Read Kuranko 1 Samuwɛli 20 Bible Online

1 Samuwɛli 20 - Kuranko bible

1 Samuwɛli 20

¹Rema soe tɔnkɔn do min tɔgɛ Neyɔti, Dawuda bɔra nyɔ. A tara Yonatan warɛ. A ke nyɔ, a ya a manyinika ko, “N ya nfen ma? N bara nfen ko-sufa tinya? N bara nfen ko-yogoma ma i fa la min bi a tola n faga-sɔgɛ ye a la?”

²Yonatan ya a fɔ a ye ko, “Alla ni i tanka wo ma. Mɔgɔ-wo-mɔgɔ ti i faga. N fa ti ko-wo-ko ladan n nyina-ma-ko-lɔn bawo ni a ye ko-wo-ko mala, fɔ a wa wo fɔ n ye. I wara i faga-koe min fɔ kɛ la, tonya sa wo rɔ!”

³Dawuda ya a fɔ a ye ko, “I fa ya a lɔn serr, ko n di i ye, ado a ya a lɔn fanan ko, ni a ya ko-sufa kɛ fɔ i ye, a si i yisi tɔrɔ i ma kosɛbɛ! N bara n keli i ye Mari Alla la, n bi lakira bonda-dɛ le la kɛ la.”

⁴Yonatan ya a fɔ Dawuda ye ko, “N si i dɛnbɛ nya-wo-nya, wo fɔ n ye.”

⁵ Dawuda ya a yabi ko, “Karɛ-Kura-Yen-Tolon le sina, ado mabɛ i fa le fen-dɔn-kɛla a warɛ. Kɔnɔ ni i si sɔn, n ni ta binyɛ rɔ ka kan tinɛ do nyini n si n dogon kan min ha sina matenbi wurɛ la.

⁶Ni i fa ya n manyinika, a fɔ a ye ko ile le ya sarati di n ma ko n ni ta n barɛ Bɛtalehɛm soe burɔ ka ta bɛn mala kebila-saraka-bɔɛ rɔ min bi kɛla san-bo-san.

⁷Ni a ya a fɔ ko, ‘Tana ma,’ nba, n kunyɛ ara bɔ a rɔ. Kɔnɔ ni a yisi bɔra, i si a lɔn worɔ ko ko-yogomɛ ma-sɔgɛ ye n na.

⁸I yandi, ko-nyimɛ kɛ kɛ n ye. I wara ila lanyiri min kiri n ye nun Mari yala, i ni wo latɔnbagaya. Ni i lara a la ko n bara ko-yogomɛ do le ma, yanni i fa ni n faga, a fisa, ile ni n faga.”

⁹Yonatan ya a fɔ a ye ko, “I kana kuma sufa wonu fɔ. Ni nde ya a lɔn serr, ko n fa ye ko-yogomɛ mala i la le, n ti wo fɔ i ye, wa?”

¹⁰Dawuda ya a fɔ a ye ko, “Ni i fa yisi bɔra le, yon si wo fɔ n ye?”

¹¹Yonatan ya a fɔ a ye ko, “Ma ta gbɛkole ma.” Anu ke nyɔ,

¹²Yonatan ya a fɔ Dawuda ye ko, “Isirɛla mɔgɛnuta Mari Alla le ma sere la. Ka a bi sina ma ka a sigi sina matenbi la, n si n fa miriyanu lɔn! Ni ila ko-diyɛ ye a rɔ, n si a ma, i ni a lɔn.

¹³Kɔnɔ ni ila ko-diya sa a rɔ, ado ko-yogoma ma-sɔgɛ ye a la i wara la, ni n ti i lalɔn alako i ni i buri, alamɛ Mari ya n faga worɔ. Alamɛ Mari tora i fɛ iko a taranta n fa fɛ nya min nun.

¹⁴Kɔnɔ fananta n bi n niyi la, i ni to i mirila mala sarama-kan ma ka ko-nyimɛ kɛ n ye. Hali n fagara le fanan,

¹⁵ i ni to i mirila ko-nyimɛ ma nna denbayɛ wara la fanan burubukai! Hali i yoge damasi latora, i ni to i mirila ko-nyimɛ ma nna denbayɛ wara la.

¹⁶Sarama-kan le kɛ la ma mɔgɔ filɛ ara min kiri ma nyɔgɔn tɛma. Alamɛ Mari ya i yoge bɛɛsi kasara.”

¹⁷Bawo Dawuda di Yonatan ye iko a nyɛrɛ, woletɔ a ya a ma, Dawuda ya lanyiri sufa wo kiri a ye.

¹⁸Wo kɔma, Yonatan ya a fɔ a ye ko, “Karɛ-Kura-Yen-Tolon le sina. Anu si a lɔn sina ko i sa nyɔ bawo i sigi-tina-makolɔn si to.

¹⁹Sinan-kɔ-wura-magben ma, i ni ta i dogon-tina-kɔrɛ rɔ, i ya i dogon fɔlɔtɛ kɛ kan min nun. I ni i dogon kuru-kinama-wɛnu kɔma nyɔ.

²⁰Mabɛ dennɛ do si na sɔ binyɛ rɔ nyɔ. N si kalabɛn lakɛ kuri wonu fɛ iko sawa. Wo si ma iko n bi fen de bon tinɛ.

