Read Kurmanji Încîl Destpêk 30 Bible Online

Destpêk 30 - Kurmanji Încîl bible

Destpêk 30

¹Çaxê Rahêlê dît ku tu zarokan nayine, ew hesidî xwişka xwe. Wê ji Aqûb re got: «Bike ku zarokan bînim an na ezê bimirim.»

²Hêrsa Aqûb li wê rabû û got: «Ma ez dikarim cihê Xwedê bigirim ku nahêle tu zarokan bînî?»

³Wê got: «Va ye, cariya min Bîlha. Here ba wê, bila ji min re zarokekî bîne ku ez bi wê karibim malê ava bikim.»

⁴Rahêlê cariya xwe Bîlhayê bi jinîtî da wî. Aqûb çû ba wê.

⁵Ew bi zaro ma û ji Aqûb re kurekî anî.

⁶Rahêlê got: «Xwedê ez rast dîtim, lavakirina min bihîst û kurek da min.» Ji ber vê yekê wê navê kurik Dan[59] danî.

⁷Bîlhaya cariya Rahêlê dîsa bi zaro ma û kurekî din da Aqûb.

⁸Rahêlê got: «Li dijî xwişka xwe serfiraz bûm û bi ser ketim.» Wê navê kurik Neftelî[60] danî.

⁹Çaxê Lêayê dît ku nema zarokan tîne, wê cariya xwe Zîlpayê bi jinîtî da Aqûb.

¹⁰Zîlpaya cariya Lêayê ji Aqûb re kurek anî.

¹¹Lêayê got: «Oxira min geş e!» Wê navê wî Gad[61] danî.

¹²Zîlpaya cariya Lêayê kurekî din da Aqûb.

¹³Lêayê got: «Ez çiqas dilşa me! Wê jin ji min re bêjin dilşa.» Wê navê kurik Aşêr[62] danî.

¹⁴Di dema dirûna genim de Rûbên çû nav zeviyê, hinek sêvikên evînê dîtin û ew anî da diya xwe Lêayê. Rahêlê ji Lêayê re got: «Rica dikim tu hinek ji wan sêvikên evînê ku kurê te aniye bidî min.»

¹⁵Lê Lêayê got: «Te mêrê min stand, ne bes bû? Tu niha rabûyî û sêvikên evînê yên kurê min dixwazî?» Rahêlê got: «Baş e, bila ji dêla sêvikên evînê yên kurê te, ew îşev bi te re razê.»

¹⁶Wê êvarê gava Aqûb ji zeviyê hat, Lêa çû pêşiya wî û got: «Divê tu bi min re razî. Min tu bi sêvikên evînê yên kurê xwe kirê kirî.» Aqûb wê şevê bi wê re raza.

¹⁷Xwedê Lêa bihîst û ew bi zaro ma û wê kurê pêncan da Aqûb.

¹⁸Lêayê got: «Ji ber ku min cariya xwe da mêrê xwe, Xwedê xelat da min.» Wê navê kurik, Îssexar[63] danî.

¹⁹Lêa dîsa bi zaro ma û kurê şeşan da Aqûb.

²⁰Piştre Lêayê got: «Xwedê diyariyeke baş da min. Êdî wê mêrê min rûmetê bide min, çimkî min jê re şeş kur anîn.» Navê wî Zebûlon[64] danî.

²¹Piştre Lêayê keçikek anî û navê wê Dîna danî.

²²Xwedê Rahêlê bi bîr anî, wî ew bihîst û malzaroka wê vekir.

²³Rahêl bi zaro ma, kurek anî û got: «Xwedê şerma min hilanî.»

²⁴Wê navê kurik Ûsiv[65] danî û got: «Bila Xudan kurekî din bide min.»

²⁵Piştî ku Rahêlê Ûsiv anî, Aqûb ji Lavan re got: «Bihêle ez herim mala xwe û ser axa xwe.

²⁶Jin û zarokên min bide min, ez bidim rê. Ez ji bo wan ji te re xebitîm. Tu dizanî ku ez çiqas ji te re xebitîm.»

²⁷Lê Lavan jê re got: «Heger dilê te bi min xweş be, ji kerema xwe li vir bimîne. Çimkî bi rimildarî ez têgihîştim ku Xudan ji rûyê te ez pîroz kirime.

²⁸Heqê te çi ye bêje, ezê bidim.»

²⁹Aqûb jê re got: «Tu dizanî ku ez çawa ji te re xebitîme û ez çawa li keriyên te bûme xweyî.

³⁰Beriya hatina min, malê te hindik bû, niha gelek zêde bûye. Bi her tiştê ku min kir, Xudan tu pîroz kirî. Ezê kengê ji bo mala xwe bixebitim?»

³¹Lavan pirsî: «Ez çi bidim te?» Aqûb lê vegerand û got: «Tu tiştekî nede min. Lê heger tu qebûl bikî, ezê dîsa keriyên pezê te biçêrînim û li heywanên te binêrim.

³²Bihêle îro ez di nav keriyên te de bigerim, miyên bi deq û belek, hemû berxên reş û bizinên belek û bi deq veqetinîm. Bila ew bibin heqê min.

³³Çaxê ji îro û pê ve tu bêyî û li heqê ku te daye min binêrî, tê rastbûna min fêm bikî: Hemû bizinên min ên bêdeq û nebelek û hemû berxên min ên nereş, kifş e ku min ew dizîne.»

³⁴Lavan got: «Baş e, bila li gorî gotina te be.»

³⁵Wê rojê Lavan hemû nêriyên bi deq û belek, hemû bizinên bi deq û bi xet û hemû berxên reş veqetandin û kurên xwe danî ber.

³⁶Paşê bi qasî riya sê rojan ji Aqûb dûr ket. Aqûb şivantiya keriyên din ên Lavan kir.

³⁷Aqûb ji darên spîndar, behîv û çinaran şaxên teze jêkirin, ew qeşartin û belek kirin.

³⁸Çaxê fahlbûna pez, min darikên qeşartî datanî pêşiya pez, ser cirnên ku pez jê avê vedixwe.

³⁹Gava pez li ber darikên belek fahl dibû, berxên bi xet, deq û belek diziyan.

⁴⁰Aqûb berx vediqetandin û berê keriyên xwe bi aliyê pezê reş û kever yê Lavan ve dikir. Wî keriyê xwe cuda dikir û nedixist nav keriyê Lavan.

⁴¹Çaxê pezê xurtir fahl dibû, ji bo ku di nav darikên qeşartî de fahl bibin, wî darik li ber çavên wan dixistin cirnên avê.

⁴²Lê ji bo pezê qels wî darik nedidan pêş wan. Bi vî awayî yên qels ji Lavan re diçûn û yên xurt jî dibûn yên Aqûb.

⁴³Êdî Aqûb gelek dewlemend bibû. Gelek keriyên pez û dewar, xulam, xadim, deve û kerên wî çêbûn.