Read Kuranko 1 Samuwɛli 22 Bible Online

1 Samuwɛli 22 - Kuranko bible

1 Samuwɛli 22

¹ Dawuda ya a buri ka bɔ Kati soe burɔ ka ta a dogon faran do la Adulam soe dafɛ. Dawuda na-kelen-nyɔgɛnu ya a lamɔɛn min kɛ ko a ara ta faran wo la nyɔ, anu tara kofu a ma nyɔ.

²Mɔgɔ-tɔrɔnɛnu wo, yilima-tiginu wo, anubɛ mɔgɔ-murutiyanɛnu, wonu denu wulita ka ta kofu Dawuda ma. Mɔgɛ wonu yatɛ bɛnta mɔgɔ kɛmɛ nanɛ ma. Ale Dawuda mara anuna kun-tigi la.

³Dawuda bɔra nyɔ ka ta Misipa soe burɔ min bi Mohabu nyamanɛ rɔ. A ya a fɔ Mohabu mansɛ ye ko, “N fa, i yandi, a ma, n fa anubɛ n na ni na sigi i wara ha n ni a lɔn Alla ye nala min mala n ye.”

⁴Dawuda tara a na anubɛ a fa bi ka ta anu to Mohabu mansɛ wo ma. Ale Dawuda tora sigini faran wo la. A sɔrɔnnɛ wonu fanan tora sigini Mohabu mansɛ wo warɛ.

⁵Nɛbi min tɔgɛ Kadi, wo ya a fɔ Dawuda ye ko, “I kana to sigini yan tɔ. Ta Yuda nyamanɛ rɔ.” Dawuda ya a bɔ nyɔ. A tara Hɛrɛti gbɔngbɔn kɔrɔ.

⁶Mansa Sɔli siginɛ kɔlɔma-kuri do kɔrɔ Kibiya kɔnkɛ do kuma. Ala tanbɛ ye a bole la. Ala mɔgɔ-banu sɔnɛ ala foolɛ rɔ. Mɔgɛ do tara a fɔ Mansa Sɔli ye ko anu ya Dawuda anubɛ ala keminɛnu yen.

⁷Mansɛ ya a fɔ ala mɔgɔ-banu ye ko, “Wole Bɛnyamɛ bɔnsɔn-mɔgɛnu! Wole lara a la ko Dawuda si wɔli-kɛ-tinɛnu di wo ma iko nde duruta a mala nya min? Wole lara a la ko ale si wo ma kɛlɛ-den-kun-tigi la ala keminɛnu tɛma?

⁸Woletɔ wo ye yanfɛ ladanna n ma. Wole mɔgɔ-den-kelen-bɛrɛni ma a fɔ n ye ko nna dan anubɛ Dawuda ara ko lakiri. Mɔgɔ-wo-mɔgɔla ko sa n bara-koe rɔ. Nna den Yonatan sɔ-koe Dawuda fɛ ka n faga, mɔgɔ-wo-mɔgɔ ma sɔn wo fɔla n ye.”

⁹Dowɛgi min sɔnɛ Mansa Sɔlila kun-tiginu dafɛ, wo ya a fɔ ko, “N tara Saraka-Masɔla Ahimɛlɛki wara Nobi soe burɔ tumɛ min, n ya Dawuda yen nyɔ.

¹⁰ Saraka-masɔlɛ wo ya Mari manyinika ni Dawuda si min ma. Wo kɔma, a ya dɔn-fan di Dawuda ma ka Filisitinuna kɛlɛ-kurugbɛ Kolatila faan don a bolo.”

¹¹Mansa Sɔli ya Ahitubala den Ahimɛlɛki anubɛ ala denbayɛnu kele minnu bi saraka-masɔ-wɔli kɛla Nobi soe burɔ.

¹²Anu ke Mansa Sɔli ma, Mansa Sɔli ya a fɔ Saraka-Masɔla Ahimɛlɛki ye ko, “I tole masɔ.” Saraka-masɔlɛ ya a fɔ ko, “Ɔn-hɔn, n tigi.”

¹³Mansa Sɔli ya a fɔ a ye ko, “Nfen ya a to, wobɛ Dawuda ye yanfɛ lakirila n ma? I ya a de-nyini, i ya faan don a bolo, i ya Alla manyinika a ye ka a tɛgɛ nfen ma? Ale Dawuda fanan bara wuli n kan ma. A ye a kɔnkɔnna n faga-koe ma.”

¹⁴Saraka-Masɔla Ahimɛlɛki ya a fɔ a ye ko, “Dawuda telenta ka tenbi ila kun-tigi bɛɛ la, ado i biran-kei le ale la. I makandannɛnuna kun-tigi le ale la. Ila mɔgɛ bɛɛ ye a gbiliyala.”

¹⁵A ya a fɔ a ye tun ko, “Tonyɛ le wo la. N bara Alla manyinika a ye, ado a fɔlɔn ma wo la n bolo. Kɔnɔ ka a fɔ ko ma ye yanfɛ lakirila i ma, n tigi, hali i ma wo dunu sa mabɛ nna mɔgɛnu kuma. N ma ko-wo-ko lɔn wo rɔ.”

¹⁶Mansa Sɔli ya a fɔ ale Ahimɛlɛki ye ko, “Wolebɛ i kebilɛ bɛɛ si faga!”

¹⁷Wo kɔma, a makandannɛ minnu bi a dafɛ, Mansa Sɔli ya a fɔ wonu ye ko, “Wo ni Marita saraka-masɔlɛ kɛnu faga bawo anu denubɛ Dawuda ara yanfɛ lakiri n ma. Hali anu ya a lɔn ko Dawuda ara a buri, anu ma sɔn wo fɔla n ye lefan!” Kɔnɔ a makandannɛ wonu ya anu ban Marita wɔli-kɛlɛ wonu faga-koe ma.

¹⁸Woletɔ Mansa Sɔli ya a fɔ Dowɛgi ye ko, “Nba, ile ni anu faga.” Idɔm kɛ Dowɛgi, wo ya a ya-lamunun anu na ka anu dama faga. Wulɔn tele rɔ, Dowɛgi ya saraka-masɔla mɔgɔ bi-segin ani mɔgɔ loli (85) faga a bɛnnɛ minnu ni saraka-masɔ-fɔlɔnfalan wo don.

¹⁹Wo kɔma, Mansa Sɔli ya a ma, Dowɛgi tara Nobi kɛnu faga, saraka-masɔlɛnuna soe, kɔni. Kei wo, musu wo, denni wo, kolo-fen wo, a ya anu damasi faga tɛrr!

²⁰Kɔnɔ Saraka-Masɔla Ahimɛlɛkila den Abiyatari, wo ya a buri tala kofula Dawudala keminɛnu ma.

²¹Mansa Sɔli ya Marita saraka-masɔlɛnu faga Nobi soe burɔ nya min, Abiyatari tara wo dantɛgɛlɛ sa Dawuda ye.

²²Dawuda ya a fɔ ale Abiyatari ye ko, “N ya Dowɛgi taran Saraka-Masɔla Ahimɛlɛki warɛ tumɛ min, n ya a lɔn nun ko a si wo rakaran Mansa Sɔli ye. I fa anubɛ a na-kelen-nyɔgɛnu fagɛ, n gbɛ le wo la.”

²³Dawuda ya a fɔ a ye tun ko, “Hali i ma kilan. To n fɛ. Mɔgɛ min bi ile faga-koe rɔ, nde fanan faga-sɔgɛ ye wo la. I si kanan nde fɛ.”