Read Kuranko 1 Samuwɛli 10 Bible Online

1 Samuwɛli 10 - Kuranko bible

1 Samuwɛli 10

¹Samuwɛli ya dantɛgɛ-tuli do bi ka a kɛ Sɔli kunyɛ rɔ ka a sunbu. A ko, “Mari ara ile le yabɔ ka ma mansɛ la Isirɛla mɔgɛnu kun na. I si mansayɛ kɛ Marita mɔgɛnu kun na ka anu matanka anu yogenu ma minnu bi anuna foolɛ rɔ. I wa bɔ n dafɛ bi, i si kemini fila taran Resɛli kanbɛ dafɛ Sɛlɛsa soe kɔma Bɛnyamɛta nyamani-dan la. Kemini filɛ wonu si a fɔ i ye ko, ‘I ye sofɛlɛ minnu nyinina nun, wonu bara yen.’ Anu si a fɔ tun ko, ‘I fa hɔnni ma sofɛlɛ wonu wara-koe la tun. A hɔnnɛ ile le wara-koe la gbɛ bawo tuma-wo-tuma, a ye a fɔla ko a ma a lɔn a si min ma ala dan wara-koe rɔ. Wo bɛɛ wa ma tumɛ min, wo le ye a yirala i la ko Mari le wara i yabɔ ka i ma mansɛ la.’

³I wa bɔ nyɔ fanan, i si ta furr, ha i ni ta ke kɔlɔma-kuru-latankanɛ do kɔrɔ Tebɔ soe dafɛ. I si bɛn kɛmɔgɔ sawa la nyɔ minnu bi tala Alla bato tinɛ Bɛtɛli soe burɔ. Kelan, baa-den sawa ye wo bolo. Wo ye tala wonu na. Doi, biredi-lɔngbɔn sawa ye wo bolo. A sawa nyɔgɛ, i si nɔnbɔ-gbɔ-yi yen gbolo-bɔrɛ do rɔ a bolo.

⁴Anu si i kɔndɔn ka biredi-lɔngbɔn wo fila di i ma. I ni wonu bira. Wo le ye a yirala i la ko Mari le wara i yabɔ ka i ma mansɛ la.

⁵“Wo kɔma, i si ta kan tinɛ do rɔ anu bi min kelela ko Allata kɔnkɛ. Wo ye Kibiya soe burɔ le, Filisitinu si anu daga makɛ kan min. Yanni i ni don soe burɔ, i si bɛn nɛbi-kurɔn donu na. Anu bi saraka-mintan-tina-kɔnkɛ wo yigila. Anu bi sɔrɔnnu anubɛ dundunnɛnu fɔla. Anu bi fulinu fɛla ka bɔlɔnnu fanan fɔ. Nɛbi wonu bi dɔn anubɛ sɔnkɔ-sɔnkɛ kun na.

⁶Tiriyante wo rɔ, Marita Sɛnbɛ si yigi i kuma. I fanan si kofu anu ma dɔn-kɛ anubɛ wɔlɔyiya-kuma-fɔɛ rɔ iko anu denu. Ila ko-ladan-nya bɛɛ si yɛlɛma. Wo le ye a yirala i la ko Mari le wara i yabɔ ka i ma mansɛ la.

⁷Kɛnu ba ma i la wati min, Alla ya i sɔ ko-wo-ko la, i ni wo ma bawo Alla ye i fɛ.

⁸I si ta n yarɔ Kiligali soe burɔ. N ni i taran nyɔ. Ma si sarakɛnu mintan ka yisi-kima-sarakɛnu bɔ nyɔ ma nyɔgɔn fɛ. I ni n makɔnɔ nyɔ tele wɔrɔnfila kɔrɔ ha n ni na. N ba ke nyɔ tumɛ min, ile si min ma, nde si wo fɔ i ye.”

⁹Sɔli ya kilɛ bira tumɛ min, Alla ya a yisi yɛlɛma ka kɛ-nya-kurɛ di a ma. Samuwɛli ya wɔlɔyiya-kumɛ min bɛɛ fɔ a ye, wonu mara tonyɛ la wulɔn tele rɔ.

¹⁰Sɔli anubɛ ala wɔli-kɛlɛ wo kera Allata kɔnkɛ wo ma tumɛ min Kibiya soe burɔ, nɛbi-kurɔn wonu ya anu taran. Tiriyante wo rɔ, Allata Sɛnbɛ yigira Sɔli kuma. Ale fanan kofura nɛbi wonu ma dɔn-kɛ anubɛ wɔlɔyiya-kuma-fɔɛ rɔ.

