Read Kurmanji Încîl Destpêk 23 Bible Online

Destpêk 23 - Kurmanji Încîl bible

Destpêk 23

¹Sara emrekî dirêj kir û sed û bîst û heft sal jiya.

²Sara li Qîryat-Arbayê, yanî li Hevronê, li welatê Kenanê mir. Îbrahîm şîna wê kir û li ser giriya.

³Îbrahîm li ser şîna jina xwe rabû û ji Hîtîtiyan re got:

⁴ «Ez di nav we de mêvan û xerîb im. Milkekî bifiroşin min ku ez bikim goristan. Ezê miriya xwe lê veşêrim.»

⁵Hîtîtiyan ji Îbrahîm re gotin:

⁶«Ezbenî, tu guhê xwe bide me. Tu di nav me de mîrekî xudanxatir î. Miriyê xwe li goristana me, di cihê herî qenc de veşêre. Wê tu kes ji me nebêje em gorên xwe nadin te ku tu miriyên xwe lê veşêrî.»

⁷Îbrahîm rabû û xwe li ber xelkê welêt, li ber Hîtîtiyan tewand.

⁸Wî ji wan re got: «Heger hûn dixwazin ez miriya xwe veşêrim, guhê xwe bidin min. Herin ji kurê Efronê Sohar lava bikin.

⁹Bila Şikefta Maxpêlaya li bin zeviya xwe bifiroşe min. Bihayê wê çi be, ezê zêdetir bidim û bikim goristan.»

¹⁰Efronê Hîtîtî di nav gelê xwe de rûniştibû. Wî bi dengekî bilind gazî li hemû Hîtîtiyan kir ku li ber dergehê bajêr kom bûne, got:

¹¹«Na ezbenî! Tu guhê xwe bide min. Ez zevî û şikefta tê de jî didim te. Ez li ber çavên her kesî didim te. Bibe miriya xwe lê veşêre.»

¹²Îbrahîm careke din li pêş xelkê welêt xwe tewand.

¹³Bi dengekî bilind gazî Efron kir ku her kesî bihîst. Ji Efron re got: «Ji kerema xwe guhê xwe bide min. Ezê bihayê zeviya te bidim. Bihayê wê ji min bistîne ku ez miriya xwe lê veşêrim.»

¹⁴Efron got:

¹⁵«Tu guhê xwe bide min ezbenî. Bihayê axê çar sed şekel[38] zîv e, lê di nav min û te de ev ne mesele ye. Tu miriya xwe veşêre.»

¹⁶Îbrahîm gotina Efron li ber hemû Hîtîtiyan qebûl kir. Li gorî kêşa bazirganan çar sed şekel zîv kişand û da wî.

¹⁷Bi vî awayî zeviya Efron a li Maxpêlayê ya nêzîkî Mamrê, tevî zevî û şikeftê û bi hemû darên tê de,

¹⁸li pêş hemû Hîtîtiyên li ber dergehê bajêr, bû milkê Îbrahîm.

¹⁹Piştre Îbrahîm Saraya jina xwe li welatê Kenanê, di şikefta li zeviya Maxpêlayê ya nêzîkî Mamrê de veşart ku jê re Hevron jî tê gotin.

²⁰Zevî û şikeft, ji Hîtîtiyan wekî milkê goristanê gihîşt Îbrahîm.