Read Kuranko 1 Samuwɛli 25 Bible Online

1 Samuwɛli 25 - Kuranko bible

1 Samuwɛli 25

¹Samuwɛli fagara, woletɔ Isirɛla mɔgɛ bɛɛsi kundɛnta kan-tina-kelen ka di ala ko la. Anu ya a togon a sɔrɔn-soe burɔ Rema. Wo kɔma, Dawuda tara Paran wulɛ rɔ.

²Kei do ye nyɔ rɔ Kelabu kebila-mɔgɛ do le. A tɔgɛ le Nebali. A siginɛ Meyɔn soe burɔ kɔnɔ dugi do ye a bolo Kamɛli soe dafɛ. Nɔnfulu-tigi le ale la. Saga waga sawa (3,000) ye a bolo. Baa waga kelen (1,000) bi a bolo fanan. Ala musi tɔgɛ le Abigɛli. Musi kɛ kin, ado a hɛnkili kolo. Kɔnɔ musi kɛla kei Nebali, a wunduyogo, ado a yisi lakala. Dawuda tora wulɛ le tɔ. A ya a lamɔɛn ko Nebali ye ala sagɛnu siyi[16] matɛgɛla Kamɛli soe burɔ.

⁵Dawuda ya ala kemini mɔgɔ tan lata Nebali kɔndɔn tinɛ nyɔ.

⁶A ya a sara anu na ko anu ni ta a fɔ Nebali ye ko, “Nde ara wobɛ wola denbayɛnu kɔndɔn bɛrɛkɛ!

⁷N bara a lamɔɛn ko wo ye wola saga-siyi matɛgɛla. Wola saga-fɛ-biralɛnu bara mɛ n bolo yan kɔnɔ ma ma ko ma anu na, ado anu bi ma tɛma wati min, mɔgɔ-wo-mɔgɔ ma fenfen kankan anu bolo fanan.

⁸Wo ni wola saga-fɛ-biralɛnu manyinika tun kumɛ wola ko la. Woletɔ wo ni ma bira boloko-nyimɛ-kɛ. Fenfen bi wo bolo, wo ni wo di ma ma bawo ladiya-wati le kɛ la.”

⁹Kilayɛ wonu tara Dawudala kilayɛ lake Nebali ma. Anu sigira ka Nebali makɔni nyɔ.

¹⁰A mɛ doni, Nebali ya anu yabi ko, “Yon bi Dawuda kɛ la? Nde ma Dawuda tɔgɛ lamɔɛn bɛ! Mala nyamanɛ kɛ lafanɛ yɔɔn-burinɛnu denu na.

¹¹Nde ara biredi anubɛ yi anubɛ soge minnu namara nna wɔli-kɛlɛnu ye, nde ye wo dila wole ma nfenna? N ma wole lɔn.”

¹²Dawudala kilayɛ wonu ya kilɛ bira ka ta anu dantɛgɛ a ye.

¹³Dawuda ya a fɔ anu ye ko, “Wo ni wola faannu don wo kawɛ kɔrɔ.” Anu ya a ma iko Dawuda ya a fɔ anu ye nya min. Ale Dawuda fanan ya ala faan bi. Mɔgɔ kɛmɛ nani (400) nyɔgɔn tara. Mɔgɔ kɛmɛ fila (200) nyɔgɔn tora anu kɔma daga makandan tinɛ.

¹⁴Nebalila wɔli-kɛlɛ do ya a fɔ Nebalila musi Abigɛli ye ko, “N ma a lɔn ni i wara a lamɔɛn ko Dawuda min siginɛ wulɛ rɔ, wo ya mɔgɛ donu nana ma tigi kɔndɔn tinɛ. Kɔnɔ ila kei ya anu mamɔɛn dɔgɔma-ma-de!

¹⁵Kɔnɔ Dawudala keminɛnu ya ma bira boloko-nyimɛ-kɛ, ado anu ma ma tɔrɔ tele-kelen-bɛrɛni! Ma ye anu fɛ nyɔ wati min, mɔgɔ-wo-mɔgɔ ma ma kankan mumɛ!

