Read Kurmanji Încîl Destpêk 26 Bible Online

Destpêk 26 - Kurmanji Încîl bible

Destpêk 26

¹Piştî xelaya ku di dema Îbrahîm de çêbûbû, li welêt xelayeke din rabû. Îshaq çû Gerarê ba Avîmelekê Padîşahê Filîstiyan.

²Xudan li Îshaq xuya bû û jê re got: «Neçe Misrê. Li welatê ku ez ji te re dibêjim rûne.

³Bi xerîbî li vê derê bimîne. Ezê bi te re bim û te pîroz bikim. Ezê van hemû herêman bidim te û ziriyeta te. Ezê wê sonda ku min ji bavê te Îbrahîm re xwar bînim cih.

⁴Ezê ziriyeta te bi qasî stêrên ezmanan zêde bikim û tevahiya van welatan bidim wan. Bi ziriyeta te wê hemû miletên dinyayê bên pîrozkirin.

⁵Çimkî Îbrahîm bi gotina min kir. Ew bi peywir, emir, şerîet û qanûnên min ve girêdayî ma.»

⁶Îshaq li Gerarê ma.

⁷Çaxê mirovên wê derê li ser jina wî jê pirsîn, wî got: «Ew xwişka min e.» Ew ditirsiya ku bêje: «Jina min e.» Wî ji xwe re got: «Mirovên herêmê dikarin ji ber Rebeqayê min bikujin, çimkî ew delal e.»

⁸Îshaq demeke dirêj li wê derê ma. Rojekê, gava Padîşahê Filîstiyan Avîmelek di pencereyê re li derve nêrî, dît ku Îshaq bi jina xwe Rebeqayê re dikene[48] û şa dibe.

⁹Avîmelek gazî Îshaq kir û got: «Bêguman ev jina te ye! Te çima got: ‹Ew xwişka min e›?» Îshaq got: «Min ji xwe re got ku ez dikarim ji ber wê ji canê xwe bibim.»

¹⁰Avîmelek got: «Ev çi bû ku te bi me kir? Hindik mabû ji zilaman yek bi jina te re raza û te sûc bi ser me de bianiya.»

¹¹Avîmelek li hemû xelkê xwe emir kir û got: «Her kî dest bide vî zilamî û jina wî, esse wê bê kuştin.»

¹²Îshaq li wî welatî zad çand û hema wê salê sed car zêdetir ber hilanî. Çimkî Xudan ew pîroz û bereket kir.

¹³Îshaq mezin bû û hebûna wî her diçû zêdetir dibû. Êdî ew mirovekî bi têra xwe dewlemend bû.

¹⁴Keriyên pez û dewarên wî çêbûn û ew bû xweyê gelek xulaman. Loma jî Filîstî hesûdiya wî kirin.

¹⁵Filîstiyan hemû bîrên ku bavê wî Îbrahîm di dema xwe de bi xulamên xwe kolabûn, xitimandin û bi axê dagirtin.

¹⁶Avîmelek jî ji Îshaq re got: «Ji nav me here, çimkî hêza te bi ser ya me ket.»

¹⁷Îshaq ji wê derê bar kir, li Geliyê Gerarê kon veda û li wir bi cih bû.

¹⁸Îshaq bîrên ku di dema bavê wî Îbrahîm de hatibûn kolandin ji nû ve vekirin. Çimkî Filîstiyan piştî mirina bavê wî ew tije kiribûn. Îshaq navên ku bavê wî Îbrahîm dabûn wan bîran, careke din li wan kir.

¹⁹Xulamên Îshaq di gelî de kolan û kaniyeke xweşav dîtin.

²⁰Lê şivanên Gerarê bi şivanên Îshaq re pev çûn û gotin: «Av ya me ye.» Ji ber ku ew li ber Îshaq rabûbûn, wî navê bîrê Eseq[49] danî.

²¹Xulamên Îshaq rabûn bîreke din kolan, li ser vê bîrê jî pev çûn û Îshaq navê wê Sîtna[50] danî.

²²Îshaq ji wê derê bar kir û bîreke din kola. Li ser vê tu pevçûn çênebû. Loma wî navê Rehovot[51] li vê bîrê kir û got: «Niha Xudan em derxistin firehiyê û emê li welêt zêde bibin.»

²³Îshaq ji wê derê hilkişiya Bîr-Şevayê.

²⁴Wê şevê Xudan li wî xuya bû û got: «Ez Xwedayê bavê te Îbrahîm im. Netirse, ez bi te re me. Ezê te pîroz bikim û ji bo xatirê xulamê xwe Îbrahîm ziriyeta te zêde bikim.»

²⁵Îshaq li wê derê gorîgehek çêkir û pesnê Xudan da. Wî li wir konê xwe danî û xulamên wî li wê derê bîrek kolan.

²⁶Avîmelek bi şêwirmendê xwe Ahûzzat û bi Pîxolê serfermandarê xwe re ji Gerarê hat ba Îshaq.

²⁷Îshaq ji wan re got: «Hûn çima hatin ba min? We ji min nefret kir û ez ji ba xwe qewirandim.»

²⁸Lê vegerandin û gotin: «Me bi eşkereyî dît ku Xudan bi te re ye. Loma me got: Bila di navbera me û te de sondek hebe. Ka em peymanekê bi te re çêkin.

²⁹Tu xesarê nede me, çawa ku me bi te re xerabiyê nekir û hergav qenciyê bi te kir û tu bi aştî şandî. Kifş e ku tu ji aliyê Xudan ve hatî pîrozkirin.»

³⁰Îshaq ziyafetek da wan, wan xwar û vexwar.

³¹Serê sibê zû rabûn û sond xwarin. Îshaq ew bi rê kirin û ew bi xêr û silamet çûn.

³²Hema wê rojê, xulamên Îshaq hatin li ser wê bîra ku kolabûn agahî danê û gotin: «Me av dît!»

³³Îshaq navê Şîva li bîrê danî û heta îro jî navê bajêr Bîr-Şeva ma[52].

³⁴Çaxê Esaw çil salî bû, wî keça Bîriyê Hîtîtî Yehûdît û keça Elonê Hîtîtî Basemat ji xwe re anîn.

³⁵Ev jin ji Îshaq û Rebeqayê re bûn kula dil.