Read Kuranko 1 Samuwɛli 2 Bible Online

1 Samuwɛli 2 - Kuranko bible

1 Samuwɛli 2

¹ Hana ya Mari bato. A ko, “Mari ara n yisi lafa sewɛ la. N sewanɛ bawo Mari ara min ma n ye. N si yɛlɛn de n yogenu ma gbɛ! N nyagalennɛ bawo Alla ara n dɛnbɛ.

²“Mɔgɔ-wo-mɔgɔ sɛninyani ma iko Mari, ado a nyɔgɔn sa. Fenfen sa nyɔ min si mɔgɔ matanka iko mata Alla kɛ.

³“Wo ni wo fara nyɛrɛ-kɔrɔbiyinu na. Mari Alla, wo le ya koe bɛɛ lɔn. Ale le ye mɔgɛnu kiti tɛgɛla.

⁴Kɛlɛ-dannuna kalabɛn kalɛ ra ara keri. Kɔnɔ kɛlɛ-dan min ta ma gbɛlɛ nun, wonu bara sɛnbɛ sɔrɔn kaka.

⁵Mɔgɛ min sako sanɛ dɔn-fan rɔ nun, kaka wonu denu bi wɔli-wo-wɔli kɛla. Kɔnɔ kɔnkɔto-kɔrɛnu, kɔnkɛ ara bɔ wonu na feu! Gbandɛ ara den mɔgɔ wɔrɔnfila sɔrɔn. Kɔnɔ dan siya min bolo nun, wo ye yisi-kɔrɔtɛ rɔ.

⁶Mari le si mɔgɛnu faga, ado ale le si niyi bila mɔgɛnu tɔ. Ale si mɔgɛnu nata lakira, ado ale fanan si anu nabɔ nyɔ.

⁷Ale Mari si donu nama-a-la ka donu fanan tabunden. Ale le si donu famayigi ka donu famayɛlɛ.

⁸Ale le si bolo-kolɔnnu bɔ gbangban rɔ ka mɔgɔ-fɛlɛtenɛnu hayu kasa. A si sɛnbɛ di anu ma iko mansa-dannu ka gbiliya-tinɛnu di anu ma. Mari leta ye dugu-kole sɛnbɛrɛn-kɔnnu na, ado ale ya dugu-kole sa wonu kuma.

⁹“Ale le si ata mɔgɔ-latelennɛnu niyi latanka kɔnɔ karagbɛlɛnu na si to pinpi rɔ dogbe, bawo mɔgɔ nyɛrɛta sɛnbɛ dɔrɔn ti a ma, a ni ta yarɔ.

¹⁰Mari yogenu si kasara. A si tɔrɔyɛ layigi anu kuma iko san-gbalamɛ. Mari si duninya-mɔgɛ bɛɛ kiti tɛgɛ. Ale le si sɛnbɛ di ata mansɛ ma. Ata mansa-yabɔnɛ si nɔ-ko sɔrɔn.”

¹¹Ɛlakena anubɛ ala musi sɛgira anu barɛ Rema soe burɔ kɔnɔ anu ya Samuwɛli wo to Saraka-Masɔla-Kun-Tigi-Wɛ Ilayi bolo Sailo soe burɔ ka Marita wɔlɛ kɛ nyɔ.

¹²Ilayita den-keinu kalabante. Anu ti sɔn Mari gbiliyala.

¹³Anu ti sɔn Allala tɔnnu birala saraka-masɔlɛnuta niyila ko la. Isirɛla mɔgɛ min ba na ala sarakɛ la a bɔ tinɛ, yanni anu ni saraka-soge wo kɛɛn tɛgɛ a ma ka a mintan Mari ye, saraka-masɔlɛla wɔli-kɛlɛ si ta a fɔ saraka-bɔlɛ ye ko, “Saraka-masɔlɛ ko i ni a kɔ saraka-soge do rɔ. A sa a tenɛ fɛ. A kuran di a ma a si min mintan a nyɛrɛ ye.” Ni saraka-bɔlɛ ma sɔn wo ma fɔ ka a fɔ ko, “Ma ni ko-latelennɛ ladan ka a kɛɛn fɔlɔn mintan Mari ye, wo kɔma, wo ni a toe bi.” Wɔli-kɛlɛ wo si a fɔ ko, “Ni i ma a don n bolo kaka, n si a bi fɔrɔsɛ la.” Min sanɛ wo kuma, saraka-masɔlɛla wɔli-kɛlɛ si ta sogo-sɔgɔ-fan la a bolo. A si soge wo do labɔ dagɛ rɔ tɛ kun na sogo-sɔgɔ-fan wo la saraka-masɔlɛ niyi ma min na ka ta wo don saraka-masɔlɛ wo bolo. Isirɛla mɔgɔ-wo-mɔgɔ nara Sailo saraka-bɔ-tinɛ, a si a ma anu na wo nya na le.

¹⁷Ilayita den-keminɛ kɛnuta hakɛ wo ma di Mari ye mumɛ bawo anu bi Mari lafɛyala a kɔ tinɛ.

¹⁸Wo wati ya a taran, Samuwɛli dennɛ le nun. A ye wɔlila Mari ye. A si linɛn-fɔlɔnfalan bila a kan na min manɛ iko saraka-masɔlɛnuta fɔlɔnfalan-natankanɛ.

¹⁹San-bo-san, a fa anubɛ a na tenbi nala san sarakɛ la Sailo, a na si duruku-ba-nɛ kara a ye ka a sanba wo la.

