Read Kuranko 1 Samuwɛli 30 Bible Online

1 Samuwɛli 30 - Kuranko bible

1 Samuwɛli 30

¹Dawuda anubɛ ala keminɛnu bi Mansa Akisi fɛ wati min, Amalɛkinu nara bui Yuda nyamanɛ dugula-waralɛ ma ka bui Dawudala soe Sikilagi ma ka a mintan ka anuna musi bɛɛ bira. Anu ma mɔgɔ-wo-mɔgɔ faga kɔnɔ anu tara anu bɛɛsi la anu bolo le. Tele fila a sawa nyɔgɛ,

³Dawuda anubɛ ala keminɛnu kera Sikilagi soe burɔ. Anu ya a taran, Amalɛkinu bara anuna soe mintan ka ta anuna dannu anubɛ anuna musinu na anu bolo.

⁴Dawuda anubɛ ala keminɛnu dira furr, ha anu bandanta.

⁵ Hali Dawudala musi filɛ Ahinowan anubɛ Abigɛli, kɛlɛ tara le wonu fanan na.

⁶Dawudala keminɛnu yisi tinyanta anuna denbayɛnuna ko la ha Dawuda-mabon-sɔgɛ ya anu bira. Dawuda ye yakɔrɔ-mamɔɛ wo rɔ kɔnɔ hali wo, ata Mari Alla ya sɛnbɛ di a ma.

⁷ Dawuda ya a fɔ Ahimɛlɛkila den Saraka-Masɔla Abiyatari ye ko, “Na saraka-masɔ-fɔlɔnfalan la n ye alako n si Alla sako lɔn nya min.” Wo nara wo don a bolo.

⁸Dawuda ya Mari manyinika, a ko, “N ni mɔgɛ kɛnu sagaran, ba? N si anu nasɔrɔn?” Mari ya a fɔ a ye ko, “Ta, i si ke anu tɔ. Anu bara ila mɔgɛ minnu bɛɛsi bira, wo si wonu kunka.”

⁹Dawuda anubɛ ala keminɛ mɔgɔ kɛmɛ wɔrɛ (600) wulita ka ta. Anu kera yi do ma min tɔgɛ Bɛsɔri, a ya mɔgɔ kɛmɛ fila (200) to nyɔ bawo wonu bara bandan. Anubɛ mɔgɔ kɛmɛ nanɛ (400) tara Amalɛkinu sagaranna.

¹¹Kɔnɔ Dawudala keminɛ donu ya Iyipiti keminɛ do yen binyɛ rɔ. Tele sawa dɛgɛdɛgɛ, Iyipiti keminɛ wo ma fenfen dɔn hali ka a min. Anu tara wo don ale Dawuda bolo. Anu ya yi di a ma ka a de-nyini toro-gbɔ-gbalanɛ anubɛ nɔnbɔ-gbɔ-gbalanɛ tɔnsɔn fila la. A ban wonu dɔnna, a ragbɛlɛyara.

¹³Dawuda ya a manyinika, a ko, “Ile bɔra mi? Ila kun-tigi ye yon na?” Keminɛ wo ya a fɔ a ye ko, “Iyipiti kɛ le nde la. N bi yɔɔnyɛ le la Amalɛki kei do kɔrɔ. N kirɛ le nun woletɔ anu ya n boloka kilɛ la. A tele sawɛ le kɛ la gbɛ, n bi n nyɛrɛ ma.

¹⁴Ma tara bui Kɛrata mɔgɛnu ma minnu bi Yuda nyamanɛ dugula wara la. Wo kɔma, ma tara bui Kelabu kegeyɛnu ma ka Sikilagi soe mintan.”

¹⁵Dawuda ya keminɛ wo manyinika, a ko, “Minnu tara bui soe kɛnu ma, i ti mɔgɛ wonu yira n na?” Keminɛ wo ya a fɔ a ye ko, “N si a ma kɔnɔ fɔ i wa i keli n ye Alla la, ni i ti n faga, ni wo ma, ka n don nna kun-tigi bolo tun.”

