Read Kurmanji Încîl Destpêk 15 Bible Online

Destpêk 15 - Kurmanji Încîl bible

Destpêk 15

¹Piştî van tiştan gotina Xudan di dîtiniyekê de ji Avram re hat û got: «Netirse Avram. Ez mertalê te me, wê xelata te gelek mezin be.»

²Lê Avram got: «Ya Reb Xudan, tê çi bidî min? Va ye ez bêziret im. Kesê malê min jê re bimîne, ev Êliyezerê Şamî ye.»

³Wî berdewam kir û got: «Ji ber ku te zarok nedan min, wê xulamekî nav mala min li ser mîrasa min rûne.»

⁴Gotina Xudan dîsa jê re hat û got: «Ev mirov nabe mîrasxwarê te. Kurekî ji bedena te wê bibe mîrasxwarê te.»

⁵Xudan Avram derxist derve û got: «Li ezmanan binêre! Gelo tu dikarî stêran bijmêrî? Wê ziriyeta te jî evqas zêde be!»

⁶Avram bawerî bi Xudan anî û Xudan ev jê re wekî rastiyê hesab kir.

⁷Bi ser de Xudan jê re got: «Ez ew Xudan im ku tu ji bajarê Ûra Kildaniyan derxistî ku vî welatî bide te û tu wê derê ji xwe re bikî milk.»

⁸Avram got: «Ya Reb Xudan, ezê çawa bizanim ku ezê bibim xweyê wî?»

⁹Xudan ji Avram re got: «Ji min re nogineke sê salî, bizineke sê salî û beranekî sê salî, qumrî û kevokekê bîne.»

¹⁰Avram hemû jê re anîn û ew di nîvî de qelaştin û her nîvek danî hember yê din. Lê wî çivîk neqelaştin.

¹¹Dema ku teyrên dirinde ji jor ve hatin û li ser laşan danîn, Avram berî wan da.

¹²Piştî ku roj çû ava, Avram ket xeweke giran. Tariyeke bi tirs û bizdan bi ser wî de hat.

¹³Xudan ji Avram re got: «Baş bizanibe ku wê ziriyeta te li welatekî xerîb bijî û çar sed salan bibe kole û zilmê bibîne.

¹⁴Lê ezê wî miletê ku li wan zilmê dike ceza bikim. Piştre wê ziriyeta te bi dewlemendiyeke mezin ji wê derê derkeve.

¹⁵Tê jî bi xêr û xweşî bigihîje bav û kalên xwe. Tê emrekî dirêj bijî û paşê werî veşartin.

¹⁶Wê nifşê çaran ê ziriyeta te vegere vê derê. Çimkî hê gunehên Amoriyan negihîştin dawiyê.»

¹⁷Piştî ku roj çû ava û bû tarî, menqereke bi dû û xetîreyeke bi pêt xuya bû û di nav perçeyên laşan re derbas bû.

¹⁸Wê rojê Xudan bi Avram re peymanek çêkir û got: «Ezê wê axa ku ji Çemê Misrê heta Çemê Mezin — Firat — diçe

¹⁹welatê Qêniyan, Qenîzziyan, Qadmoniyan,

²⁰Hîtîtiyan, Perîzziyan, Refayiyan,

²¹Amoriyan, Kenaniyan, Gîrgaşiyan û Yevûsiyan hemûyan bidim ziriyeta te.»