Read Kurmanji Încîl Destpêk 7 Bible Online

Destpêk 7 - Kurmanji Încîl bible

Destpêk 7

¹Xudan ji Nûh re got: «Tu û hemû mala xwe bikevin gemiyê, çimkî di nav vî nifşî de min tu rast dîtî.

²Ji hemû heywanên ku helal in heft cot nêr û mê, ji yên heram cotek nêr û mê

³û ji her cure teyrên ezmanan heft cot nêr û mê hilde ku hebûna xwe li ser rûyê erdê berdewam bike.

⁴Çimkî piştî heft rojan, ezê çil şev û çil rojan baranê bibarînim û hemû jîndarên ku min çêkirine, ji ser rûyê erdê rakim.»

⁵Nûh her tiştê ku Xudan lê emir kiribû bi cih anî.

⁶Gava ava tofanê li ser erdê rabû, Nûh şeş sed salî bû.

⁷Nûh bi kurên xwe, bi jina xwe û bi bûkên xwe re ket gemiyê ku ji tofanê rizgar bibin.

⁸Cotên heywanên helal û heram, cotên teyran û cotên hemû afirîdên ku bi erdê ve dişêlin,

⁹cot bi cot nêr û mê hatin ba Nûh û ketin gemiyê, çawa ku Xwedê li Nûh emir kiribû.

¹⁰Piştî heft rojan tofan rabû.

¹¹Di şeş sed saliya Nûh de, di roja hivdehê meha diduyan de, hemû kaniyên kûrahiya erdê derbûn û kulekên ezmanan vebûn.

¹²Çil roj û çil şev baran bariya.

¹³Hema wê rojê Nûh bi kurên xwe Sam, Ham û Yefet, bi jina xwe û bi her sê bûkên xwe re ket gemiyê.

¹⁴Bi wan re li gorî cureyên xwe hemû heywanên kovî, hemû heywanên kedî, hemû afirîdên ku bi erdê ve dişêlin û her cureyên teyran ketin gemiyê.

¹⁵Ji hemû yên ku hilma jiyanê bi wan re hebûn, cot bi cot hatin ba Nûh û ketin gemiyê.

¹⁶Heywanên ketin gemiyê, çawa ku Xwedê li Nûh emir kiribû, ji her cureyê jîndaran nêr û mê bûn. Xudan derî lê girt.

¹⁷Tofan çil rojan berdewam kir. Av gelekî zêde bû û gemî ji erdê bilind kir.

¹⁸Her ku diçû av zêdetir dibû, gemî bi ser avê ket.

¹⁹Av ewqas bilind bû ku hemû çiyayên di bin tevahiya ezmên de nixamtin.

²⁰Av panzdeh gaz[17] bi ser çiyayan ket.

²¹Hemû jîndarên li ser rûyê erdê helak bûn; teyr, heywanên kedî, heywanên çolê, afirîdên dişêlin û hemû mirov.

²²Hemû yên ku hilma jiyanê di pozê wan de hebû, li ser rûyê erdê mirin.

²³Her jîndarên li ser rûyê erdê hatin rakirin. Ji mirovan bigire heta heywanan, heta afirîdên ku dişêlin û heta teyrên ezmanan jî ji ser rûyê erdê hatin rakirin. Tenê Nûh û yên pê re siwarê gemiyê bûbûn, rizgar bûn.

²⁴Av sed û pêncî rojan li ser erdê ma.