¹¹Mɔgɛ minnu ya Sɔli kɛ lɔn kɔrɔma la, wonu tora anu nyɔgɔn manyinikala ko, “Nfen manɛ Kisala dan kɛ la? Ale fanan bara ma nɛbi la, wa?”

¹² Kei do siginɛ nyɔ nun. Wo ya nyinikalɛ kɛ ko, “N bɔnu, nɛbi doi kɛnu fa ye yon na?” Kumɛ wo mara sarandɛ la anu bolo ka a fɔ ko, “Sɔli kɛ fanan bi nɛbiyɛ le la gbɛ, wa?”

¹³Sɔli ban dɔn-kɛ anubɛ wɔlɔyiya-kuma-fɔɛ wo la, a yɛlɛta saraka-mintan-tina-kɔnkɛ wo kuma.

¹⁴Sɔli berin ya Sɔli anubɛ ala wɔli-kɛlɛ wo yen tumɛ min, a ya anu manyinika, a ko, “Wo ye mintɔ nun?” Sɔli ya a fɔ a ye ko, “Ma ye sofɛlɛnu denu nyini tinɛ nun. Ma ma anu yen min kɛ, wo le ya a ma, ma tara ke Samuwɛli ma.”

¹⁵A berin ya a fɔ a ye ko, “Wo ya nfen fɔ i ye nun?”

¹⁶Sɔli ya a yabi ko, “A ya a fɔ ma ye le ko sofɛlɛ wonu bara yen.” Kɔnɔ Samuwɛli ya kumɛ min fɔ a la mansaya-koe rɔ, a ma wonu takaran a berin ye.

¹⁷Samuwɛli ya mɔgɛnu kundɛn Mari ye Misipa soe burɔ.

¹⁸A ya a fɔ anu ye ko, “Isirɛlata Mari Alla ko ale le ya wo tanka Iyipiti kɛnu masibɛ ma ka na wo la yan. A ko hali mɔgɛ minnu bi wo yakɔrɔ-mamɔla, a ya wo tanka wonu fanan ma.

¹⁹A ko ale le wota Alla la min bi wo bɔla wola kɔndɔfilinu tɔ. Kɔnɔ a ko kaka, wo ara don mansa-kura-nyinɛ rɔ ka wo ban ale la. A ko ale le wo la. A ara sɔn wo bolo. Kɔnɔ a ko wo ni wo ladɛn wola bɔnsɔn anubɛ wola kebilɛ ma ale Mari yakɔrɔ.”

²⁰Samuwɛli nara Isirɛla bɔnsɔn damasi la. Mari ya Bɛnyamɛ bɔnsɔn yabɔ.

²¹A nara Bɛnyamɛ bɔnsɔn la ka wonu sɔ iko anuna kebilɛ ye nya min. Mari ya Matiri kebilɛ yabɔ Bɛnyamɛ bɔnsɔn rɔ. Mari ya Kisala den-kei Sɔli yabɔ Matirila kebilɛ rɔ. Anu ya anu yɛ lakalan a ma nyɔ kɔnɔ anu ma a yen.

²²Anu ya Mari manyinika tun a wara-koe ma, anu ko, “Ale ye mintɔ? A ye ma tɛma yan?” Mari ya a fɔ ko, “Wo ma a dogonnɛ yen dunɛnu kɔma wo la?”

²³Anu tara a bi tumɛ min ka na a sɔ mɔgɛnu tɛma, Isirɛla mɔgɛ bɛɛ dan le a kanban-kunyɛ la.

²⁴Samuwɛli ya a fɔ mɔgɛnu ye ko, “Wo ara a yen Mari ara mɔgɛ min yabɔ? A nyɔgɔn-takɛn sa wo do-wo-do rɔ yan tɔ.” Mɔgɛ wo bɛɛ ya anu kan nabɔ anu nyɔgɔn fɛ anuna mansa kura wo ye ko, “Alamɛ i mɛra!”

²⁵A bɛnta, mansɛ ni min ma anu na, Samuwɛli ya wonu takaran anu ye. Anu ya wonu sɛbɛ buku do rɔ. Samuwɛli ya buku wo bi ka a sa kan-tina-sɛnimɛ do rɔ. A ya mɔgɛnu masara ka anu nata anu barɛnu tɔ.

²⁶Sɔli fanan sɛgira a warɛ Kibiya soe burɔ. Alla ara minnu yisi yɛlɛma, wo mɔgɔ-malɔnnɛ donu bilara a fɛ.

²⁷Kɔnɔ mɔgɔ-karagbɛlɛ donu bi nyɔ. Wonu ya a fɔ ko, “Dennɛ kɛ si ke ma lakisila kama?” Anu yigi tɛgɛra Sɔli la, ado anu ma a sanba fenfen na. Wo bɛɛ rɔ, Sɔli ma fenfen fɔ.