Read Kuranko 1 Samuwɛli 23 Bible Online

1 Samuwɛli 23 - Kuranko bible

1 Samuwɛli 23

¹Dawuda ya a lamɔɛn ko Filisitinu bara ta bui Kiyaila kɛnu ma ka anuna sɛnita-fannu kankan anuna gberenu ma.

²Dawuda ya Mari manyinika, a ko, “N si ta le Filisiti kɛnu kɛlɛla, wa?” Mari ya a fɔ ko, “Ɔn, ta anu kɛlɛ. I ni Kiyaila mɔgɛnu nakanan anu masibɛ ma.”

³Kɔnɔ Dawudala keminɛnu ya a fɔ a ye ko, “Ma kumakɔnɛ Yuda nyamanɛ kɛ rɔ, kumanato ni ma tara Filisitinu kan ma Kiyaila soe burɔ. Wo si ma kama ma bolo?”

⁴Dawuda ya Mari manyinika tun. Mari ya a fɔ a ye ko, “Ta Kiyaila kɛnu kumafunfan bawo n si a ma, i ni Filisitinu nɔ.”

⁵Woletɔ Dawuda anubɛ ala keminɛnu tara bui Filisitinu ma Kiyaila. Anu bara Filisiti mɔgɔ-siyaman faga ka anuna kolo-fannu toronde anu bolo. Dawuda ya Kiyaila kɛnu kisi wo nya na le.

⁶Saraka-Masɔla Ahimɛlɛkila den Abiyatari ya a dogon tumɛ min ka ta kofu Dawuda ma Kiyaila, a tara saraka-masɔ-fɔlɔnfalan la a bolo.

⁷Mɔgɛ do ya a fɔ Mansa Sɔli ye ko Dawuda ara ta Kiyaila soe burɔ. Mansa Sɔli ya a fɔ ko, “Alla ara Dawuda don n bolo gbɛ! A ara a nyɛrɛ bira soe kɛ burɔ tarɛ mininɛ min ma.”

⁸Mansa Sɔli ya ala kɛlɛ-dan donu bi ka ta Dawuda kan ma Kiyaila.

⁹Dawuda ya a lamɔɛn min kɛ ko Mansa Sɔli ara wuli a kan ma, a ya a fɔ Saraka-Masɔla Abiyatari ye ko, “Na saraka-masɔ-fɔlɔnfalan wo la n ye.”

¹⁰A ya a fɔ Mari ye ko, “E, Isirɛlata Mari Alla, n bara a lamɔɛn ko Mansa Sɔli ye nala Kiyaila kasarala ka a tɛgɛ nde, ila wɔli-kɛlɛla ko ma.

¹¹Kiyaila kɛnu si n don Mansa Sɔli bolo, wa? Mansa Sɔli ye nala le iko n bara a lamɔɛn nya min, wa? Isirɛlata Mari Alla, i yandi, n bara i madiya. I ni n yabi!” Mari ya a fɔ a ye ko, “Ɔn, a ye nala le.”

¹²Dawuda ya a manyinika tun ko, “Kiyaila kɛ kɛnu bi mabɛ nna keminɛnu donna le Mansa Sɔli bolo, wa?” Mari ya a fɔ a ye ko, “Ɔn, anu bi wo mala le feu!”

¹³Dawuda anubɛ ala keminɛ minnu si mɔgɔ kɛmɛ wɔrɔ (600) nyɔgɔn bɔ le, anu bɔra Kiyaila soe burɔ tiriya! Anu tora tala. Anu ma anu daga makɛ kan-tina-kelen. A lamɔɛn Mansa Sɔli bolo ko Dawuda ara bɔ Kiyaila, a ma a tɔrɔ tala nyɔ tun.

¹⁴Dawuda tora a dogonna kɔnkɛnu tɛma Sifi wulɛ rɔ. Tuma-wo-tuma, Mansa Sɔli ye a nyinina. Kɔnɔ Alla ma sɔn Dawuda dila Mansa Sɔli ma.

