Read Kuranko 1 Samuwɛli 9 Bible Online

1 Samuwɛli 9 - Kuranko bible

1 Samuwɛli 9

¹Kei-malɔnnɛ do ye Bɛnyamɛ bɔnsɔn rɔ, ado fen bi a bolo fanan. A tɔgɛ le Kisa. A fa tɔgɛ le Abayɛli. A benba tɔgɛ le Sirɔri. Sirɔri wo fanan fa tɔgɛ le Bɛkɔrati. Bɛkɔrati wo fanan fa tɔgɛ le Afiya. Afiya kɛ, Bɛnyamɛ kegeyɛ do le ale la.

²Kisa wola dan do ye nyɔ min tɔgɛ Sɔli. Sɔli kɛ, kemini-hakikɛ le, ado Isirɛla mɔgɛ bɛɛ dan le a kanban-kunyɛ la. A kin fanan.

³Kisala sofɛlɛ donu bara ta anu kun fɛ binyɛ rɔ! A ya a fɔ ala den Sɔli ye ko, “Wɔli-kɛlɛ do bi. Wobɛ wo ni ta nna sofɛlɛnu nyini tinɛ binyɛ rɔ pon!”

⁴Sɔli anubɛ wɔli-kɛlɛ wo tara sofɛlɛ wonu nyinina Ifɛrɛmta kɔnkɔ-nyamanɛ rɔ. Anu tara furr, fɔɔ Salisa nyamanɛ rɔ kɔnɔ anu ma sofɛlɛ wonu yen. Anu tara anu nyinina fanan furr, fɔ Salim nyamanɛ rɔ kɔnɔ anu ma anu yen nyɔ fanan. Anu tara Bɛnyamɛta nyamanɛ fanan korobo-karaba[7] kɔnɔ anu ma sofɛlɛ kɛnu yen.

⁵Anu ke Sufa nyamanɛ rɔ, Sɔli ya a fɔ wɔli-kɛlɛ wo ye ko, “Ma sɛgi ma kɔma. Tumado n fa hɔnni ma sofɛlɛnu kuma tun. A hɔnnɛ male le kuma gbɛ!”

⁶Wɔli-kɛlɛ wo ya a fɔ ko, “A makɔnɔ fɔlɔn. Nɛbi do ye yan mɔgɛnu bi min gbiliyala bawo a ya kuma-wo-kuma fɔ, wo si bɔ-a-la. Ma ta wo wara. Tumado ale si sofɛlɛ wonu tina yira ma la.”

⁷Sɔli ya a fɔ a ye ko, “Ni ma tara kei wo wara, ma si nfen di a ma, ado mala dɔn-fannu bara ban mala bɔrɛnu tɔ? Fen-gbɛrɛkɛ ye nyɔ ma si min di a ma, wa?”

⁸Wɔli-kɛlɛ wo ya a fɔ a ye ko, “Wodi-gbɛ-gbuni bi n bolo yan. N si wo di a ma. Tumado sofɛlɛ wonu bi kan min, ale si nyɔ yira ma la.”

⁹Sɔli ya a fɔ a ye ko, “Tonyɛ le wo la. Ma ta.” Anu tara soe burɔ, nɛbi wo ye kan min. Anu bi so-kɔnkɛ yɛlɛla tumɛ min, anu bɛnta sunkurunnɛ donu na minnu bi tala yi-bi-tinɛ. Anu ya sunkurunnɛ wonu manyinika ko, “Ko-rayennɛ wo ye soe burɔ, wa?” (Wo wati rɔ, anu si nɛbinu kele ko, “Ko-rayennɛ.” Ni Alla-manyinika-sɔgɛ ye mɔgɛ do la, a si a fɔ ko, “Ma ni ta ko-rayennɛ wara.”)

¹²Sunkurunnɛ wonu ya a fɔ ko, “Ɔn, a ye nyɔ rɔ. A sa wula la. A ye wo yarɔ. Ni wo ya wo kian bi, wo si ke a rɔ. Wo ye donna soe burɔ nya min, wo ye a yenna le! A nara soe burɔ bi le bawo mɔgɛnu bi anuna sarakɛnu bɔla le bi saraka-mintan-tinɛ kɔnkɛ kuma. Mɔgɔ-wo-mɔgɔ ti fen-dɔn-kɛ fɔ ale wa ke nyɔ bawo ale le ye sarakɛ wonu duwala. Ni wo ya wo kian bi, tumado wo si a taran, yanni a ni yɛlɛ kɔnkɛ kuma fen dɔn tinɛ.”

