Read Kuranko 1 Samuwɛli 29 Bible Online

1 Samuwɛli 29 - Kuranko bible

1 Samuwɛli 29

¹Filisitinu ya anuna kɛlɛ-dannu nadɛn soe do dafɛ min tɔgɛ Afɛki. Isirɛla kɛlɛ-dannu ya anu daga makɛ tenke do dafɛ Yɛsɛreli lɛɛ wara la.

²Filisitinuna mansa lolɛ tara anuna kɛlɛ-dannu na kɛmɛ-kɛmɛyɛ ma anubɛ waga-wagayɛ ma. Kɔnɔ Dawuda anubɛ ala keminɛnu, wonu bilanɛ Filisitinuna kɛlɛ-dan wonu kɔma kilɛ la Mansa Akisi fɛ.

³Filisitinuna kɛlɛ-kurugbɛnu ya Dawuda anubɛ ala keminɛnu yen tumɛ min, anu ya a fɔ ko, “Hiburu kɛnu damasi ye nfen mala yan tɔ?” Mansa Akisi ya a fɔ anu ye ko, “Dawuda le kɛ la min bi kun-tigiyɛ la nun Isirɛla mɔgɛnu na Mansa Sɔli kɔrɔ. A ara mɛ n fɛ kosɛbɛ! Ka a bi a na-wati ma ha ka a sigi kaka la, n ma fɛɛ-wo-fɛɛ yen a la.”

⁴Kɔnɔ hali wo, Filisitinuna kɛlɛ-kurugbɛnu diminyara Mansa Akisi ma. Anu ya a fɔ a ye ko, “A lasɛgi a kɔma a wara-soe burɔ, i wara kan tinɛ min yira a la. I kana sɔn, a ni kofu ma ma kɛlɛ rɔ. Tumado a ye a ya-lamununna male la ka ma lato. Bawo ni ale ya ma faga, wo si a ma, a ni diya ala kun-tigi ye tun.

⁵ I ya a lɔn serr, musinu bi Dawuda kɛ le sigi sala ka anu dɔn. Anu bi a fɔla ko, ‘Sɔli ara mɔgɔ waga siyaman faga kɔnɔ Dawuda ara mɔgɔ waga tan siyamɛ faga.’ ”

⁶Mansa Akisi ya Dawuda kele. A ya a fɔ a ye ko, “N bara n keli Isirɛla mɔgɛnuta Alla-nimɛ rɔ ko mɔgɔ-latelennɛ le ile la nde ye. Ka bila n fɛ kɛlɛ rɔ, n si sewa wo la nun, ado kebi i nara n barɛ, n ma fɛɛ-wo-fɛɛ yen i la. Kɔnɔ n ta-nyɔgɔ-mansɛnu, wonu ma sɔn i bila-koe rɔ ma fɛ.

⁷Woletɔ sɛgi i kɔma yisi-kimɛ rɔ, ado i kana ko-wo-ko ma min si anu yisi tɔrɔ anu ma.”

⁸Dawuda ya a fɔ a ye ko, “N fa, n bara nfen ko-yogoma ma? Ka na a fɔ, ni tonyɛ le, i ma fɛɛ yen n na kebi fɔlɔ, nfenna n ti ta i yogenu kɛlɛ worɔ? Bawo n tigi le i la, ado nna mansɛ le ile le la.”

⁹Mansa Akisi ya a fɔ a ye ko, “I wara min bɛɛsi fɔ, n bara sɔn wonu ma. I latelennɛ le nde yala iko Allata melika. Kɔnɔ hali wo, n ta-nyɔgɔ-mansɛnu ko i kana bila ma fɛ kɛlɛ rɔ.

¹⁰Woletɔ bandɛ wa ka sina, wobɛ ila keminɛnu ni suru tala.”

¹¹Bandɛ kanɛ, Dawuda anubɛ ala keminɛnu suruta sɛgila anu kɔma Filisitinuna nyamanɛ rɔ. Anuna kɛlɛ-dan wonu tora tala Isirɛla nyamanɛ magbenna Yɛsɛreli lɛɛ wara la.