²¹N si a fɔ nna dennɛ ye ko a ni ta nna kalabɛn wonu nyini. Ni n ya a fɔ a ye ko, ‘Kalabɛnnu bi yan bara la,’ wo kɔrɛ le, i ni bɔ gbɛ rɔ. I wara kisi. N bara n keli Mari la ko i ti kɔndɔfili sɔrɔn.

²²Kɔnɔ ni n ya a fɔ a ye ko, ‘Kalabɛnnu bi pan bara la,’ wo kɔrɛ le, i ni i buri. Mari ara i lata.

²³Iko ma ara lanyiri kiri ma nyɔgɔn ye nya min kɛ la, alamɛ mala lanyiri kɛnu natɔnbagayara burubukai!”

²⁴Dawuda tara a dogon binyɛ rɔ farɛnu kɔma. Karɛ-Kura-Yen-Tolon kuma, Mansa Sɔli tara fen dɔn tinɛ.

²⁵A sigira a gbɛ rɔ dandan wara la. Abina sigira a dafɛ. Yonatan sigira anu telen tɔ. Kɔnɔ Dawuda sigi-tina-makolɔn tora.

²⁶Mansa Sɔli ma a da tugu Dawuda wara-ko-kumɛ la wulɔn-tele rɔ bawo a miri nun wulɔn, ko tumado koe do ara ma Dawuda la min bara a ma, a ma sɛninya iko tɔn ya a fɔ nya min.

²⁷Wo banda kɛ fanan, a ma Dawuda yen a sigi tinɛ. Mansa Sɔli ya ala den Yonatan manyinika ko, “Nfen ya a to, Dawuda ma na fen dɔn tinɛ ma wara kunu anubɛ bi?”

²⁸Yonatan ya a fɔ a fa ye ko,

²⁹“A ya n madiya le ko a ye tala bɛnna anuna kebila-saraka-bɔɛ rɔ Bɛtalehɛm, ado a ko a kɔrɔ ko a ni ke nyɔ. A ko ni a diyana-mɔgɛ le nde la, a ko n ni sɔn a ta-koe ma alako a ni ta ala mɔgɛnu yen. Woletɔ a sa ma tɛma yan kaka.”

³⁰Mansa Sɔli diminyara Yonatan ma. A ya a fɔ a ye ko, “Ile yɛlɛn-musu-kɔrɔ-dan! N bara a lɔn ko ile le sɔnɛ Yɛsila den Dawuda fɛ. Wo si ma miliya-koe la wobɛ i na bolo.

³¹Ile ma a lɔn, fananta Dawuda ye a kɛndɛ la, ile ti mansayɛ sɔrɔn nyamanɛ kɛ rɔ? Nba, ta a bi. I ni na a la. A ni faga!”

³²Yonatan ya a fɔ a fa ye ko, “A ya nfen ma i la, a ye fagala minna ko la?”

³³Mansa Sɔli ya ala tanbɛ bi ka a lafili Yonatan ma a faga-koe ma kɔnɔ tanbɛ wo foora a la. Yonatan ya a lɔn wo le ma ko Dawuda faga-sɔgɛ ye a fa la.

³⁴Karɛ-Kura-Yen-Tolon tele filɛ wo ma, Yonatan ya a lasɔ yisi-bɔɛ bolo. A bɔra, a ma fenfen dɔn wo rɔ bawo a yisi tinyanta Dawudala ko la anubɛ ka a tɛgɛ a fa darɔ-kan ma ale Dawuda wara la.

³⁵Wo wulun sɔgɔma, Yonatan anubɛ dennɛ do tara gbɛkole ma Dawuda ye kan min iko anu sarata a ma nya min. A ya a fɔ dennɛ wo ye ko, “N tenbi kalabɛn min nakɛla, i ni i buri tala wo bila.” Dennɛ wo burimatoe ye tala, Yonatan ya kalabɛn lakɛ dennɛ wo yarɔ-kilɛ la.

³⁷Dennɛ wo ke kalabɛn bu tinɛ, Yonatan ya a kan mayɛlɛ ko, “I ma kalabɛn wo yen pan bara la wo la?

³⁸I kana to sɔnɛ i gbɛ rɔ nyɔ. I buri tala.” Dennɛ wo ya kalabɛn wo bi. A tara a don Yonatan bolo.

³⁹Kɔnɔ Yonatan ya kɛ ma kɔrɛ min na, dennɛ wo ma wo lɔn. Fɔ Yonatan anubɛ Dawuda dɔrɔn, wonu denu ya kɛ kɔrɛ lɔn.

⁴⁰A ya ala kalabɛn wo don dennɛ wo bolo. A ko, “Ta a la soe.”

⁴¹Dennɛ wo bɔnɛ nyɔ rɔ, Dawuda bɔra farɛ wonu kɔma. A ya a maburun dugi ma Yonatan kɔrɔ iko sawa. Anu ya anu bole sa anu nyɔgɔn kan ma ka anu nyɔgɔn kɔndɔn ka di. Kɔnɔ Dawuda, wo le dira belebele-wɛ-kɛ.

⁴²Yonatan ya a fɔ Dawuda ye ko, “Alamɛ Alla tora i fɛ. Malebɛ ile sarata min ma ma nyɔgɔn tɛma kɛ la, Mari si wo latɔnbagaya ma mamanɛnu tɛma burubukai!” Dawuda tara a kun fɛ. Yonatan tara soe.