¹⁴Sɔli anubɛ ala wɔli-kɛlɛ ya kɔnkɛ wo yɛlɛ ka ta soe burɔ. Anu ke soe burɔ, anu ya Samuwɛli yen nala anu bara la. A ye yɛlɛla kɔnkɛ kuma saraka-bɔ-tinɛ.

¹⁵Kɔnɔ yanni anu ni ke nyɔ, wo ya a taran, Mari ara kuma Samuwɛli ye nun. A ko,

¹⁶“Kɛ-nyɔgɔn-tumɛ sina, n si kei do lana i ma min bɔnɛ Bɛnyamɛ bɔnsɔn rɔ. I ni dantɛgɛ-tuli kɛ a kunyɛ rɔ ka ale dantɛgɛ n ma. A si ma Isirɛla mɔgɛnuna mansɛ la. N bara nta mɔgɛnuta tɔrɔyɛ yen, ado anu bi dila n dala anu dɛnbɛn-koe rɔ. Ale kei wo si anu natanka Filisitinuna masibɛ ma.”

¹⁷Samuwɛli ya Sɔli yen tumɛ min, Mari ya a fɔ a ye ko, “N ya min bara-koe fɔ i ye nun, wo le kɛ la, yɔ! Ale si ma nta mɔgɛnuna mansɛ la.”

¹⁸Sɔli tara ke Samuwɛli ma tarɛ burɔ. A ya a fɔ a ye ko, “N fa, ko-rayennɛla bɔn ye mintɔ yan?”

¹⁹Samuwɛli ya a fɔ a ye ko, “Wo le nde la, yɔ! Wo ta n yarɔ kɔnkɛ kuma saraka-bɔ-tinɛ. Mabɛ wo le ye fen dɔn kɛla wona kan-tina-kelen bi. Sina sɔgɔma, n si wo yabi. Wo ni na to tala.

²⁰Ka a tɛgɛ wola sofɛlɛnu bara-koe ma minnu tununɛ tele sawa nyɔgɛ la bi, wo kana hɔn wonuna ko la. Anu bara yen. Kɔnɔ Isirɛla mɔgɛnu bi nyinina yon ma bi, ni wolebɛ i fala denbayɛnu ma?”

²¹Sɔli ya a fɔ ko, “Bɛnyamɛ bɔnsɔn min dɔgɔ Isirɛla bɔnsɔn bɛɛ ko, wo mɔgɛ do le nde la. Nde bɔra kebilɛ min tɔ, a dɔgɔmɛ le wo la Bɛnyamɛ bɔnsɔn rɔ. Nfenna i ye kumɛ kɛ sufa fɔla nde ye?”

²²Samuwɛli sɔra Sɔli anubɛ ala wɔli-kɛlɛ wo yarɔ. A tara anuna bon-bɛ do la. Anu ya a taran, mɔgɔ bi-sawa nyɔgɔn siginɛ tebulu la nyɔ. A ya anu denu ma mɔgɛ wonu kunyɛ la fen dɔn tinɛ.

²³Samuwɛli ya a fɔ fen-telɛ ye ko, “N ya soge min don i bolo, n ko i ni a lamara a dan na, na wo la.”

²⁴Wo nara a woro-sogo-kundu-hakikɛ wo la ka wo sa Sɔli kɔrɔ. Samuwɛli ya a fɔ Sɔli ye ko, “N ya sogo-kundu-hakikɛ min sigi i yarɔ, i ma wo yen? A dɔn bawo n bi mɔgɛnu kelela wati min ka na fen dɔn tinɛ, n ya kɛ lamara ile le ye ladiyɛ kɛ kuma.” Sɔli anubɛ Samuwɛli ya anu de-nyini kan-tina-kelen wulɔn.

²⁵Anu bɔra nyɔ tumɛ min ka kɔnkɛ yigi ka ta soe burɔ Samuwɛli warɛ bɔn la, anu ya sa tinɛ rabɛn bɔn kuma.[8] Sɔli kira sani nyɔ ha bandɛ kara.

²⁶Bandɛ kanɛ, Samuwɛli ya Sɔli takele bɔn kuma, a ko, “I lakɔɛnma. N ni i masara.” Sɔli ya a lasɔ. Anubɛ Samuwɛli bɔra dɛ la anu nyɔgɔn fɛ.

²⁷A ke so laban la, Samuwɛli ya a fɔ Sɔli ye ko, “A fɔ ila wɔli-kɛlɛ ye, a ni ta ma yarɔ doni.” Wo tara. Samuwɛli ya a fɔ a ye tun ko, “Ile ni n makɔnɔ doni. Alla ara min fɔ n ye, n ni wo fɔ i ye.”