Read Kurmanji Încîl Destpêk 46 Bible Online

Destpêk 46 - Kurmanji Încîl bible

Destpêk 46

¹Îsraîl bi her tiştê xwe re bi rê ket. Gava gihîşt Bîr-Şevayê, wî qurban ji Xwedayê bavê xwe Îshaq re serjê kirin.

²Wê şevê Xwedê di xewnê de bi Îsraîl re peyivî û got: «Aqûb, Aqûb!» Aqûb got: «Belê ezbenî!»

³Xwedê got: «Ez Xwedê me, Xwedayê bavê te. Ji çûna Misrê netirse, çimkî ezê li wê derê ziriyeta te bikim miletekî mezin.

⁴Ezê bi te re werim Misrê û dîsa te vegerînim. Çaxê tu bimirî, wê Ûsiv li ber serê te be.»

⁵Aqûb ji Bîr-Şevayê derket. Kurên Îsraîl bavê xwe Aqûb, zarokên xwe û jinên xwe hildan û li erebeyên ku Firewn ji bo wan şandibûn siwar kirin.

⁶Aqûb hemû maliyên xwe, heywanên xwe û her tiştê ku li welatê Kenanê kar kiribû hildan û çû Misrê.

⁷Wî bi xwe re kurên xwe, keçên xwe, neviyên xwe, hemû ziriyeta xwe, anîn Misrê.

⁸Navê kurên Îsraîl, yanî Aqûb ên ku çûn Misrê ev in: Kurê Aqûb ê mezin Rûbên.

⁹Kurên Rûbên: Henox, Pallû, Hesron û Karmî.

¹⁰Kurên Şimûn: Yemûêl, Yamîn, Ohad, Yaxîn, Sohar û kurê jineke Kenanî Şawûl.

¹¹Kurên Lêwî: Gêrşon, Qohat û Mêrarî.

¹²Kurên Cihûda: Êr, Onan, Şêla, Pêrês û Zerah. Lê Êr û Onan li welatê Kenanê miribûn. Kurên Pêrês: Hesron û Hamûl.

¹³Kurên Îssexar: Tola, Pûwa, Yov û Şîmron.

¹⁴Kurên Zebûlon: Serêd, Elon û Yahleyêl.

¹⁵Lêa ev kur û keça xwe Dînayê li Paddan-Aramê ji Aqûb re anîbûn. Kur û keçên Aqûb li ser hev sî û sisê bûn.

¹⁶Kurên Gad: Sîfyon, Haggî, Şûnî, Esbon, Êrî, Arodî û Arêlî.

¹⁷Kurên Aşêr: Yîmna, Yîşwa, Yîşwî, Beriya û xwişka wan Serah. Kurên Beriya: Hever û Malkiyêl.

¹⁸Ev kur, ji Zîlpayê ya ku Lavan dabû keça xwe Lêayê ji Aqûb re çêbûbûn. Ev li ser hev şanzdeh kes bûn.

¹⁹Kurên Rahêla jina Aqûb: Ûsiv û Binyamîn.

²⁰Herdu kurên Ûsiv, Minaşşe û Efrayîm, li welatê Misrê ji Asenata keça Potîfera yê kahinê bajarê Onê[85] çêbûn.

²¹Kurên Binyamîn: Bela, Bexer, Aşbêl, Gêra, Naeman, Êhî, Roş, Mûppîm, Hûppîm û Ard.

²²Rahêlê ev herdu ji Aqûb re anîbûn. Hemû li ser hev çardeh kes bûn.

²³Kurê Dan: Hûşîm.

²⁴Kurên Neftelî: Yahseyêl, Gûnî, Yêser û Şîllêm.

²⁵Ev kurên Bîlhayê bûn a ku Lavan dabû keça xwe Rahêlê. Hemû li ser hev heft kur ji Aqûb re anîbûn.

²⁶Kesên ku bi ziriyeta Aqûb re çûn Misrê, jinên kurên wî ne tê de, tevahiya yên ku rast jê çêbûbûn şêst û şeş kes bûn.

²⁷Bi herdu kurên Ûsiv ên ku li Misrê çêbûbûn, hejmara Mala Aqûb a ku çûn Misrê li ser hev heftê kes bûn.

²⁸Aqûb, Cihûda li pêşiya xwe şand ba Ûsiv ku riya Goşenê nîşan bide. Gava ew gihîştin herêma Goşenê,

²⁹Ûsiv erebeya xwe amade kir û çû Goşenê pêşiya bavê xwe Îsraîl. Wî çawa bavê xwe dît, xwe avêt stûyê wî û demeke dirêj giriya.

³⁰Îsraîl ji Ûsiv re got: «Piştî ku min bi çavê xwe dît ku tu dijî, êdî ez bimirim jî ne xem e.»

³¹Ûsiv ji birayên xwe û ji malbata bavê xwe re got: «Ezê rabim hevraz bim û ji Firewn re bêjim: ‹Birayên min û malbata bavê min ên ku li welatê Kenanê rûniştibûn, hatin ba min.

³²Ew şivan in û xweyê keriyan in. Wan pezên xwe, dewarên xwe û her tiştê xwe anîne.›

³³Dema ku Firewn gazî we bike û ji we bipirse: ‹Hûn çi karî dikin?›,

³⁴bêjin: ‹Em xulamên te, ji zarokatiya xwe ve, wekî bav û kalan xweyî pez in.› Wê ji we re destûr bê dayîn ku hûn li herêma Goşenê bi cih bibin. Çimkî şivantî li ba Misriyan kirêt e.»