Read Kurmanji Încîl Destpêk 4 Bible Online

Destpêk 4 - Kurmanji Încîl bible

Destpêk 4

¹Adem çû ba jina xwe Hawa. Ew bi zaro ma û Qayîn jê re çêbû. Hawa got: «Bi alîkariya Xudan min kurek anî.»

²Wê piştre birayê wî Habîl anî dinyayê. Habîl bû şivanê pêz, Qayîn bû cotkar.

³Piştî demekê, Qayîn ji hatina dexla axê hinek anî û pêşkêşî Xudan kir.

⁴Habîl jî ji keriyê xwe yên ku nû hatine dinyayê, yên qelew anî. Xudan Habîl û pêşkêşiya wî qebûl kir.

⁵Lê Qayîn û pêşkêşiya wî red kir. Qayîn gelek hêrs bû û rûyê xwe tirş kir.

⁶Xudan ji Qayîn re got: «Tu çima hêrs bûyî û te çima rûyê xwe tirş kir?

⁷Heger tu ya rast bikî, ma ezê te qebûl nekim? Lê heger tu ya rast nekî, guneh li ber deriyê te, di kozikê de li benda te ye. Lê divê tu bi ser guneh bikevî.»

⁸Qayîn ji birayê xwe Habîl re got: «Em herin çolê.[6]» Gava ew li çolê bûn Qayîn êrîşî birayê xwe Habîl kir û ew kuşt.

⁹Xudan ji Qayîn pirsî: «Ka birayê te Habîl li ku ye?» Qayîn got: «Ez nizanim, ma ez nobedarê birayê xwe me?»

¹⁰Xudan got: «Te çi kir? Binêre! Dengê xwîna birayê te ji axê gazî min dike.

¹¹Niha tu ji aliyê axê ve bûyî naletî. Ew axa ku devê xwe vekir û xwîna birayê te ji destê te qebûl kir.

¹²Axa ku tu dajoyî, wê ji niha û pêve ber nede te. Tê li ser rûyê erdê bibî bêwar û eware.»

¹³Qayîn ji Xudan re got: «Cezayê min bi qasî ku nayê hilgirtin giran e.

¹⁴Îro tu ji vê axê berî min didî. Êdî ezê ji hizûra te dûr bikevim û li rûyê erdê bibim bêwar û eware. Kî min bibîne, wê min bikuje.»

¹⁵Li ser vê yekê Xudan jê re got: «Kî te bikuje, wê heft caran tol jê bê standin.» Piştre Xudan nîşanek bi Qayîn ve danî ku kes wî nekuje.

¹⁶Qayîn ji hizûra Xudan derket û çû li rojhilatê Bexçeyê Adenê, li herêma Nodê[7] bi cih bû.

¹⁷Qayîn çû ba jina xwe, jina wî bi zaro ma û Henox anî. Wê gavê Qayîn bajarek ava dikir. Wî navê kurê xwe Henox li bajêr kir.

¹⁸Ji Henox re Îrad çêbû. Îrad bû bavê Mehûyaêl, Mehûyaêl bû bavê Metûşaêl û Metûşaêl jî bû bavê Lamex.

¹⁹Lamex du jin ji xwe re anîn. Navê yekê Eda û navê ya din Sîlla bû.

²⁰Ji Edayê re Yaval çêbû. Ew bavkalê wan kesan bû ku di konan de rûdiniştin û xweyê keriyan bûn.

²¹Navê birayê wî Yûval bû. Ew bavkalê wan kesan bû ku li çengê û li bilûrê dixistin.

²²Ji Sîllayê re Tûval-Qayîn çêbû. Tûval-Qayîn tûnc û hesin dikutan û amûrên cûr bi cûr çêdikirin. Naema, xwişka Tûval-Qayîn bû.

²³Lamex ji jinên xwe re got: «Ya Eda û Sîlla, guhdariya min bikin! Ya jinên Lamex, guhên xwe bidin peyvên min! Ji ber ku wî ez birîndar kirim, min zilamekî kuşt, Zilamekî ciwan ê ku ez êşandim.

²⁴Heger heft caran tola Qayîn bê standin, Wê heftê û heft caran tola Lamex bê standin.»

²⁵Adem dîsa çû ba jina xwe. Wê kurek anî û navê wî Şêt[8] danî û got: «Xwedê di cihê Habîlê ku Qayîn kuşt de, kurekî din da min.»

²⁶Kurekî Şêt jî çêbû û wî navê Enoş lê kir. Gazîkirin û gazîkirina navê Xudan wê demê destpê kir.