¹⁶Ma ye mala sagɛnu fɛ wati min, su-ni-tele mɔgɛ kɛnu bi ma makandanna.

¹⁷Ile nyɛrɛ-nyɛrɛ ni i miri ko sufa kɛ ma. I ni a lɔn i si min ma. Kɛ si ma kasarɛ la mala kun-tigi anubɛ ala denbayɛ ye. A yisi gbɛlɛ. Mɔgɔ ti kuma a ye, ado a ti ko lamɔɛn.”

¹⁸Abigɛli ya wo lamɔɛn tumɛ min, tiriyante wo rɔ a ya dɔn-fen siyaman bi. A ya biredi-lɔngbɔn kɛmɛ fila bi anubɛ nɔnbɔ-gbɔ-yi gbolo-bɔrɔ fila. Wo kɔma, a ya saga-mintanni loli bi ka buyi pani-kunbɛ-nya tan-ni-wɔrɔnfila sa a kuma. Wo kɔma, a ya nɔnbɔ-gbɔ-gbalanɛ tɔnsɔn kɛmɛ anubɛ toro-gbɔ-gbalanɛ bolo-nya kɛmɛ fila bi ka wonu damasi kiri sofɛlɛnu kɔ tɛma.

¹⁹A ya a fɔ wɔli-kɛlɛ wonu ye ko, “Wo sɔ n yarɔ. N bi nala.” Kɔnɔ a ma kuma-wo-kuma fɔ ala kei ye.

²⁰Abigɛli siginɛ ala sofɛlɛ la, a ye tala. A kera kila-radu-tinɛ ma kan min kɔnkɔ-kerikerinya ma, a bɛnta Dawuda anubɛ ala keminɛnu na nyɔ le, anu namatoe.

²¹Wo wati ya a taran, Dawuda ye a mirila ko, “Nfenna n ya kei kɛla kolo-fannu natanka wulɛ rɔ yan? Mɔgɔ-wo-mɔgɔ ma fenfen kankan a bolo-fannu tɔ. I wara a yen, kɛ ara nna ko-nyimɛ sara ko-yogomɛ la?

²²Yanni bandɛ ni ka sina, ni n ti Nebali anubɛ ala keminɛ damasi faga, alamɛ Alla ya n faga.”

²³Dawuda yen Abigɛli bolo, tiriyante wo rɔ, a bɔra ala sofɛlɛ kuma ka a laburun a ma Dawuda kɔrɔ.

²⁴A ya a fɔ Dawuda ye ko, “I yandi, n tigi, i wɔlɔ matɔlɔ n na. I ni i tɛgɛ sigi nde ma.

²⁵I kana i tole masɔ kun-takolɔn wo la. Ale mani de iko a tɔgɛ wo ye nya min bawo a tɔgɛ wo kɔrɛ le, ‘Kun-takolɔn.’ Ila wɔli-kɛlɛ wonu bi nala a wara tumɛ min, wo ya a taran, nde sa nyɔ nun.

²⁶Mari le dɔrɔn ya a ma, i ma i ya-lamunun i yogenu na ka anu damasi faga. N bara n keli Mari la ko i yogenu si tɔrɔyɛ sɔrɔn iko Nebali kɛ, ado mɔgɔ-wo-mɔgɔ ya a miri ko-yogomɛ ma i wara la, wo tigi si tɔrɔyɛ sɔrɔn iko n buin Nebali kɛ.

²⁷N fa, i yandi, n bara na ila mɔgɛnu sanbɛ la. Anu bira.

²⁸N tigi, i yandi, ni n bara bila i la, i hakɛ to n ye. Mari si wobɛ i kegeyɛnu ma mansɛ la bawo i ye ata kɛlɛ kɛ le la. Fananta i ye i kɛndɛ la, i ti ko-yogoma ma.

