Read Kurmanji Încîl Destpêk 14 Bible Online

Destpêk 14 - Kurmanji Încîl bible

Destpêk 14

¹Di wê demê de Padîşahê Şînarê[23] Amrafel, Padîşahê Êllasarê Aryok, Padîşahê Elamê Kedorlaomer û Padîşahê Goyîmê Tîdel,

²li dijî Padîşahê Sodomê Bera, Padîşahê Gomorayê Bîrşa, Padîşahê Admayê Şînav, Padîşahê Sevoyîmê Şemêver û Padîşahê Belayê — Soarê — çûn şer.

³Ev her pênc padîşah li Deşta Siddîmê ku niha Gola Mirî ye gihîştin hev.

⁴Ev padîşah duwanzdeh salan xulamiya Kedorlaomer kiribû, lê di sala sêzdehan de li dijî wî serî hildabûn.

⁵Di sala çardehan de Kedorlaomer û padîşahên ku alîgirên wî bûn, hatin û li Eşterot-Qarnayîmê Refayiyan, li Hamê Zûzî, li Şawê-Qîryatayîmê Êmî

⁶û li herêma çiyayî ya Seîr heta El-Paranê, li keviya beriyê, Horî têk birin.

⁷Ji wê derê zivirîn Eyn-Mîşpatê — ku Qadêş e — hemû axa Amalêqiyan standin û Amoriyên ku li Hasson-Tamarê rûdiniştin, têk birin.

⁸Li ser vê yekê padîşahên Sodom, Gomora, Adma, Sevoyîm û Belayê, yanî Soarê, bi rê ketin û van her pênc padîşahan,

⁹li dijî her çar padîşahan, yanî Padîşahê Elam Kedorlaomer, Padîşahê Goyîm Tîdel, Padîşahê Şînar Amrafel û Padîşahê Êllasar Aryok, li Deşta Siddîmê kozik û çeperên xwe yên şer amade kirin.

¹⁰Deşta Siddîmê bi çalên ziftê tije bû. Gava padîşahên Sodom û Gomorayê reviyan herdu jî ketin van çalan û yên mayî ber bi çiyayan ve reviyan.

¹¹Her çar padîşahan hemû qût û malên Sodom û Gomorayê birin û çûn.

¹²Wan biraziyê Avram Lût û malê wî jî bir. Çimkî Lût li Sodomê rûdinişt.

¹³Yekî ku ji wê derê firar kiribû hat û Avramê Îbranî agahdar kir. Avram, li darberûyên Mamrêyê Amorî rûdinişt. Mamrê û birayên wî Enêr û Eşkol alîgirên Avram bûn.

¹⁴Dema ku Avram bihîst biraziyê wî dîl hatiye girtin, wî sê sed û hijdeh kesên ku li mala wî mezin bûbûn hilda, heta Danê da pey çar padîşahan.

¹⁵Avram mirovên xwe kom bi kom ji hev cuda kir, bi şev êrîşî wan kir û heta Hovaya li bakurê Şamê da pey wan.

¹⁶Avram hemû malê ku hatibû talankirin, biraziyê xwe Lût û malên wî, jin û xelk bi şûn ve anîn.

¹⁷Piştî ku Avram Kedorlaomer û padîşahên alîgirên wî têk birin, padîşahê Sodomê li Deşta Şawê — Deşta Padîşah — çû pêşiya wî.

¹⁸Padîşahê Şalêmê Melxîsedeq nan û şerab anî. Ew kahinê Xwedayê Herî Berz bû.

¹⁹Wî Avram pîroz û bereket kir û got: «Xwedayê Herî Berzê ku Erd û ezman afirandiye, Avram pîroz bike.

²⁰Xwedayê Herî Berzê ku Neyarên te dan destê te, Pîroz be.» Li ser vê yekê Avram dehyeka her tiştî da wî.

²¹Padîşahê Sodomê ji Avram re got: «Mirovan bide min, bila mal ji te re be.»

²²Lê Avram ji Padîşahê Sodomê re got: «Min bi navê Xudan, Xwedayê Herî Berz, Afirînerê erd û ezmanan sond dixwim û dibêjim:

²³ezê tiştekî te, ne ta û ne jî benikê çaroxa te qebûl bikim ku tu nebêjî: ‹Min Avram dewlemend kir.›

²⁴Tiştên ku mirovên min xwarine ne tê de, ezê tiştekî din qebûl nekim. Bila Enêr, Eşkol û Mamrê para xwe hildin.»