¹⁶A ya anu tina yira Dawuda la. Dawudanu ya a taran, anu tanyɛnsɛnnɛ anuna dagɛ rɔ. Anu bi gbɛɛ-minyɛ anubɛ fen dɔn kun na sewɛ rɔ ka a tɛgɛ fen-kolomɛ wonuna ko ma anu ya minnu bira Filisitinu anubɛ Yuda nyamanɛ rɔ.

¹⁷Anu wulita anu kɛlɛla ha wo wulɔn-sɔgɔma-wurɛ la. Amalɛki wonuna kɛlɛ-dannu kunyɛ ma bɔ a rɔ fɔ kemini mɔgɔ kɛmɛ nani (400) minnu sigira nyomɛnu na, wonu denu dɔrɔn kunyɛ bɔra a rɔ.

¹⁸Dawudanu ya anuna mɔgɛnu anubɛ anuna bolo-fannu kunka Amalɛki bolo, katarala Dawudala musu filɛ wonu ma.

¹⁹Anuna mɔgɛnu fenfen kunyɛ ma to-a-rɔ hali anu bolo-fannu.

²⁰Anu ya Amalɛkinuna kolo-fannu bi. Anu tara kolo-fan wonu nagbengbenna. Anu bi a fɔla ko, “Dawudatɛ le kolo-fan kɛnu na gbɛ!”

²¹Anu ke Bɛsɔri yi ma, Dawuda ya ala keminɛ mɔgɔ kɛmɛ filɛ (200) bandannɛ to kan min, wonu ya anu buri tala Dawuda anubɛ ala keminɛ doi wonu nabɛnna. Dawuda fanan ya anu kɔndɔn a kin na!

²²Kɔnɔ tinya-batoe anubɛ karagbɛlɛ donu bi Dawuda fɛ. Wonu ya a fɔ ko, “Ma ara na bolo-fan minnu na kɛ la, kɛnu ti fenfen sɔrɔn wonu tɔ bawo anu ma sɔn bilala ma fɛ. Anu ni anuna denbayɛnu denu dɔrɔn bi, anu ni ta.”

²³Dawuda ya a fɔ anu ye ko, “N bɔnu, Mari ara fan minnu di ma ma, ma kana wo ma wo nya. Mari ara ma latanka ka ma yogenu don ma bolo.

²⁴Wole ara min fɔ kɛ la, mɔgɔ-wo-mɔgɔ ti sɔn wo ma. Minnu tora mala dunɛnu fɛ yan wo, minnu tara wo, ma ya fan min bɛɛsi sɔrɔn kɛlɛ rɔ, ma bɛɛsi rakɛn de wo rɔ.”

²⁵Dawuda ya wo ma tɔn la. Ka a bi wo wati ma ha ka a sigi kaka la, tɔn wo ye Isirɛla nyamanɛ rɔ.

²⁶Dawudanu ke anu barɛ Sikilagi soe burɔ, anu ya fen-kolomɛ minnu sɔrɔn kɛlɛ rɔ, a ya a diyana-mɔgɛnu kɔ wonu tɔ minnu bi kun-tigiyɛ la Yuda nyamanɛ rɔ. A ya wonu nata minnu ma, a ko, “Ma ya sanbɛ minnu bi Mari yogenu bolo, wo le kɛnu na.”

²⁷A ya do lata Bɛtɛli mɔgɔ-banu ma. Rema min bi Yuda nyamanɛ dugula wara la, a ya do lata nyɔ-mɔgɔ-banu ma. A ya do lata Yatiri

²⁸anubɛ Arɔra mɔgɔ-banu ma. Wo kɔma, a ya do lata Sifimɔti anubɛ Ɛsitɛmowa

²⁹anubɛ Rakali mɔgɔ-banu ma. Wo kɔma fanan, a ya do lata Yɛramɛlinu anubɛ Kenanu ma.

³⁰Wo kɔma fanan, a ya do lata so-dande kɛ mɔgɔ-banu ma, Hɔrima soe anubɛ Bɔrasan soe anubɛ Ataki soe

³¹anubɛ Hiburɔn soe. Anubɛ ala keminɛnu ya anu kian sɔ kan tinɛ min bɛɛ rɔ, a ya nyɔ-mɔgɔ-banu kɔ.