Read Kurmanji Încîl Destpêk 35 Bible Online

Destpêk 35 - Kurmanji Încîl bible

Destpêk 35

¹Xwedê ji Aqûb re got: «Here hilkişe Bêt-Êlê û li wir bi cih bibe. Li wir ji Xwedê re gorîgehekê çêke. Çaxê ku tu ji ber birayê xwe Esaw reviyabûyî, Xwedê li wir li te xuya bû.»

²Aqûb ji maliyên xwe û ji hemû kesên li ba xwe re got: «Îlahên xwe yên xerîb ên ku bi we re ne bavêjin, xwe paqij bikin û cilên xwe biguherin.

³Werin em derkevin Bêt-Êlê. Ezê li wir ji wî Xwedayê ku di roja teng de bersiva min da û li her dera ku ez çûmê, ez bi tenê nehiştim re gorîgehekê çêkim.»

⁴Wan hemû îlahên xerîb ên bi xwe re û guharên xwe dan Aqûb û Aqûb ew li bin darberûya li Şexemê veşartin.

⁵Wan bar kir û tirsa Xwedê bi ser bajarên bi der û dora wan ve hat û kesî neda pey wan.

⁶Aqûb û hemû kesên pê re hatin Lûza welatê Kenanê. Navekî din ê Bêt-Êlê jî Lûz bû.

⁷Li wir wî gorîgehek çêkir û navê wê «Êl-Bêt-Êl»[73] danî. Çimkî çaxê ew ji ber birayê xwe reviyabû, Xwedê xwe li wê derê nîşanî wî dabû.

⁸Gava dadika Rebeqayê Debora mir, ew li bin darmaziya biniya Bêt-Êlê veşartin. Li ser vê yekê, navê darê Allon-Baxût[74] hat danîn.

⁹Piştî ku Aqûb ji Paddan-Aramê vegeriya, Xwedê dîsa li wî xuya bû û ew pîroz û bereket kir.

¹⁰Xwedê jê re got: «Navê te Aqûb e, lê ji niha pê ve wê ji te re nebêjin Aqûb, wê navê te Îsraîl be.» Bi vî awayî wî navê Îsraîl[75] li wî danî.

¹¹Xwedê jê re got: «Ez Xwedayê Karîndar im. Zêde û berdar bibe. Wê ji te miletek û komeke miletan çêbe û tê bibî bavkalê padîşahan.

¹²Wî welatê ku min dabû Îbrahîm û Îshaq, ezê bidim te jî û piştî te ezê wî welatî bidim ziriyeta te.»

¹³Piştre Xwedê ji ba wî, ji wê dera ku pê re peyivîbû, hilkişiya jor.

¹⁴Aqûb li dera ku Xwedê pê re peyivîbû kêlikekî kevirîn çikand. Wî pêşkêşiya rijandinê û rûnê zeytê rijand ser.

¹⁵Aqûb navê wê dera ku Xwedê pê re peyivîbû Bêt-Êl[76] danî.

¹⁶Piştre wan ji Bêt-Êlê bar kir. Hê negihîştibûn Efratê, Rahêlê zarok anî û êşeke mezin kişand.

¹⁷Dema ku Rahêlê di çaxê zarokanînê de êşeke mezin dikişand, pîrikê got: «Netirse, kurekî te yê din çêdibe.»

¹⁸Lê Rahêl li ber mirinê bû. Beriya ku bimire wê navê wî Ben-Onî[77] danî. Lê bavê wî navê kurê xwe Binyamîn[78] danî.

¹⁹Rahêl mir û li ser riya Efratê, yanî Bêtlehmê hat veşartin.

²⁰Aqûb li ser gora Rahêlê kêlikek çikand û ev kêlik heta îro jî gora Rahêlê nîşan dide.

²¹Îsraîl dîsa bar kir û konê xwe li seriya Birca Êderê danî.

²²Çaxê Îsraîl li wê herêmê dima, Rûbên çû û bi cariya bavê xwe Bîlhayê re raza. Dema Îsraîl ev bihîst, gelekî hêrs bû. Duwanzdeh kurên Aqûb hebûn.

²³Kurên ji Lêayê: Yê pêşî Rûbên, Şimûn, Lêwî, Cihûda, Îssexar û Zebûlon.

²⁴Kurên ji Rahêlê: Ûsiv û Binyamîn.

²⁵Kurên ji Bîlhaya cariya Rahêlê: Dan û Neftelî.

²⁶Kurên ji Zîlpaya cariya Lêayê: Gad û Aşêr. Kurên Aqûb ên ku li Paddan-Aramê çêbûbûn, ew bûn.

²⁷Aqûb hat Mamrê ba bavê xwe Îshaq ku nêzîkî Qîryat-Arbayê bû û Îbrahîm û Îshaq lê mabûn. Qîryat-Arba Hevron e.

²⁸Îshaq sed û heştê sal kir.

²⁹Kalbûyî û ji jiyanê têrbûyî wî ruhê xwe da, mir, çû û gihîşt pêşiyên xwe. Kurên wî Esaw û Aqûb ew veşartin.