Read Kuranko 1 Samuwɛli 24 Bible Online

1 Samuwɛli 24 - Kuranko bible

1 Samuwɛli 24

¹Mansa Sɔli bɔɛ Filisitinu gben tinɛ, mɔgɛ do ya a fɔ a ye ko Dawuda dogonnɛ Ɛngidi wulɛ rɔ.

²Wo kɔma, Mansa Sɔli ya kɛlɛ-dan mɔgɔ waga sawa (3,000) bi Isirɛla mɔgɛnu tɔ minnu tagbɛlɛ. Anu tara Dawuda nyini tinɛ kan tinɛ do rɔ anu bi min kelela ko Firala-Baa-Farɛ nyɔ-tele-bɔɛ wara la.

³ A tara ke faran do ma kilɛ dafɛ saga-wɔrɛnu bi kan min. Mansa Sɔli tara da kɔma faran wo la. Kɔnɔ yaga, Dawuda anubɛ ala keminɛnu dogonnɛ faran wo burɔ pon!

⁴Dawudala keminɛ wonu ya a fɔ a ye ko, “Mari ara fɛrɛ-bɛrɛbɛrɛ le di i ma kɛ la iko a ya a fɔ i ye nya min nun ko a si i yoge don i bolo. Ko-wo-ko diyara i ye gbɛ, i si wo sigi le a ma.” Dawuda tara dɔidɔi ka Mansa Sɔlila duruku-ba wo do tɛgɛ a la. Kɔnɔ Mansa Sɔli ma ko lɔn wo rɔ.

⁵Dawuda sɛgira a kɔma ala mɔgɛnu bara. Wo kɔma, a yisi donta a tɔrɛ rɔ a ma bawo a ara Mansa Sɔlila duruki tɛgɛ a la.

⁶Dawuda ya a fɔ ala keminɛ wonu ye ko, “Ka ko-yogomɛ ma nna kun-tigi la, alamɛ Mari ya n tanka wo ma bawo Mari le ya ale yabɔ ka a ma mansɛ la. N kana ko-wo-ko ma a la bawo Mari le ya a sigi mansayɛ la.”

⁷Dawuda ya ala keminɛnu nakala alako anu kana na ko ma Mansa Sɔli la. Mansɛ bɔra faran wo la ka kilɛ bira.

⁸Wo kɔma, Dawuda fanan bɔra a kɔma. A ya ale Mansa Sɔli rakele. A ko, “N tigi.” Mansa Sɔli ya a ya-lamunun a la. Dawuda ya a madu a ye dugi ma ka a gbiliya.

⁹A ya a fɔ mansɛ ye ko, “Mɔgɛ minnu bi a fɔla i ye ko nde ye ko-yogomɛ ma koe rɔ i la, nfenna i ye wonuna kumɛ birala?

¹⁰I si a yen i nyɛrɛ yɛ la ko Mari ya i don n bolo tɔ bi. Nna keminɛ donu ya a fɔ n ye ko n ni i faga kɔnɔ n kinikinita i ma. N ya a fɔ ko n ti ko-wo-ko ma i la bawo Mari ara ile le yabɔ ka i ma mansɛ la.

¹¹N fa, i ma ila duruku-kundi yen n bolo yan. N si ke i fagala le nun kɔnɔ n ma wo ma. Fɔ n ya ila duruki min tɛgɛ a la. Kɛ si a yira i la ko n murutiyani ma i ma, hali ka ko-yogomɛ ma i la. I ye n manɛgɛnna n faga-koe la, hali n ma ko-yogoma ma i la.

¹²Alamɛ Mari ya kiti tɛgɛ ma tɛma ka yoe di yo-tigi ma. Alamɛ Mari ya i tɔrɔ ila ko-yogomɛla ko la nde wara la kɔnɔ nde ti ko-yogoma ma i la.

¹³Anu bi sarandɛ min fɔla ko, ‘Ko-yogoma-kɛlɛ le si ko-yogomɛ ma,’ ile ya wo lɔn serr! Woletɔ nde ti ko-yogoma ma i la.

¹⁴ “Wola mansɛ ye min faga-koe rɔ, wo ma wo yen? Wo ma a yen a ye min manɛgɛnna? Nfen bi nde la? N mani de iko wulu-suyi. N dɔgɔ fanan iko muruntu-mɛrɛntɛ.

¹⁵Kɔnɔ alamɛ Mari ya kiti tɛgɛ ma tɛma. Alamɛ Mari tora n fɛ ma tɛma kiti kɛ rɔ ka n tanka i masibɛ ma.”

¹⁶Dawuda ban kɛ fɔla, Mansa Sɔli ya a fɔ a ye ko, “Nna den Dawuda le kumala kɛ la?” A donta di-kɛ rɔ.

¹⁷A ya a fɔ Dawuda ye ko, “Ile latelenta nde ko. Ile ya ko-nyimɛ kɛ n ye kɔnɔ nde ya ko-yogomɛ le ma i la!

¹⁸I wara ko-nyimɛ yira n na bi bawo Mari ara n don i bolo kɔnɔ i ma ko ma n na.

¹⁹Mɔgɔ yon si a yoge bira, a ni a boloka, a ma ko ma a la? I wara ko-nyimɛ min ma n ye bi, alamɛ Mari ya i sara wo la.

²⁰N bara a lɔn gbɛ serr, ko ile le ye mala mansɛ la Isirɛla mɔgɛnu kun na, ado mansayɛ ti bɔ ila kebilɛ la.”

²¹A ya a fɔ Dawuda ye tun ko, “I keli n ye Mari yakɔrɔ bi, ko i ti n tɔgɔ latunu ka n mamanɛnu nato.”

²²Dawuda ya lanyiri kiri Mansa Sɔli ye. Mansɛ anubɛ ala kɛlɛ-dannu tara soe. Dawuda anubɛ ala keminɛnu sɛgira anu kɔma anu dogon-tina-kɔrɛnu tɔ.