Read Kurmanji Încîl Destpêk 33 Bible Online

Destpêk 33 - Kurmanji Încîl bible

Destpêk 33

¹Aqûb serê xwe bilind kir û dît ku va ye Esaw bi çar sed mirovên xwe re tê. Wî zarok di nav Lêa, Rahêl û herdu cariyan de kirin du beş.

²Wî cariye û zarokên wan li pêş, Lêa û zarokên wê li pey û Rahêl û Ûsiv danî paşiyê.

³Aqûb bi xwe derbasî pêşiyê bû û çaxê ku nêzîkî birayê xwe bû, heft caran xwe tewand erdê.

⁴Lê Esaw bezî hat pêşiya wî, ew hembêz kir, xwe avêt stûyê wî û ew ramûsa. Herdu jî giriyan.

⁵Piştre Esaw serê xwe bilind kir, li jin û li zarokan nêrî û got: «Ev kesên bi te re kî ne?» Aqûb got: «Ev zarokên xulamê te ne ku kerema Xwedê ne.»

⁶Cariye bi zarokên xwe re nêzîk bûn û xwe tewandin.

⁷Piştre Lêa û zarokên xwe nêzîk bûn û xwe tewandin. Di dawiyê de Ûsiv û Rahêl nêzîk bûn û xwe tewandin.

⁸Esaw pirsî û got: «Ev koma ku ez lê rast hatim, tê çi wateyê?» Aqûb got: «Ji bo ku dilê xweyê min bi min xweş be.»

⁹Lê Esaw got: «Bi qasî ku têra min bike malê min heye. Bila malê te ji te re be.»

¹⁰Aqûb got: «Nexêr ji kerema xwe, heger dilê te bi min xweş be, tu vê diyariya min qebûl bike. Dîtina rûyê te, wekî dîtina rûyê Xwedê ye. Çimkî te ez bi serbilindî qebûl kirim.

¹¹Ji kerema xwe, vê diyariya ku min ji te re aniye qebûl bike. Çimkî Xwedê li min hat rehmê û her tiştê min heye.» Ji ber ku Aqûb pir bi ser ve çû, Esaw qebûl kir.

¹²Piştre Esaw got: «De em herin, ezê bidim pêşiya te.»

¹³Lê Aqûb jê re got: «Ezbenî, tu dizanî ku zarok hûr in û divê ez bala xwe bidim pez û dewarên şîr. Heger rojeke din jî em wan bajon, wê hemû telef bibin.

¹⁴Bila xweyê min li pêşiya xulamê xwe here. Ezê li gorî rêveçûna heywan û zarokan hêdî hêdî bêm, heta ku ez li Seîrê bigihîjim te.»

¹⁵Esaw got: «Wê çaxê bihêle ez çend kesan bi te re bihêlim.» Aqûb got: «Çima? Tenê ez dixwazim dilê xweyê min bi min xweş be.»

¹⁶Wê rojê Esaw ji bo ku vegere Seîrê da rê.

¹⁷Aqûb jî koçî Sûkkotê kir[71], li wê derê ji xwe re xanî ava kir û ji pezê xwe re gom çêkirin. Ji ber vê yekê ji wî cihî re Sûkkot tê gotin.

¹⁸Piştî ku Aqûb ji Paddan-Aramê hat, ew bi ewlehî gihîşt bajarê Şexema welatê Kenanê û li pêş bajêr kon veda.

¹⁹Wê zeviya ku kon lê veda, ji kurên Hamor, ji bavê Şexem bi sed perçe zîvî kirî.

²⁰Li wir gorîgehek ava kir û navê wê derê kir «Êl-Êlohê-Îsraîl.»[72]