Read Kuranko 1 Samuwɛli 15 Bible Online

1 Samuwɛli 15 - Kuranko bible

1 Samuwɛli 15

¹ Samuwɛli ya a fɔ Mansa Sɔli ye ko, “Mari le nyɛrɛ ya nde sɔ ka ile dantɛgɛ. Ile mara Isirɛla mɔgɛnuna mansɛ la. I tole masɔ. Mari Sɛnbɛ-Bɛɛ-Tigi si na min fɔ, i ni wo lamɔɛn.

² A ko a si Amalɛkinu tɔrɔ bawo Isirɛla mɔgɛnu bɔra Iyipiti tumɛ min, anu benbanu ya wo benbanu tɔrɔ.

³A ko wo ni ta bui Amalɛkinu ma ka anu nato dogbe! Wo ni anu bolo-fan bɛɛsi halaki pɔ! Kei wo, musu wo, den wo, anubɛ anuna kolo-fannu, wo ni wo damasi halaki.”

⁴Mansa Sɔli ya ala kɛlɛ-dannu kundɛn kan tinɛ do rɔ min tɔgɛ Tilɛm ka anu dan. Mɔgɔ waga kɛmɛ fila (200,000) bɔra Isirɛla nyamanɛ rɔ. Mɔgɔ waga tan (10,000) kofura anu ma ka bɔ Yuda bɔnsɔn rɔ.

⁵Mansa Sɔli tara ala kɛlɛ-dan wonu na Amalɛkinuna soe do dafɛ ka anu dogon fole la nyɔ.

⁶A ya kilayɛ lata Kena mɔgɛnu ma minnu siginɛ Amalɛkinu tɛma ko, “Wo ni wo bɔ Amalɛkinu kurun tɔ alako wo dama kana faga wo nyɔgɔn fɛ.” A ya wo fɔ bawo Isirɛla mɔgɛnu bɔra Iyipiti tumɛ min, Kena mɔgɛnu denu ya ko-nyimɛ kɛ anu benbanu ye. Woletɔ Kena mɔgɛnu ya anu bɔ anu kurun tɔ.

⁷Mansa Sɔli bɔra Amalɛkinu fagala Hafila soe burɔ ha ka ta ke Sura soe burɔ min bi Iyipiti tele-bɔɛ wara la.

⁸A ya anuna mansɛ bira min tɔgɛ Ekaki kɔnɔ a ya Amalɛki mɔgɛ wonu damasi faga tɛrr!

⁹Mansɛ wo kɛndɛ tora Mansa Sɔli anubɛ ala kɛlɛ-dannu bolo. Amalɛkinuna saga-hakikɛnu anubɛ anuna ninki-hakikɛnu fanan kɛndɛ tora. Anu bolo-fan minnu kin, anu ya wonu namara anu nyɛrɛ ye. Anu bolo-fan minnu ma kin dɔrɔnfan, anu ya wonu kasara.

¹⁰Wati tenbinɛ, Mari ya a fɔ Samuwɛli ye ko,

¹¹“Sɔli kɛ mɛ n bolo mansɛ la, n bara nimisa ala ko la bawo a ara a kan-kɔ sɔ n na ka nna kumɛnu tinya.” Samuwɛli yisi kɔrɔtɔra a ma ha a kira Mari madiyala.

¹²Wo wulun sɔgɔma subaga, a tara Mansa Sɔli labɛn tinɛ. A ya a lamɔɛn ko Mansa Sɔli ara ta Kamɛli soe burɔ ka kuri do sigi nyɔ min si a ma, mɔgɛnu yili ti bɔ a ko. Wo kɔma, Mansa Sɔli ya a lamɔɛn tun ko Samuwɛli ara ta Kiligali.

¹³A ke Mansa Sɔli ma nyɔ, Mansa Sɔli ya a kɔndɔn ka a fɔ a ye ko, “Mari ni ata duwɛ layigi i kuma. N bara Marita kumɛ bira.”

¹⁴Samuwɛli ya a manyinika ko, “Nfenna ninki kɛnu anubɛ sagɛ kɛnu kannu bi bɔla yan?”

¹⁵Mansa Sɔli ya a fɔ a ye ko, “Nna kɛlɛ-dannu denu ya anu bi Amalɛkinu bolo. Anu ya ninki-hakikɛnu anubɛ saga-hakikɛnu namara ka anu ma ila Mari Allata sarakɛnu na. Kɔnɔ ma ya a toe bɛɛsi kasara tɛrr!”

¹⁶Samuwɛli ya a lakala, a ko, “A to. Mari ya min fɔ n ye kunu suyi rɔ, n ni wo rakaran i ye.” Mansa Sɔli ya a fɔ a ye ko, “Nba, awa, a fɔ n ye.”

