Read Kurmanji Încîl Destpêk 13 Bible Online

Destpêk 13 - Kurmanji Încîl bible

Destpêk 13

¹Avram bi jina xwe û bi her tiştê xwe re ji Misrê derket ku here Negevê. Lût jî pê re bû.

²Avram gelek dewlemend bû. Keriyên wî, zêr û zîvên wî hebûn.

³Ji Negevê destpê kir, ji cihekî koçî cihekî din kir, heta ku hat Bêt-Êlê. Wî di navbera Bêt-Êl û Ayê de berê jî konê xwe danîbû

⁴û cara pêşî gorîgeh lê çêkiribû. Avram li wir bi navê Xudan gazî kir.

⁵Kon, pez û dewarên Lûtê ku bi Avram re koç dikir jî hebûn.

⁶Erd têra wan nedikir ku bi hev re bijîn, çimkî hebûna wan ewqas pir bû ku nikaribûn bi hev bimînin.

⁷Di nav şivanên Avram û Lût de pevçûn çêbû. Di wê demê de Kenanî û Perîzzî jî li wir dijiyan.

⁸Avram ji Lût re got: «Bila di navbera min û te û di navbera şivanên min û şivanên te de pevçûn çênebe. Çimkî em bira ne.

⁹Ma hemû ax ne li pêş te ye? Were em ji hev veqetin. Heger tu herî aliyê çepê, ezê herim aliyê rastê. Heger tu herî aliyê rastê, ezê herim aliyê çepê.»

¹⁰Lût serê xwe bilind kir û dît ku tevahiya Deşta Ûrdunê heta Soarê avî ye, wekî Bexçeyê Xudan û welatê Misrê ye. Beriya ku Xudan Sodom û Gomorayê wêran bike, deşt wiha bû.

¹¹Lût ji bo xwe hemû Deşta Ûrdunê hilbijart û bi aliyê rojhilat ve koç kir. Herdu bi vî awayî ji hev veqetiyan.

¹²Avram li welatê Kenanê bi cih bû. Lût li bajarên deştê rûnişt û bi aliyê Sodomê ve kon vedan.

¹³Sodomî xerab, li dijî Xudan gelek gunehkar bûn.

¹⁴Piştî ku Lût ji Avram veqetiya, Xudan jê re got: «Ji cihê ku tu lê yî niha serê xwe bilind bike û li bakur û başûr, li rojhilat û rojava binêre.

¹⁵Wê axa ku tu dibînî ezê her û her bidim te û ziriyeta te.

¹⁶Ezê ziriyeta te wekî toza erdê zêde bikim. Heger yek bikaribe toza erdê bijmêre, wê bikaribe ziriyeta te jî bijmêre.

¹⁷Rabe û li seranserê welêt bigere, çimkî ezê wî bidim te.»

¹⁸Avram konên xwe hilanîn û çû Hevronê, li darberûyên Mamrê bi cih bû. Wî li wir gorîgehek ji Xudan re çêkir.