²⁰Saraka-Masɔla-Kun-Tigi-Wɛ Ilayi si duwa Ɛlakena anubɛ ala musi, Hana ye wo wati le tɔ. A si a fɔ Ɛlakena ye ko, “Alamɛ Mari ya den di ila musi kɛ ma ila den Samuwɛli kɛ gbɛ rɔ bawo i wara kɛ dantɛgɛ Mari ma.” Wo kɔma, anu si sɛgi anu barɛ.

²¹Marita duwɛ yigira Hana kuma. A ya den-kei mɔgɔ sawa sɔrɔn tun anubɛ dunmusu mɔgɔ fila. Samuwɛli koloyara Marita wɔlɛ kɛla.

²²Ilayi ara kɔrɔya gbɛ kɔbɔkɔbɔ! Tuma-wo-tuma, ala dannu bi ko-yogomɛ minnu sigila Isirɛla mɔgɛnu ma, a ye wonu namɔɛnna. A ye a lamɔɛnna fanan ko anu bi anu sala musinu fɛ minnu bi wɔli kɛla Marita Fani-Bɔn don-dɛ dafɛ.

²³A ya a fɔ ala dan wonu ye ko, “Mɔgɛnu bi wo sɔn-yogomɛnu takaranna n ye. Nfenna wo ye wonu mala?

²⁴Nna dannu, Marila mɔgɛnu bi min fɔla n ye, ko-yogomɛ le wonu na. Wo ni wo sɔn-yogomɛ wonu boloka!

²⁵Ni mɔgɛ ya hakɛ kɛ a hadama-den-nyɔgɛ la, Alla si ke wo tigi latankala le. Kɔnɔ ni mɔgɛ ya hakɛ kɛ Mari la, yon si ala kumɛ fɔ?” Kɔnɔ hali wo, anu ma sɔn anu tole masɔla anu fa la, bayɛ Mari ara ban a latɛgɛla ko fɔ anu ba faga anu hakɛla ko la.

²⁶ Samuwɛli tora koloyala, ado a diyanɛ Mari anubɛ mɔgɛnu ye.

²⁷Nɛbi do nara Marila kilayɛ lake Ilayi ma, “I benba Aruna anubɛ ala denbayɛ ye yɔɔnyɛ rɔ Iyipiti mansɛ kɔrɔ tumɛ min, ale Mari ko a ya a nyɛrɛ yira a la nyɔ.

²⁸ A ya Aruna kebilɛ bɛɛsi yabɔ Isirɛla bɔnsɔn-mɔgɛnu tɛma ka anu denu dɔrɔn ma saraka-masɔlɛnu na a nyɛrɛ ye. A ko wo si to wɔlila saraka-mintan-tinɛ anubɛ isɛnti mintan tinɛ. Hali wole si a miriya lɔn saraka-masɔ-fɔlɔnfalan min fɛ, a ara sɔn ko wole ni wo don. Min sanɛ wo kuma, a ko hali wo si wo niyi sɔrɔn saraka-sogo-mintantɛ rɔ yanni a ni mintan.

²⁹Mari ko ale ye ata sarakɛ minnu makelela ata mɔgɛnu bolo, nfenna wo ye a lafɛyala wonu bɔ tinɛ worɔ? A ko ile Ilayi, i wara sɔn ila dannu bara ata saraka tɔnɔma tinɛnu dɔn ata mɔgɛnu bi nala minnu na a ye ha anu bara kunbaya. A ko nfenna i ye ila dannu gbiliyala ka tenbi ale la?

³⁰“A ko ale Isirɛla mɔgɛnuta Mari Alla ara lanyiri kiri wati-tenbinɛ ko Aruna anubɛ ata denbayɛ si ma ata wɔli-kɛlɛnu na tolon! Kɔnɔ a ko kaka, a ti sɔn wo ma tun. A ko min bi a gbiliyala, ale fanan bi wo le fanan gbiliyala. Min bi a lafɛyala, ale fanan bi wo le tigi lafɛyala.

³¹I ni i tole masɔ. Mari ko wati ye nala, kemini-mɛsɛ minnu bɛɛsi ye ila kebilɛ la, a si wonu faga. Woletɔ kei-wo-kei ti taran ita kebilɛ la min si kɔrɔya.

³²A ko a ye nala duwɛ min kɛla Isirɛla mɔgɛ toenu ye, ni i ya wo rayen tumɛ min, i yisi si tinya keliyɛ bolo. A ko mɔgɔ-wo-mɔgɔ ti to ita kebilɛ rɔ min si kɔrɔya kɔbɔkɔbɔ!

³³Kɔnɔ anu kelen-kelan minnu bi tola, wonu si to i yakɔrɔ-mamɔla ha i yigi ni tɛgɛ. Anu si to kerila a ma fonikeyɛ rɔ.”

³⁴ Nɛbi ya a fɔ Ilayi ye tun ko, “Mari ko ila den filɛ Hɔfini anubɛ Finihasi wa faga tele kelen kɔrɔ tumɛ min, wo si ma i ye tamasere la ko a ya min bɛɛ fɔ i ye, tonyɛ le wonu na.

³⁵Mari ko a si ata saraka-masɔlɛ yabɔ min latelennɛ a ye. Wo si to a sako kɛla iko a ye nyinina a ma nya min. A ko a si to wo bɔnsɔn siyayala. Wonu si to ata wɔli kɛla ata mansa-yabɔnɛta wati rɔ.

³⁶A ko ni wo ya a taran, ile kegeyɛ min bi a niyi la wo wati rɔ, wonu si ta saraka-masɔlɛ wo tara dɔn-fan anubɛ wodi ma. Anu si to saraka-masɔlɛ wo madiyala alako wo si wɔlɔni di anu ma nya min, anu si anu beli-fan sɔrɔn min tɔ.”