¹⁷Samuwɛli ya a fɔ a ye ko, “Hali ile yigi tɛgɛnɛ i nyɛrɛ la nun, kun-tigi le ile la Isirɛla bɔnsɔn-mɔgɛnu kun na. Mari ara i dantɛgɛ ka i ma Isirɛla mɔgɛnuna mansɛ la,

¹⁸ado a ya a fɔ i ye ko i ni Amalɛki karagbɛlɛnu kasara. A ya a fɔ i ye ko i ni anu kɛlɛ furr, ha i ni anu nato dogbe!

¹⁹Nfenna i ma Marita kumɛ wo bira? Nfenna wo ya wo buri tala fen-kolomɛ wonu birala ka Mari fonde magboya?”

²⁰Mansa Sɔli ya a fɔ ko, “N ya Marita kumɛ bira le. N tara kɛlɛ kɛ iko a ya a fɔ n ye nya min. N nara anuna mansɛ Ekaki la. N ya Amalɛki damasi faga.

²¹Kɔnɔ nna kɛlɛ-dannu, wonu ma sɔn saga-hakikɛnu anubɛ ninki-hakikɛnu fagala. Yanni anu ni wo ma, anu nara anu na Kiligali yan tɔ alako ka anu ma sarakɛnu na ileta Mari Alla ye.”

²²Samuwɛli ya a fɔ a ye tun ko, “Nfen si Mari hɛnɛ? Kɔ-fannu anubɛ saraka-mintantɛnu ka ata kuma-birɛ, wa? Yanni i ni saga-hakikɛnu ma sarakɛ la Mari ye, a fisa, i ni Marita kumɛ bira.

²³Ka murutiya Mari ma, wo yogo a yala iko suwagayɛ. Wasinteyɛ yogo a yala iko bɛsi-kɔ-koe. Bawo i wara i ban Marita kumɛ birala woletɔ ale fanan bara a ban ile fananta mansayɛ ma.”

²⁴Wo kɔma, Mansa Sɔli ya a fɔ Samuwɛli ye ko, “Tonyɛ le wo la. N bara hakɛ kɛ. N bara hakɛ kɛ bawo n bara Marita kumɛnu tinya anubɛ itɛ. N kilanta nna kɛlɛ-dannu na woletɔ n ya a ma iko a di anu ye nya min.

²⁵Woletɔ i yandi, i ni n hakɛ makoto. Ma bɛɛ ni ta Kiligali alako n ni ta Mari bato nyɔ.”

²⁶Samuwɛli ya a fɔ ko, “N ti bila i fɛ nyɔ. Ile ara i ban Marita kumɛ birala. Ale fanan bara a ban ita mansayɛ ma Isirɛla mɔgɛnu kuma!”

²⁷Samuwɛli ya a kan-kɔ sɔ tumɛ min, Mansa Sɔli ya ala duruku-ba bira a kɔma kilɛ la. Duruki wo rafarata.

²⁸ Wo manɛ, Samuwɛli ya a fɔ a ye ko, “Mari fanan bara Isirɛla mɔgɛnuna mansayɛ rafara i ma bi wo nya na. A si a di mɔgɛ do ma min tenbira ile la.

²⁹Isirɛlata Alla-makawanɛ, wo ti foninyɛ fɔ hali ka a miriyanu yɛlɛma bawo mɔgɔ ma ale la iko a ye nala a miriyanu yɛlɛmana.”

³⁰Mansa Sɔli ya Samuwɛli madiya, a ko, “Hali n bara hakɛ kɛ kɔnɔ gbiliyɛ di n ma nta mɔgɔ-banu anubɛ Isirɛla mɔgɛnu yala. A ma, ma bɛɛ ni ta ma nyɔgɔn fɛ alako n ni ta ita Mari Alla bato.”

³¹Woletɔ Samuwɛli bilara Mansa Sɔli fɛ ka ta Kiligali. Mansa Sɔli ya Mari bato nyɔ.

³²Anu ke nyɔ, Samuwɛli ya a fɔ anu ye ko, “Wo ta Amalɛkinuna Mansa Ekaki bi, wo ni na a la n bara.” Mansa Ekaki yili-latɛgɛnɛ nara bawo a ya a lɔn ko a ara saya-masibɛ to a kɔma.

³³Kɔnɔ a ke Samuwɛli ma, wo ya a fɔ ale mansɛ ye ko, “Musi siyaman bara foo anuna dannu na ila faan la nya min, ile fanan, i na foonɛ si to ala dan la wo nya na le.” Samuwɛli ya Mansa Ekaki wo kundu bɔ saraka-mintan-tinɛ dafɛ Kiligali nyɔ.

³⁴Samuwɛli tara a warɛ Rema soe burɔ. Mansa Sɔli fanan sɛgira a warɛ Kibiya.

³⁵Mari nimisara bawo a ara Sɔli ma mansɛ la. Samuwɛli fanan yisi tinyanta Sɔlila ko la, ado a ma Sɔli yen a yɛ la tun ha ale Samuwɛli fagara.