Read Kurmanji Încîl Destpêk 38 Bible Online

Destpêk 38 - Kurmanji Încîl bible

Destpêk 38

¹Wê demê Cihûda ji birayên xwe veqetiya û çû ba zilamekî Edûllamî yê bi navê Hîra.

²Li wir Cihûda rastî keçeka Kenanî hat. Navê bavê keçikê Şûa bû. Cihûda ew ji xwe re anî û çû ba wê.

³Jinik bi zaro ma û kurek anî. Cihûda, navê kurik Êr danî.

⁴Ew careke din bi zaro ma û kurekî din anî. Navê wî Onan danî.

⁵Jinikê kurekî din anî û navê wî Şêla danî. Çaxê ku Şêla çêbû, Cihûda li Kezîvê bû.

⁶Cihûda ji bo kurê xwe yê pêşî Êr, jineke bi navê Tamar anî.

⁷Lê Êrê kurê Cihûda, di çavê Xudan de xerab bû û Xudan ruhê wî stand.

⁸Cihûda ji Onan re got: «Here ba jinbira xwe û wezîfeya xwe ya tiyîtiyê[79] bi cih bîne ku ziriyeta birayê te çêbe.»

⁹Lê Onan dizanibû zarokên ku çêbin wê nebin yên wî. Çaxê ew çû ba jinbira xwe wî avika xwe berî erdê dida ku ziriyeta birayê xwe çêneke.

¹⁰Ya ku wî kir di çavê Xudan de xerab bû. Loma Xudan ew jî kuşt.

¹¹Cihûda ji bûka xwe Tamarê re got: «Tu li mala bavê xwe bi jinebîtî bimîne, heta kurê min Şêla mezin bibe.» Cihûda di dilê xwe de digot: «Dibe ku ew jî wekî birayên xwe bimire.» Tamar jî çû, li mala bavê xwe ma.

¹²Piştî demeke dirêj jina Cihûda ya ku keça Şûa bû, mir. Çaxê ku şîna Cihûda qediya, ew bi hevalê xwe Hîrayê Edûllamî hilkişiya Tîmnayê ba hevringkarên pezên xwe.

¹³Çaxê ji Tamarê re hat gotin: «Xezûrê te diçe Tîmnayê ku miyên xwe hevring bike.»

¹⁴Wê cilên xwe yên jinebîtiyê derxistin, şalika xwe nixamt û li ber deriyê Eynayîma ser riya Tîmnayê rûnişt. Çimkî wê dît ku Şêla mezin bûye û wê bi jinîtî jê re nabin.

¹⁵Gava Cihûda ew dît, fikirî ku ew fahîşe ye. Çimkî wê serçavê xwe nixamtibû.

¹⁶Wî pê dernexist ku ew bûka wî ye. Wî riya xwe bi ser wê xist û got: «Were, ez dixwazim bi te re razim.» Tamarê got: «Ez bi te re razim, tê çi bidî min?»

¹⁷Cihûda got: «Ezê ji keriyê xwe karikek ji te re bişînim.» Tamarê got: «Ma tê çi bidî min, heta tu karikê bişînî?»

¹⁸Wî got: «Divê ez çi bi bidim te?» Tamarê got: «Mora xwe, qeytanê xwe û darê di destê xwe de bide min.» Cihûda ev dan û bi wê re raza. Tamar jê bi zaro ma.

¹⁹Piştre çû şalika xwe derxist û cilên xwe yên jinebîtiyê li xwe kirin.

²⁰Di vê navberê de Cihûda karikekî biçûk bi hevalê xwe yê Edûllamî re şand ku tiştên xwe ji jinikê bistîne lê wî jinik nedît.

²¹Wî ji mirovên der û dorê pirsî û got: «Ew jinika fahîşe ya ku li Eynayîmê li ser rê bû, li ku derê ye?» Wan lê vegerand û got: «Li vir jineke wiha tuneye.»

²²Li ser vê yekê ew vegeriya ba Cihûda û jê re got: «Min ew nedît. Kesên li wir diman jî gotin: ‹Li vir jineke wiha tuneye.›»

²³Cihûda got: «Bila ew tişt jê re bin, naxwe emê bibin pêkenînê xelkê. Min karik şand, lê te ew nedît.»

²⁴Piştî sê mehan ji Cihûda re hat gotin: «Bûka te Tamarê zina kiriye û niha bi zaro ye.» Cihûda got: «Wê derxin derve û bişewitînin!»

²⁵Çaxê ew derdixistin derve, wê xeber ji xezûrê xwe re şand û got: «Ez ji xweyê van tiştan bi zaro mame. Ka lê binêrin hûnê nas bikin ku ev mor, qeytan û dar yên kê ne?»

²⁶Cihûda ew nas kirin û got: «Ew ji min rastir e. Çimkî min ew ji kurê xwe Şêla re neanî.» Êdî ew careke din bi wê re raneza.

²⁷Di dema zarokanînê de, di zikê Tamarê de cêwî hebû.

²⁸Gava wê zarok dianî, ji cêwiyan yekî destê xwe derxist derve. Pîrikê bi destê wî girt, bi tayekî sor girê da û got: «Ev yê pêşî ye.»

²⁹Gava wî destê xwe kişand, birayê wî çêbû û pîrikê got: «Te çawa ji xwe re çavî vekir!» Li ser vê yekê navê wî Pêrês[80] danîn.

³⁰Piştre birayê wî çêbû ku destê wî bi tayê sor hatibû girêdan. Navê wî jî Zerah[81] danîn.