Read Kurmanji Încîl Destpêk 11 Bible Online

Destpêk 11 - Kurmanji Încîl bible

Destpêk 11

¹Di destpêkê de zimanê hemû mirovên dinyayê yek bû û wek hev dipeyivîn.

²Gava ber bi rojhilat ve koç kirin, li herêma Şînarê deştek dîtin û li wir cîwar bûn.

³Wan ji hev re got: «Werin em kelpîçan çêkin û baş bipêjin.» Di cihê keviran de kelpîç û di cihê xercê de jî ziftê bi kar anîn.

⁴Piştre gotin: «Werin em ji xwe re bajarekî ava bikin û birceke bigihîje ezmanan çêkin ku nav û dengê me derkeve û em li tevahiya rûyê erdê belav nebin.»

⁵Xudan daket jêr, ji bo ku bajêr û birca mirovan çêdikirin bibîne.

⁶Xudan got: «Va ye, ew miletek in û zimanê wan hemûyan yek e û ev bi tenê destpêka kirinên wan e. Êdî tu tiştê ku bixwazin bikin ji wan re nabe zehmet.

⁷Werin, em dakevin jêr, zimanên wan tevlihev bikin ku ji hev fêm nekin.»

⁸Îcar Xudan ew ji wir li ser tevahiya rûyê erdê belav kirin û wan dev ji avakirina bajêr berda.

⁹Ji ber vê yekê ji bajêr re «Babîl»[22] hat gotin. Çimkî Xudan li wir zimanên hemû mirovan tevlihev kirin. Ji wir ew bi ser tevahiya rûyê erdê ve belav kirin.

¹⁰Qeyda ziriyeta Sam: Du sal piştî tofanê, gava Sam sed salî bû, kurê wî Arpexşad çêbû.

¹¹Piştî ku Sam bû bavê Arpexşad, ew pênc sed salên din ma û bû bavê kur û keçên din.

¹²Gava Arpexşad sî û pênc salî bû, kurê wî Şelah çêbû.

¹³Piştî ku Arpexşad bû bavê Şelah, ew çar sed û sê salên din ma û bû bavê kur û keçên din.

¹⁴Gava Şelah sî salî bû, kurê wî Êver çêbû.

¹⁵Piştî ku Şelah bû bavê Êver, ew çar sed û sê salên din ma û bû bavê kur û keçan.

¹⁶Gava Êver sî û çar salî bû, kurê wî Pêlêg çêbû.

¹⁷Piştî ku Êver bû bavê Pêlêg, ew çar sed û sî salên din ma û bû bavê kur û keçên din.

¹⁸Gava Pêlêg sî salî bû, kurê wî Reû çêbû.

¹⁹Piştî ku Pêlêg bû bavê Reû, ew du sed û neh salên din ma û bû bavê kur û keçên din.

²⁰Gava Reû sî û du salî bû, kurê wî Serûg çêbû.

²¹Piştî ku Reû bû bavê Serûg, ew du sed û heft salên din ma û bû bavê kur û keçên din.

²²Gava Serûg sî salî bû, kurê wî Nahor çêbû.

²³Piştî ku Serûg bû bavê Nahor, ew du sed salên din ma û bû bavê kur û keçên din.

²⁴Gava Nahor bîst û neh salî bû, kurê wî Têrah çêbû.

²⁵Piştî Nahor bû bavê Têrah, ew sed û nozdeh salên din ma û bû bavê kur û keçan.

²⁶Têrah di heftê saliya xwe de bû bavê Avram, Nahor û Heran.

²⁷Qeyda ziriyeta Têrah ev e: Têrah bû bavê Avram, Nahor û Heran. Heran bû bavê Lût.

²⁸Heran, gava bavê wî Têrah sax bû, li bajarê Ûra Kildaniyan ku lê çêbûbû, mir.

²⁹Avram û Nahor zewicîn. Navê jina Avram Seray û navê jina Nahor jî Mîlka bû. Mîlka û Yîska keçên Heran bûn.

³⁰Seray bêber bû, zarokên wê tunebûn.

³¹Têrah malbata xwe hilda, ji Ûra Kildaniyan derket û berê xwe da riya welatê Kenanê. Pê re kurê wî Avram, bûka wî Seraya jina Avram, neviyê wî Lûtê kurê Heran hebû. Ew gihîştin Heranê û li wir bi cih bûn.

³²Têrah du sed û pênc sal kir û li Heranê mir.