Read Kurmanji Încîl Destpêk 6 Bible Online

Destpêk 6 - Kurmanji Încîl bible

Destpêk 6

¹Gava mirov li ser rûyê erdê zêde bûn û keçên wan çêbûn,

²hebûnên ezmanî[10] dîtin ku keçên mirovan bedew in û bi yên ku ecibandin re zewicîn.

³Xudan got: «Wê Ruhê min her û her bi mirov re nemîne, çimkî ew xwîn û goşt e û wê jiyana wî sed û bîst sal be.»

⁴Di wan rojan de û piştre jî, dema ku hebûnên ezmanî keçên mirovan ji xwe re anîn û zarokên wan çêbûn, Nefîlî[11] li ser rûyê erdê hebûn. Ew mêrxasên dema berê û mêrên bi nav û deng bûn.

⁵Xudan dît ku xerabiya mirovan gelekî zêde ye û dilê wan herdem li ser xerabiyê ye.

⁶Xudan ji afirandina mirovan poşman bû û dilê wî êşiya.

⁷Xudan got: «Ezê mirovên ku min afirandine, tevî heywan, afirîdên bi erdê ve dişêlin û teyrên ezmanan ji ser rûyê erdê rakim. Çimkî ez poşman bûm ku min ew afirandin.»

⁸Lê dilê Xudan bi Nûh xweş bû.

⁹Serpêhatiya Nûh ev e: Nûh mirovekî rast û di nav nifşê xwe de kamil bû û bi Xwedê re diçû.

¹⁰Sê kurên Nûh hebûn: Sam, Ham û Yefet.

¹¹Di çavê Xwedê de dinya xera bûbû û bi zordariyê tije bûbû.

¹²Xwedê dît ku dinya çawa xera bûye, hemû mirovên li ser rûyê erdê ji rê derketibûn.

¹³Xwedê ji Nûh re got: «Ezê dawiya hemû mirovan bînim. Çimkî ji rûyê wan ve zordarî zêde bû. Ezê tevî wan, rûyê erdê jî tune bikim.

¹⁴Tu ji dara goferê[12] gemiyekê ji xwe re çêke û di hûndirê wê de odeyan çêke. Hûndir û derveyê wê qîr bike.

¹⁵Divê tu gemiyê bi vî awayî çêkî: Wê dirêjahiya wê sê sed[13], berfirehiya wê pêncî[14] û bilindiya wê sî gaz[15] be.

¹⁶Banê gemiyê jî çêke û bi qasî gazekî[16] kûlekekê jî lê veke. Derî têxe tenişta gemiyê û qatên jêrîn, navîn û jorîn çêke.

¹⁷Va ye, ezê li ser rûyê erdê tofanê rakim û hemû jîndarên di bin ezmanan de ku hilma jiyanê bi wan re heye tune bikim. Wê her bedena li ser rûyê erdê helak bibe.

¹⁸Lê ezê bi te re peymanekê çêkim. Tu bi kurên xwe, bi jina xwe û bi bûkên xwe re li gemiyê siwar bibe.

¹⁹Ji bo ku bi te re sax bimînin, tu ji her cureyên jîndaran cotekî, yek nêr, yek mê, bi xwe re bixe gemiyê.

²⁰Wê ji her cureyên teyran, heywan û afirîdên ku bi erdê ve dişêlin cotek bên ba te ku sax bimînin.

²¹Ji xwe û wan re her cure xurek bibe nav gemiyê û bike qût.»

²²Nûh her tiştê ku Xwedê lê emir kiribû bi cih anî.