Read Kuranko 1 Samuwɛli 31 Bible Online

1 Samuwɛli 31 - Kuranko bible

1 Samuwɛli 31

¹Filisitinu anubɛ Isirɛla mɔgɛnu ya kɛlɛ dabira Kilabowa kɔnkɛ kuma. Isirɛla mɔgɔ-siyaman fagara nyɔ rɔ. A toenu ya anu buri. Mansa Sɔli anubɛ ala dannu fanan ya anu buri.

²Kɔnɔ Filisitinu ya anu nasɔrɔn ka ala den mɔgɔ sawɛ faga, Yonatan wo, Abinadabu wo, anubɛ Malikisuwa.

³Kɛlɛ gbiliyara Mansa Sɔli kuma. A yogenuna kalabɛn bɛnta a la. A tanban boloko-yogomɛ-kɛra.

⁴A ya a fɔ ala kɛlɛ-miran-madununɛ ye ko, “Ila faan sagan a rɔ. I ni n faga alako Filisiti-kemininyabɛlɛ kɛnu kana na anu diya n faga-koe la ka n mɔnima-fagɛ-kɛ.” Kɔnɔ keminɛ wo kilanta a faga-koe ma. Mansa Sɔli nyɛrɛ-nyɛrɛ ya ala faan bi ka wo sɔ dugi ma. A ya a burun faan wo sun na.

⁵Ala keminɛ wo ya a yen min kɛ Mansa Sɔli ara faga, ale fanan ya ala faan sɔ dugi ma ka a burun wo sun na. Ale fanan fagara.

⁶Mansa Sɔli anubɛ ala den mɔgɔ sawɛ anubɛ ala kɛlɛ-miran-madununɛ fagara wo nya na le wulɔn tele kelan. Ala mansaya-bɔn latogonta.

⁷Isirɛla mɔgɛ minnu siginɛ Yorodan bɛ kɔgɔma tele-bɔɛ wara la anubɛ Yɛsɛreli lɛɛ rɔ, wonu ya a lamɔɛn ko Mansa Sɔli anubɛ ala dannu bara faga anubɛ ko Mansa Sɔlila kɛlɛ-dannu bara anu buri, anu denu fanan ya anu buri ka anuna soenu boloka. Wo kɔma, Filisitinu nara sigi anuna soe wonu tɔ.

⁸Kɛlɛ banta lunyɛ min, wo banda kɛ, Filisitinu tara furi wonuna kɛlɛ-mirannu kankan tinɛ. Anu tara anu nabɔ Mansa Sɔli anubɛ ala den sawɛ furi ma Kilabowa kɔnkɛ kuma.

⁹Anu ya Mansa Sɔli kunyɛ tɛgɛ a la ka ala kɛlɛ-mirannu bɔ a ma. Filisitinu ya wonu bi ka ta wonu na anu bolo ka kumɛ wo fɔ anuna bɛsi-kɔ-tinɛnu na anubɛ Filisiti mɔgɛ bɛɛ ye.

¹⁰Anu ya ala kɛlɛ-miran wonu sa anuna bɛsi Asitɔra kɔ tinɛ. Anu ya anubɛ ala furi gbangban dandan ma Bɛti-San soe burɔ.

¹¹Filisitinu ya min ma Sɔli furi la, mɔgɛ minnu siginɛ Yebɛsi soe burɔ Kaliyadi nyamanɛ rɔ, wonu ya kɛ lamɔɛn min kɛ,

¹²wonuna kɛlɛ-kurugbɛ minnu kerinte, wonu kira tagamana ka ta Bɛti-San soe burɔ. Anu tara Sɔli anubɛ ala dannu bi dandan wo ma nyɔ ka ta anu na anu bolo anu barɛ Yebɛsi soe burɔ. Anu ya anu furinu mintan nyɔ.

¹³Anu ya anu kolenu bi ka ta anu togon kɔlɔma-kuru-wɛ do kɔrɔ Yebɛsi soe wo burɔ. Tele wɔrɔnfila, anu bi sunyɛ rɔ.