Read Kurmanji Încîl Destpêk 40 Bible Online

Destpêk 40 - Kurmanji Încîl bible

Destpêk 40

¹Piştî demekê meyger û nanpêj Padîşahê Misrê li dijî malxweyê xwe sûc kirin.

²Firewn li herdu peywirdarên xwe hêrs bû ku ew sermeyger û sernanpêjê wî bûn.

³Wî ew li mala fermandarê parêzvanan, zîndana ku Ûsiv tê de bû, hepis kir.

⁴Fermandarê parêzvanan, Ûsiv da ber destê wan. Ew demekê di girtîgehê de man.

⁵Sermeyger û sernanpêjê Padîşahê Misrê ku di zîndanê de bûn, di şevekê de xewn dîtin. Xewnên wan ji hev cuda bûn.

⁶Serê sibê Ûsiv hat ba wan, wî ew bi keder dîtin.

⁷Wî ji karmendên Firewn ên ku li mala malxweyê wî, pê re di girtîgehê de bûn pirsî û got: «Çima îro mirûzê we tirş e?»

⁸Wan got: «Me herduyan xewn dît, lê kesê ku şîrove bike tuneye.» Ûsiv ji wan re got: «Ma şîrovekirin ne karê Xwedê ye? Kerem bikin, xewnên xwe ji min re bêjin.»

⁹Sermeyger xewna xwe ji Ûsiv re got: «Di xewna xwe de, min li pêş xwe mêwek dît.

¹⁰Sê guliyên mêwê hebûn. Bi bişkivînê re kulîlk dan û gûşiyên tirî gihîştin.

¹¹Tasa Firewn di destê min de bû, min bi tirî girt, guvaşt hûndirê tasa Firewn û tas da destê wî.»

¹²Ûsiv got: «Ev tê vê wateyê: Sê gulî sê roj in.

¹³Wê di nav sê rojan de Firewn serê te bilind bike û te bîne ser karê te yê berê. Wekî ku berê tu sermeygerê wî bûyî û te wisa dikir, tê dîsa kasa Firewn bidî destê wî.

¹⁴Lê çaxê ku qencî bi te re hat kirin, ji kerema xwe tu min bîne bîra xwe, dilsoziya xwe nîşanî min bide, giliyê min ji Firewn re bike û min ji vê zîndanê derxe.

¹⁵Çimkî ez bi zorê ji welatê Îbraniyan hatim revandin. Li vir jî, min tiştekî ku ezê pê bikevim zîndanê nekir.»

¹⁶Çaxê sernanpêj dît ku Ûsiv şîroveyeke baş kir, wî jê re got: «Min jî xewnek dît. Li ser serê min sê selik nanê spî hebû.

¹⁷Di selika herî jorîn de, her cureyê pasteyên pehtî yên ji bo Firewn hebûn, lê teyran ji selikên li ser serê min dixwarin.»

¹⁸Ûsiv got: «Ev tê vê wateyê: Sê selik sê roj in.

¹⁹Wê di nav sê rojan de Firewn serê te rake û te bi darê ve daleqîne. Wê teyr goştê te bixwin.»

²⁰Roja sisiyan rojbûyîna Firewn bû û wî ziyafetek da hemû karmendên xwe. Wî li pêş karmendên xwe serê sermeyger û sernanpêj bilind kirin.

²¹Sermeyger vegeriya ser karê xwe. Careke din wî tas da destê Firewn.

²²Lê çawa ku Ûsiv şîrove kiribû, wî sernanpêj daleqand.

²³Lê sermeyger Ûsiv neanî bîra xwe û ew ji bîr kir.