Read Kurmanji Încîl Destpêk 2 Bible Online

Destpêk 2 - Kurmanji Încîl bible

Destpêk 2

¹Erd û ezman bi hemû nexşên xwe temam bûn.

²Xwedê karê dikir, di roja heftan de bir serî. Di roja heftan de Xwedê ji hemû karên xwe, bêhna xwe veda.

³Xwedê roja heftan pîroz û bereket kir. Wekî rojeke pîroz kifş kir. Çimkî Xwedê di wê rojê de ji hemû afirandinên xwe, bêhna xwe veda.

⁴Serpêhatiya afirandina erd û ezmanan ev e: Gava Xwedê Xudan erd û ezman afirandin,

⁵hê li erdê tu şitlekî çolê tunebû û tu giyayekî çolê şîn nebûbû. Çimkî Xwedê Xudan hê baran bi ser erdê ve nebarandibû û mirovê erdê bajo jî tunebû.

⁶Lê ji erdê hilm radibû û tevahiya rûyê erdê av dida.

⁷Xwedê Xudan Adem ji axa erdê çêkir û hilma jiyanê pif kir pozê wî. Bi vî awayî Adem bû canekî jîndar.

⁸Xwedê Xudan li rojhilat, li Adenê bexçeyek çand û Ademê ku şikil dabûyê danî wê derê.

⁹Xwedê Xudan ji axê cûr bi cûr darên spehî û xweşfêkî gihandin. Di nava bexçeyê de dara jiyanê û dara zanîna qencî û xerabiyê jî hebû.

¹⁰Çemek ji Adenê dertê, bexçe av dide, li wir ji hev vediqete û dibe çar mil.

¹¹Navê çemê pêşî Pîşon e. Ew ber bi tevahiya herêma Hawîlayê ve diherike ku li wir zêr heye.

¹²Zêrê vê herêmê qenc e û li vir benîştê daran û onîks jî hene.

¹³Navê çemê diduyan Gîhon e ku ber bi tevahiya welatê Kûşê[2] ve diherike.

¹⁴Navê çemê sisiyan Dîcle ye û ber bi rojhilatê Aşûrê ve diherike. Çemê çaran jî Firat e.

¹⁵Xwedê Xudan Adem hilda û li nav Bexçeyê Adenê danî ku li wê derê bixebite û hay ji bexçeyê hebe.

¹⁶Xwedê Xudan li Adem emir kir û got: «Tu dikarî ji her dara bexçe bixwî,

¹⁷lê ji dara zanîna qencî û xerabiyê nexwe. Çimkî gava tu jê bixwî, tê esse bimirî.»

¹⁸Xwedê Xudan got: «Ne baş e ku Adem tenê bimîne, ezê alîkareke li gorî wî jê re çêkim.»

¹⁹Xwedê Xudan tevahiya heywanên erdê û teyrên ezmanan ji axê çêkir. Wî hemû anîn ba Adem ku bibîne, wê çi navî li wan bike. Adem bi çi navî bangî afirîdên jîndar kir, ew bû navê wan.

²⁰Adem nav li hemû heywanên kedî, heywanên kovî û teyrên ezmanan danî. Lê ji bo Adem alîkareke li gorî wî nehate dîtin.

²¹Xwedê Xudan kir ku Adem bikeve xeweke giran. Hê di xewê bû, wî parsûyekî wî derxist û goşt xist cihê wî.

²²Xwedê Xudan ji wî parsûyê ku ji bedena Adem derxistibû, jinekê çêkir û da wî.

²³Li ser vê yekê Adem got: «Niha ev hestî ji hestiyê min, Goşt ji goştê min e. Wê ji wê re ‹Jin[3]› bê gotin, Çimkî ew ji mêr hate hildan.»

²⁴Ji ber vê yekê wê mêr dev ji dê û bavê xwe berde, xwe li jina xwe bigire û wê herdu bibin bedenek.

²⁵Adem û jina xwe, herdu jî tazî bûn û şerm nedikirin.