Read Мьзгини, 2011 Р’омайи 7 Bible Online

Р’омайи 7 - Мьзгини, 2011 bible

Р’омайи 7

¹ Һун р’ьнд фә’м дькьн хушк-бьрано, әзе ньһа дәрһәqа чьда wәр’а хәбәр дьм, чьмки әз т’әви wан хәбәр дьдьм, йед кӧ һаш жь qануне һәнә: Qанун сәр мерьв һаqас wәхт һ’ӧкӧм дькә, һ’әта кӧ мәрьв сах ә.

²Мәсәлә, жьна меркьри бь qануне мере хwәйи сахва гьредайи йә, ле һәгәр мер ле дьмьрә, әw һьнге жь wе qануна кӧ мерва гьредайи бу аза дьбә.

³Аwа һәгәр мере wе һе сах бә әw бьбә жьна мерәки дьн, wе зьнек’ар бе һ’әсабе, ле һәгәр мер ле бьмьрә, әw жь wе qануне аза дьбә у зьнек’ар набә, һәгәр бьбә жьна мерәки дьн.

⁴Ӧса жи һун хушк-бьрайед мьн, бь бәдәна Мәсиһ һьндава Qанунеда мьрьн, кӧ бьбьнә п’ара йәки дьн, Йе кӧ жь мьрьне р’абуйә, wәки һун Хwәдер’а бәр биньн.

⁵Чьмки гава мә һе бь бьнйат’а мәрьвайе дьжит, тәме гӧна, кӧ жь Qануне сәри һьлдьдан, нава qальбед мәда йа хwә дькьрьн, кӧ әм бәре мьрьне бьдьн.

⁶Ле ньһа әм һьндава Qанунеда мьрьн, жь wе хьлаз бун, бь к’ижане әм гьрти бун, кӧ әм бь жийина нуйә р’ӧһ’ани хӧламтийе Хwәдер’а бькьн, нә кӧ бь р’ийа Qануна ньвисар.

⁷ Аwа әм чь бежьн? Гәло Qанун гӧнә йә? На хер! Ле бәле мьне гӧнә нас нәкьра, һәгәр Qануне нибуйа. Мәсәлә, дьлһавьжи жи мьне ньзаньбуйа гӧнә йә, һәгәр Qануне нәготьбуйа: «Дьлһавьжийе нәкә» [#633].

⁸Ле гӧнә жь т’әмийе мәщал станд, нава мьнда һәр щур’ә дьлһавьжи пешда анин. Чьмки бе qанун гӧнә мьри йә.

⁹Әз хwәха wәхтәке бейи qанун сах бум, ле гава т’әми гьһиштә мьн, гӧнә сах бу

¹⁰у әз мьрьм. Әw т’әмийа кӧ wе жийин бьда мьн, һәма әw жи бу сәбәбе мьрьна мьн.

¹¹Чьмки гӧнә жь т’әмийе мәщал станд әз хапандьм у бь wе кӧштьм.

¹² Аwа Qанун пироз ә у т’әмийа wе пироз, р’аст у qәнщ ә.

¹³Wәки ӧса йә йа qәнщ мьнр’а бу мьрьн? На хер! Ле әв кьре гӧнә бу, кӧ бь йа qәнщ мьрьн сәр мьнда ани. Әв йәк аһа бу, wәки һ’ӧнӧре гӧнә к’ьфш бә у бь т’әмийе һе гӧнәк’арийа гӧнә к’ьфш бә.

¹⁴ Бәле әм заньн кӧ Qанун р’ӧһ’ани йә, ле әз хун у гошт ьм, хӧламәки гӧнәр’а фьроти.

¹⁵Чьмки әз фә’м накьм чь дькьм. Нә кӧ wи тьшти дькьм, чь кӧ дьхwазьм, ле wи тьшти дькьм, чь кӧ бәр ч’ә’ве мьн р’әш ә [#634].

¹⁶Ле һәгәр әз тьште нә бь дьле хwә дькьм, Qанунер’а qайл ьм, кӧ әw qәнщ ә.

¹⁷Ле аwа нә кӧ әз wе йәке дькьм, ле бәле гӧне кӧ нава мьнда дьминә дькә.

¹⁸Әз заньм кӧ нава мьнда, аwа готи бьнйат’а мьнда, т’ӧ тьште qәнщ наминә, чьмки хирәта мьн qәбул накә, ле әw йәк мьнр’а ль һәв найе.

¹⁹Бәле wе qәнщийа кӧ дьхwазьм бькьм накьм, ле хьрабийа кӧ нахwазьм wе дькьм.

²⁰Һәгәр әз wи тьште нә бь дьле хwә дькьм, иди нә кӧ әз дькьм, ле әw гӧне кӧ нава мьнда дьминә, әw дькә.

²¹ Аwа әз qанунәке дьбиньм: Гава дьхwазьм кӧ qәнщийе бькьм, бе һ’әмде мьн дьбә хьраби.

²²Әз бь к’урайийа дьле хwә qануна Хwәде бәгәм дькьм,

²³ле qанунәкә дьн нава хwәда дьбиньм кӧ мьqабьли wе qануна һ’ьше мьн бәгәм кьрийә дькә шәр’ у мьн дькә һесире qануна гӧна, йа кӧ нава мьнда йә.

²⁴Әз чь мәрьвәки һесир-бәләнгаз ьм! К’и wе мьн жь дәсте ви qальбе п’уч’и-мьри хьлаз кә?

²⁵(Шькьр жь Хwәдер’а, бь сайа Хӧдане мә Иса Мәсиһ!)Бь ви аwайи әз хwәха бь һ’ьш-аqьле хwә хӧламтийе qануна Хwәдер’а дькьм у бь qальбе хwә хӧламтийе qануна гӧнар’а дькьм.