Read Kuranko 1 Samuwɛli 28 Bible Online

1 Samuwɛli 28 - Kuranko bible

1 Samuwɛli 28

¹Wati tenbinɛ, Filisitinu ya anuna kɛlɛ-dannu kundɛn kan-tina-kelen Isirɛla mɔgɛnu kan ma. Mansa Akisi ya a fɔ Dawuda ye ko, “I ya a lɔn wobɛ ila keminɛnu bi nde le dɛnbɛn tinɛ, nyɛ?”

²Dawuda ya a yabi ko, “Ɔn, ila wɔli-kɛlɛ le nde la, i si a yen n bi i dɛnbɛna nya min.” Mansɛ wo ya a fɔ a ye ko, “Nba, ile si ma n makandannɛ la gbɛ burubukai!”

³ Samuwɛli fagara tumɛ min nun, Isirɛla mɔgɛ bɛɛsi dira ala ko la le, ado anu ya a togon a halala soe Rema le burɔ. Kɔnɔ wo ya a taran, Mansa Sɔli ara bolo-tafɛlɛnnɛnu anubɛ yi-kɔrɔ-fɛlɛnnɛnu gben anuna nyamanɛ rɔ.

⁴Filisitinuna kɛlɛ-dannu ya anu daga makɛ Sunam soe dafɛ. Mansa Sɔli ya ata kɛlɛ-dannu Isirɛla mɔgɛnu fanan kundɛn ka anu daga makɛ Kilabowa kɔnkɛ kɔrɔ.

⁵Mansa Sɔli ya Filisitinuna kɛlɛ-dannu yen tumɛ min, a kilanta dɔgɔma-ma-de!

⁶ Woletɔ a ya Mari manyinika wola ko la. Kɔnɔ Mari ma sɔn a yabila kiyo rɔ anubɛ kuru filɛ wonu fɛ, Yurim anubɛ Tumin, kɔni, hali nɛbinu fɛ.

⁷Mansa Sɔli ya a fɔ ala mɔgɔ-banu ye ko, “Wo ni musi do nyini n ye min si yi-kɔrɔ-fɛlan kɛ. N ni ta wo manyinika.” Anu ya a fɔ ko, “Musi do ye Ɛndɔ soe burɔ. Wo si yi-kɔrɔ-fɛlan kɛ le.”

⁸Mansa Sɔli ya a nyɛrɛ-mafiliya-kurɛnu don a ma. Wulɔn suyi rɔ, anubɛ mɔgɔ fila tara musi wo wara. A ya a fɔ musi wo ye ko, “Yi-kɔrɔ-fɛlan kɛ n ye. Ni n ya furi min tɔgɛ ratɛgɛ, mabɛ wo le ye kumala ma nyɔgɔn na.”

⁹Musi wo ya a fɔ a ye ko, “Ile ma a lɔn Mansa Sɔli ara bolo-tafɛlɛnnɛnu anubɛ yi-kɔrɔ-fɛlɛnnɛnu gben Isirɛla nyamanɛ kɛ rɔ? A sɔgɛ ye i la, i ni n bole labira alako anu ni nde fanan faga?”

¹⁰Mansa Sɔli ya a keli Mari rɔ ka a fɔ ko, “Ni i ya wɔlɛ kɛ n ye, i ti tɔrɔya sɔrɔn wola ko la muk!”

¹¹Musi wo ya a manyinika, a ko, “A sɔgɛ le i la i ni kuma furi nyamintan na?” Mansa Sɔli ko, “Samuwɛli.”

¹²Musi wo ya Samuwɛli yen yi-kɔrɔ-fɛlan rɔ tumɛ min, a gbele-gbelenta. A ya a fɔ Mansa Sɔli ye ko, “Nfenna i wara n yanfa? Mansa Sɔli le ile la, yɔ!”

¹³Mansɛ wo ya a fɔ a ye ko, “Ni i wara min yen, wo fɔ. I kana kilan” Musi wo ya a fɔ a ye ko, “N bara lakira-mɔgɛ do yen. A ye bɔla dugi rɔ.”

¹⁴Mansa Sɔli ya a manyinika, a ko, “A manɛ kama?” Musi ya a fɔ a ye ko, “A kɛmɔgɔla munɛ le. Duruku-ba-wɛ donnɛ a kan na.” Mansa Sɔli ya a lɔn tumɛ min ko Samuwɛli le wo la, a ya a laburun a ma.

¹⁵Samuwɛli ya a fɔ Mansa Sɔli ye ko, “I ya n kele ka n yakɔrɔ-mamɔ nfenna?” Mansa Sɔli ya a fɔ a ye ko, “N bi kɔndɔfili-belebele le tɔ kɛ la kaka. Filisitinu bi ma kɛlɛla, ado Alla fanan bara n boloka. A sa n yabila nɛbinu fɛ anubɛ kiyo rɔ tun. Woletɔ n bara i kele alako i ni hɛnkili di n ma.”

¹⁶Samuwɛli ya a fɔ a ye ko, “Mari ara ile min boloka ka ma i yoge la, nfenna ile ye n manyinikala yan?

¹⁷ Mari ara min bɛɛsi fɔ n ye nun, n bara wonu fɔ i ye, ado Mari ara ban wonu mala. A ara mansayɛ bɔ i bolo ka a di Dawuda ma.

¹⁸ Ile ara Marita kumɛnu tinya bawo i ma sɔn Amalɛkinu anubɛ anu bolo-fannu nato-koe ma a rɔ. Woletɔ Mari ye nala kɛ mala i la gbɛ!

¹⁹A si wobɛ ila mɔgɛnu don Filisitinu bolo. Sina, wobɛ ila dannu si kofu n ma lakira, ado Mari si Isirɛla kɛlɛ-dannu don Filisitinu bolo.”

²⁰Tiriyante wo rɔ, Mansa Sɔli buira dugi ma ka a rasagan kilan bolo ka a tɛgɛ Samuwɛlila kuman-kan wo ma. A fɛrɛ rafagara a ma bawo su kelen tele kelen, a ma fen dɔn.

²¹Musi wo tara sɔ a dafɛ. A ya a yen ko a ara kilan kati! Musi wo ya a fɔ a ye ko, “Nde ara n niyi fili ila ko la ka ita kumɛ bira.

²²Nba, ile fanan ni i wɔlɔ matɔlɔ n na. N ni dɔn-fan do rabɛn ka a di i ma. Wo si a ma, i ni fanka sɔrɔn ila tagamala ko la.”

²³Kɔnɔ Mansa Sɔli ya a ban wo ma. A ko, “N ti fenfen dɔn kaka.” Kɔnɔ a tara mɔgɔ filɛ minnu na a bolo, wonu fanan ya a madiya fen-dɔn-koe rɔ. Tɔ-a-la, a sɔnta wo ma. A ya a lasɔ dugi ma ka a sigi sofa rɔ.

²⁴Kɔnɔ musi wo ya ala ninki-den-tɔlɔnɛ faga. A ya dɛgɛ-munke do bi ka wo ma biredi la kɔnɔ isiti sa a rɔ.

²⁵A nara dɔn-fan wo sigi Mansa Sɔli anubɛ mɔgɔ filɛ wonu kɔrɔ. Anu ya a dɔn. Anu ban a dɔnna, anu tara wulɔn suyi rɔ.