Read Kurmanji Încîl Destpêk 12 Bible Online

Destpêk 12 - Kurmanji Încîl bible

Destpêk 12

¹Xudan ji Avram re got: «Dev ji welatê xwe, ji gelê xwe û ji mala bavê xwe berde û here wî welatê ku ezê nîşanî te bidim.

²«Ezê te bikim miletekî mezin û te pîroz û bereket bikim. Ezê nav û dengê te derxim û tê bibî kaniya bereketê.

³Kesên te pîroz bikin, ezê jî wan pîroz bikim. Kesê ku nifiran li te bike, ezê naletê lê bînim. Wê hemû eşîrên dinyayê bi te pîroz bibin.»

⁴Avram, çawa ku Xudan jê re gotibû da rê û çû. Lût jî pê re çû. Gava Avram ji Heranê derket heftê û pênc salî bû.

⁵Wî bi xwe re Seraya jina xwe, Lûtê biraziyê xwe, hemû malê xwe yê qezenckirî û xulamên xwe yên ku li Heranê bi dest xistibûn, birin. Berê xwe dan welatê Kenanê û gihîştin wir.

⁶Avram di welêt de digeriya, heta ber darberûya Moreyê ya li Şexemê çû. Wan rojan Kenanî li wê derê dijiyan.

⁷Xudan li Avram xuya bû got: «Ezê vî welatî bidim ziriyeta te.» Avram li cihê ku Xudan lê xuya bû gorîgehek çêkir.

⁸Avram ji wir derbasî herêma çiyayî bû ku dikeve rojhilatê bajarê Bêt-Êlê. Li wir konê xwe danî. Li rojavayê wir bajarê Bêt-Êlê, li rojhilatê wir jî bajarê Ayê hebû. Wî li wir gorîgehekê çêkir û bi navê Xudan gazî kir.

⁹Avram gav bi gav ber bi Negeva başûr ve diçû.

¹⁰Ji ber xelaya giran a li welêt, Avram ji bo demekê çû Misrê.

¹¹Gava wê biketana Misrê, ji Seraya jina xwe re got: «Ez dizanim ku tu jineke xweşik î.

¹²Dibe ku Misrî te bibînin û bêjin: ‹Ev jina wî ye.› Wê min bikujin û te sax bihêlin.

¹³Loma bibêje: ‹Ez xwişka wî me.› Wisa jî ji bo xatirê te bi min qencî bikin û min sax bihêlin.»

¹⁴Gava Avram ket Misrê, Misriyan dît ku jina wî pir xweşik e.

¹⁵Wextê ku karmendên Firewn jinik dîtin, pesnê wê ji Firewn re dan. Li ser vê yekê jinik birin qesrê.

¹⁶Ji bo xatirê Serayê Firewn qencî bi Avram kir. Pez, dewar, kerên nêr û mê, xulam, xadim û deve dan wî.

¹⁷Lê Xudan ji rûyê jina Avram Serayê ve êşên giran anîn serê Firewn û maliyên wî.

¹⁸Firewn gazî Avram kir û got: «Ev çi ye te anî serê min? Te çima negot: ‹Ew jina min e›?

¹⁹Çima te got: ‹Ev xwişka min e›? Min jî ew ji xwe re anî? Jina xwe bibe û here!»

²⁰Piştre Firewn ji bo Avram emir da mirovên xwe. Wan ew û jina wî bi hebûna wan ve şandin.