Read Kuranko 1 Samuwɛli 27 Bible Online

1 Samuwɛli 27 - Kuranko bible

1 Samuwɛli 27

¹Dawuda ya a fɔ a nyɛrɛ ma ko, “Tele-dande kɛ kɔrɔ, fɔ Mansa Sɔli kɛ wa n faga serr! Min fisa, n ni n buri tala Filisitinu bara la. Wo si a ma, Mansa Sɔli ni a bɔ n fɛ Isirɛla nyamanɛ kɛ rɔ, ado n si kanan worɔ.”

²Dawuda anubɛ ala keminɛ mɔgɔ kɛmɛ wɔrɛ (600) bɔra nyɔ ka ta Kati soe burɔ Mayokila den Akisi ye mansayɛ la kan min.

³Dawuda anubɛ ala keminɛnu anubɛ wonuta denbayɛnu sigira nyɔ anubɛ ala musi filɛ, Ahinowan min bɔra Yɛsɛreli anubɛ Nebalila musu tonɛ, Abigɛli, min bɔra Kamɛli soe burɔ.

⁴Mansa Sɔli ya a lamɔɛn tumɛ min ko Dawuda ara a buri ka ta Kati soe burɔ, a ya a fara a nyinɛ la.

⁵Dawuda ya a fɔ Mansa Akisi ye ko, “Ni n diyana-mɔgɛ le ile la, i ni so-nɛ do yira n na n si sigi kan min. Ka to i fɛ so-karantan kɛ rɔ, n ma kɔrɔ yen wo la.”

⁶Wulɔn tele rɔ, Akisi ya soe do yira a la min tɔgɛ Sikilagi. Woletɔ ka a fɔlɔ wo wati ma ha ka a sigi kaka la, Sikilagi ye Yuda mansɛnu bolo.

⁷San kelen karɛ nani, Dawuda siginɛ Filisitinuna nyamanɛ rɔ.

⁸Ka a fɔlɔ wo wati ma gbɛ, Dawuda anubɛ ala keminɛnu kɛnɛna tala buila Kɛsɔranu anubɛ Kirisanu anubɛ Amalɛkinu ma. Wonu bara mɛ sigini nyɔ nun. Dawuda anubɛ ala keminɛnu kɛnɛna tala anu gbenna ha Sura soe burɔ ha ka ta ke Iyipiti nyamanɛ rɔ fanan.

⁹Anu ba bui soe min ma, anu si keinu anubɛ musinu faga ka anuna kolo-fannu anubɛ anuna fɛrɛya-bɔɛnu bi. A wa bɔ kɛlɛ rɔ tuma-wo-tuma,

¹⁰Mansa Akisi si a manyinika ko, “I tara kɛlɛ kɛ mintɔ wara la nun kɛ rɔ?” Lunyɛ do, Dawuda si a fɔ a ye ko, “N tara kɛlɛ kɛ Yuda nyamanɛ dugula wara la le.” Lunyɛ do, a si a fɔ fanan ko, “N tara i yoge Yɛramɛlinu kɛlɛ tinɛ le.” Lunyɛ do fanan, a si a fɔ ko, “N tara i yoge Kenanu kɛlɛ tinɛ.”

¹¹A wa ta tuma-wo-tuma, kei wo, musi wo, a si anu dama faga tɛrr, alako mɔgɔ-den-kelen-bɛrɛn kana na to min si na a dantɛgɛ Kati mansɛ wo ye. Tuma-wo-tuma, Dawuda si to a mala wo nya na le Filisitinuna nyamanɛ rɔ.

¹²Mansa Akisi lara Dawuda la kosɛbɛ! A ya a miri a nyɛrɛ ma ko, “Bawo Dawuda ma di a wara-mɔgɛnu ye Isirɛla nyamanɛ rɔ, a si to wɔlila n ye a siyi-tele-bɛɛ rɔ.”