Read Kurmanji Încîl Destpêk 3 Bible Online

Destpêk 3 - Kurmanji Încîl bible

Destpêk 3

¹Di nav hemû heywanên kovî yên Xwedê Xudan çêkiribûn de yê herî jîr mar bû. Marî ji jinê re got: «Ma bi rastî jî Xwedê got: ‹Divê hûn ji tu dareke bexçe nexwin›?»

²Jinê ji marî re got: «Em dikarin ji fêkiyên darên li bexçeyê bixwin.

³Lê Xwedê got: ‹Divê hûn ji fêkiyê dara li nava bexçeyê nexwin û dest nedinê yan na hûnê bimirin.›»

⁴Marî ji jinê re got: «Hûn qet namirin.

⁵Çimkî Xwedê dizane gava hûn ji wê bixwin, wê çavên we vebin û wekî Xwedê, hûnê bi qencî û xerabiyê bizanin.»

⁶Jinikê dît ku fêkiyê darê çêjdar e, baş xuya dike û zanabûnê tîne. Rabû fêkiyek jê kir û xwar. Mêrê wê li ba wê bû. Fêkî da wî û mêrik jî xwar.

⁷Li ser vê yekê çavên herduyan jî vebûn û fêm kirin ku tazî ne. Pelên hejîran bi hev ve dirûtin û xwe nixamtin.

⁸Bihîstin ku Xwedê Xudan, di hênikahiya rojê de, di nav bexçe de digere. Adem û jina xwe, ji hizûra Xwedê Xudan, xwe di nav darên bexçe de veşartin.

⁹Lê Xwedê Xudan gazî Adem kir û got: «Tu li ku derê yî?»

¹⁰Adem got: «Min li bexçe tu bihîstî û ez tirsiyam, çimkî ez tazî bûm û min xwe veşart.»

¹¹Xwedê Xudan got: «Kê ji te re got tu tazî yî? Ma te ji wê dara ku min ji te re gotibû: ‹Jê nexwe› xwar?»

¹²Adem got: «Jinika te dabû min, fêkiyek ji wê darê da min û min jî xwar.»

¹³Xwedê Xudan ji jinikê re got: «Te çi kir?!» Jinikê got: «Marî ez xapandim, loma min xwar.»

¹⁴Li ser vê yekê Xwedê Xudan ji marî re got: «Ji ber ku te ev yek kir, Wê di nava hemû heywanên kedî û kovî de, Yê herî bi nalet tu bî. Tê li ser zikê xwe bişêlî, Di hemû rojên jiyana xwe de axê bixwî.

¹⁵Ezê dijminatiyê bixim navbera te û jinê, Navbera ziriyeta te û ya wê. Wê serê te biperçiqîne, Tê jî êrîşî pehniya wî bikî[4].»

¹⁶Wî ji jinikê re got: «Gava zarokanînê ezê êşa te gelekî zêde bikim Û bi êş tê zarokê xwe bînî. Tê hewcedarê mêrê xwe bî Ewê jî serwerê te be.»

¹⁷Wî ji Adem re got: «Ji ber ku te guhdariya jina xwe kir Û ji wê dara ku min ji te re gotibû ‹Divê tu nexwî› te xwar, Ax ji rûyê te bi nalet bû. Tê di hemû rojên jiyana xwe de Bi zehmetî jê bixwî.

¹⁸Wê ax stirî û diriyan bide te. Tê giyayên çolê bixwî.

¹⁹Tê nanê xwe, bi xwêdana eniya xwe bixwî. Heta ku tu bizivirî axa tu jê hatî çêkirin. Çimkî tu ax î û tê vegerî axê.»

²⁰Adem navê jina xwe Hawa[5] danî. Çimkî ew bû dayika hemû mirovan.

²¹Xwedê Xudan ji Adem û jina wî re kincên çermîn çêkirin û li wan kirin.

²²Piştre Xwedê Xudan got: «Niha Adem bû yekî mîna me, êdî bi qencî û xerabiyê dizane. Divê niha ji bo wî destûr neyê dayîn ku destê xwe dirêjî fêkiyê dara jiyanê bike, jê bixwe û her û her bijî.»

²³Bi vî awayî Xwedê Xudan Adem ji Bexçeyê Adenê derxist ku axa jê hatibû çêkirin, bajo.

²⁴Piştî wî Adem qewirand, ji bo parastina riya dara jiyanê wî li aliyê rojhilatê Bexçeyê Adenê xerûb û şûrekî agiravêj ê bi her aliyî ve dizivire bi cih kirin.