wonu ya musi-sigi-kɛ, Mohabu nyamanɛ dunmusinu, kɔni. Musi wonu tɔgɛ le Ɔrapa anubɛ Ruti.

⁵Anu san tan nyɔgɛ ma nyamanɛ wo rɔ, den-kemini filɛ wonu fanan fagara. Neyomi kelen pe tora nyɔ gbɛ!

⁶A ma mɛ wo kɔma, Neyomi ya a lamɔɛn ko Mari ara duwɛ layigi Isirɛla mɔgɛnu ma. Anu bara dɔn-fen-siyaman sɔrɔn. Neyomi ya a mabɛn ta-koe la Yuda nyamanɛ rɔ anubɛ a mama-nyaganɛnu. Anu bara wuli tala.

⁸Anu bi kilɛ la tumɛ min, a ya a fɔ a mama-nyaganɛ wonu ye ko, “Min fisa, wo sɛgi wo nanu barɛ. Wo ya mabɛ nna dannu fɛ-bira a kilɛ fɛ. Alamɛ Mari ya wo dɛnbɛ iko wo ya ma fɛ-bira nya min.

⁹Alamɛ wo taranta wo diya wola kei-kurɛnu barɛ.” Neyomi ya anu masara diyanayɛ rɔ ka anu sunbu. A mama-nyaganɛ wonu donta diyi-kɛ rɔ.

¹⁰Anu ya a fɔ ko, “Ade, ma ye tala le i fɛ ila mɔgɛnu bara.”

¹¹Neyomi ya a fɔ anu ye ko, “Nba, nna dannu, min fisa, fɔ wo ni sɛgi wo warɛ. Nfen bi a mala, wo ye bilala n fɛ tun? Wole miri le ko n si den-kei-gbɛrɛ sɔrɔn wo si to min ye tun?

¹²Wo sɛgi wo warɛ bawo n bara kɔrɔya. Nde ti sigi kei wara tun. Hali fɛrɛ taranta n ma ka den-keinu sɔrɔn bi suyi rɔ, wo si ke wo nyɛrɛ lamarala anu ye

¹³ha anu si koloya? Nna dannu, ko-bɛnnɛ ma wo la. Wo ya a lɔn ko wo ti ke kɛ mala. Mari ara a kan-kɔ sɔ n na. N kinikininɛ wole ma bawo nna tɔrɔyɛ ara sigi wole fanan ma.”

¹⁴Anu donta diyi-kɛ rɔ tun. Ɔrapa ya a lasɔ. A ya a mama sunbu ka a fɔ a ye ko, “Ma tele, yo.” A sɛgira ala mɔgɛnu bara. Kɔnɔ Ruti ma sɔn a mama bolokala.

¹⁵Neyomi ya a fɔ ale Ruti ye ko, “I bɔ wo ara sɛgi ka ta ala mɔgɛnu bara anubɛ Mohabu kɛnuta bɛsi-kɔ-tinɛ. Ile fanan ni sɛgi a fɛ ka ta ila mɔgɛnu bara.”

¹⁶Kɔnɔ Ruti ya a fɔ ko, “I kana n madiya i boloka-koe ma. I yandi, a ma, n ni ta i fɛ. I tara kan-bo-kan, nde fanan si ta i fɛ nyɔ. I ya i sigi kan-bo-kan, nde fanan si n sigi nyɔ. Ita mɔgɛnu si ma nta mɔgɛnu na. Ita Alla si ma nta Alla la.

¹⁷I wa faga kan min, nde fanan si faga nyɔ. Anu si n togon nyɔ le. Ni nde, Ruti ma to i fɛ, alamɛ Mari ya n tɔrɔya-yogomɛ-kɛ. Fɔ sayɛ, wo le si ma fara.”

¹⁸Neyomi ya a yen nkɛkuna ko Ruti sɛbɛ donnɛ ta-koe ma a fɛ, a ma kuma tun.

¹⁹Wo le mara anuna tɛ la Bɛtalehɛm. Anu ke nyɔ, soe ramagara anuna ko la. Musinu ya a fɔ ko, “Neyomi le ma kɛ la?”

²⁰Neyomi ya a fɔ ko, “Wo ka a fɔ n ma tun, ‘Neyomi’ min kɔrɛ le ‘kun-nadiyɛ.’ Wo ni a fɔ n ma le gbɛ ko, ‘Mara’ min kɔrɛ le ‘kun-nagboyɛ.’ Bawo Allatala ara kun-nagboyɛ di nde ma.

²¹N bi bɔla yan tumɛ min, fen-siyaman bi n bolo kɔnɔ hɛɛ, Mari ara n bolo-kolon-gbɛ lana yan. Nfen bi a tola, wo ye n kelela ko, ‘Neyomi?’ Nba, Allatala ara a ban nde la ka yakɔrɔ-mamɔɛ kɛ lana nde kuma.”

²²Mohabu dunmusi min tɔgɛ Ruti, wo bilara Neyomi fɛ nya min, wo le kɛ la. Anu tara bɛn fui-fen[1] tɛgɛ-wati ma Bɛtalehɛm.