¹⁵Dawuda ya a lɔn ko Mansa Sɔli ye a kan ma a faga-koe rɔ. Yonatan ya Dawuda taran wulɛ kan tinɛ do rɔ min tɔgɛ Hɔrɛsi-Sifi wulɛ rɔ. A ya a yisi-sa-kumɛnu fɔ ka a makawandi ko Alla si a latanka.

¹⁷Yonatan ya a fɔ Dawuda ye tun ko, “I kana kilan. N fa ti ko-wo-ko ma i la. A ya a lɔn serr, ko ile le ye mala Isirɛla mɔgɛnuna mansɛ la, ado a ya a lɔn fanan ko nde le ye mala ila kandɛ la.”

¹⁸ Anu mɔgɔ filɛ ya lanyiri kiri anu nyɔgɔn tɛma alako anu ni diya a kurɛ la. Yonatan ya Dawuda to nyɔ. A sɛgira a warɛ.

¹⁹ Sifi wularɔ-mɔgɛ donu tara Mansa Sɔli taran Kibiya soe burɔ. Anu ya a fɔ a ye ko, “Dawuda dogonnɛ ma-warɛ Hɔrɛsi. A ye Hakila kɔnkɛ rɔ min bi dugu-magbalanɛ rɔ Yuda nyamanɛ dugula wara la.”

²⁰Anu ya a fɔ mansɛ ye tun ko, “Ma tigi, ma ya a lɔn ko Dawuda bira-sɔgɛ ye i la. Wati wo diyara i ye, na ma taran. Ma si a don i bolo.”

²¹Mansa Sɔli ya a fɔ anu ye ko, “Alamɛ Mari duwara wo ye bawo wola ko ye nna ko rɔ.

²²Wo ta nyɔ lakɔrɔsi tun. Wo ni a lɔn ni a ye kan tinɛ min gben! Mɔgɛ minnu fanan bi a yenna, wo ni wo lɔn. N ya a lɔn ko a kɛwu kosɛbɛ!

²³A si a dogon kan tinɛ min tɔ, wo ni nyɔ lɔn. Wo la a la serr, wo wa ban a wara-koe fɛsɛfɛsɛla wati min, wo ni na a fɔ n ye. Wo kɔma, mabɛ si ta wona. Ni a taranta a ye nyɔ le, n si a nyini Yuda nyamanɛ wo kan tinɛ bɛɛ rɔ.”

²⁴Mɔgɛ wonu tara Mansa Sɔli yarɔ Sifi wulɛ rɔ. Kɔnɔ wo ya a taran, Dawuda anubɛ ala keminɛnu bi Meyɔn dugu-magbalanɛ rɔ Yuda nyamanɛ dugula wara la.

²⁵Wo kɔma, Mansa Sɔli anubɛ ala kɛlɛ-dannu wulita Dawuda nyini tinɛ. Kɔnɔ Dawuda ya wo lamɔɛn tumɛ min, a tara a dogon Meyɔn wulɛ wo kan tinɛ do rɔ kɔnkɛrɔ-farɛnu siya kan min. Mansa Sɔli fanan ya wo lamɔɛn tumɛ min, a ya a sagaran.

²⁶Dawudanu bi kɔnkɛ yɛ doi ma tumɛ min, Sɔlinu bi a yɛ doi fanan ma. Mansa Sɔli anubɛ ala kɛlɛ-dannu gbɛrɛnta Dawuda anubɛ ala keminɛnu ma. Kɔnɔ Dawuda anubɛ ala keminɛnu ya anu natiriya anu burila Mansa Sɔli anubɛ ala kɛlɛ-dannu kɔrɔ. A tora doni Mansa Sɔli anubɛ ala kɛlɛ-dannu ni Dawuda anubɛ ala keminɛnu bira.

²⁷A ma mɛ, kilayɛ do kera Mansa Sɔli ma ko, “Na tiriya! Filisitinu bara na bui mala nyamanɛ ma!”

²⁸Mansa Sɔli ya a bɔ Dawuda fɛ nyɔ le. A tara Filisitinu kɛlɛ tinɛ fɔlɔn. Woletɔ anu ya kɔnkɛ wo tɔgɔ sa “Tafara[15] kɔnkɛ.”

²⁹Dawuda anubɛ ala keminɛnu bɔra nyɔ ka ta anu dogon Ɛngidi faran do la.