²⁹Ni a sɔgɛ ye mɔgɔ-wo-mɔgɔ la ka i faga, ita Mari Alla si i tanka wo masibɛ ma iko mɔgɔ si ala nɔnfuli kandan nya min. Mari si i yogenu nakɛ a rɔ iko lenfiran-kuri.

³⁰Mari ara lanyiri min bɛɛsi kiri i ye, a si wonu natɔnbagaya ka i ma Isirɛla mɔgɛnuna mansɛ la.

³¹Wonu ba ma tumɛ min, ile ti nimisa bawo i ma baga mɔgɔ ma ka a faga hali ka i tayili sara mɔgɔ la. Wo wati wa ke tumɛ min, i kana nyina n ko.”

³²Dawuda ya a fɔ a ye ko, “N si baraka bira Isirɛlata Mari Alla ye bawo ale le wara i lana ka n taran yan bi.

³³I wara n nasɛgi mɔgɔ fagɛ anubɛ tayili-sara-kilɛ min ma bi, n si baraka bira Alla ye ita hɛnkili-nyimɛla ko la.

³⁴Mari ara a ma, n ma ko-wo-ko ma wo la. Kɔnɔ ni i ma i latiriya nala n taranna yan nun, n bara n keli Isirɛlata Mari Alla-nimɛ rɔ nun ko yanni sina sɔgɔma, n si Nebali anubɛ ala bonna-keminɛ bɛɛsi faga.”

³⁵Abigɛli tara fan min bɛɛsi la Dawuda sanbayɛ la, a ya wonu bira. Dawuda ya a fɔ a ye ko, “I yisi kana gbala. Sɛgi i warɛ. N si a ma iko i yili ye a ma nya min.”

³⁶Abigɛli tara ala kei Nebali wara. A ya a taran, ala kei ye ladiyɛ min kun na, wo manɛ de iko mansɛtɛ. A ara a min kɔlikɔli. A sewanɛ baan bolo woletɔ Abigɛli ma kuma-wo-kuma fɔ a ye ha wo wulun sɔgɔma.

³⁷Baan bɔɛ a yɛ la sɔgɔma, koe min bɛɛsi tenbira, Abigɛli ya wonu takaran a ye. Wo lamɔɛn a bolo, a yisi tɛgɛra bao! A fɛrɛ mɔlɔkɔnta.

³⁸Tele tan tenbinɛ, Mari ya a ma, kirayɛ wo ya a faga.

³⁹Dawuda ya a lamɔɛn tumɛ min ko Nebali ara faga, a ko, “Mari ni tanto! Nebali kɛ le ya n mɔɛn, ado i wara n tayili sara a la. Mari ara a ma, n ma ko-yogoma ma. Mari ara Nebali tɔrɔ ala wunduyogoyɛla ko la.” Dawuda ya a sara Abigɛli wara a furu-koe rɔ.

⁴⁰Ala wɔli-kɛlɛ donu tara Abigɛli wara Kamɛli soe burɔ ka a fɔ a ye ko, “Dawuda le ya n masɔ i wara ko ma ni na i bi alako i ni ta ma ala musi la.”

⁴¹Abigɛli ya a laburun a ma wɔli-kɛlɛ wonu kɔrɔ. A ya a fɔ anu ye ko, “Ala wɔli-kɛlɛ le nde la. N tabɛnnɛ de ka ala wɔli-kɛlɛnu kian maku.”

⁴²Wo kɔma, a ya a lasɔ tiriya ka ta a sigi ala sofɛlɛ la. Dawudala wɔli-kɛlɛnu wo, ale wo, anubɛ ala wɔli-kɛla musu mɔgɔ lolɛ, anu dama wulita ka ta. Abigɛli mara Dawudala musi la.

⁴³Kɔnɔ kɛ ya a taran, Dawuda ara Ahinowan furu nun min bɔra Yɛsɛreli soe burɔ. Abigɛli fanan bara ma ala musi la.

⁴⁴ Kɔnɔ ala musi fɔlɔtɛ, Sɔlila den Mikali, Sɔli ya wo di Leyisala den Pati ma min bɔra Kalimu soe burɔ.