Read Kurmanji Încîl Samûêl II, 10 Bible Online

Samûêl II, 10 - Kurmanji Încîl bible

Samûêl II, 10

¹Piştî demekê Padîşahê Ammoniyan mir, kurê wî Hanûn li cihê wî bû padîşah.

²Dawid ji xwe re got: «Ji ber ku bavê wî qenciyê bi min kiriye, ezê jî qenciyê li Hanûnê kurê Nahaş bikim.» Li ser mirina bavê wî, ji bo sersaxiyê, peywirdar şandin Hanûnê. Dema peywirdarên Dawid gihîştin welatê Ammoniyan,

³rêberên Ammoniyan, xweyên wan ji Hanûn re gotin: «Ji bo ku Dawid van zilaman şand ba te, tu dibêjî qey, Dawid rêzdariya wî li gel bavê te heye? Dawid ji bo ku bajêr nas bike, sixûriyê bikin û hilweşînin ew zilam ji te re şandine.»

⁴Li ser vê yekê, Hanûn zilamên Dawid dan girtin. Nîvê rihên wan da qusandin. Kirasên wan heta qorikê wan jê kir û ew bi paş ve vegerandin.

⁵Gava Dawid bihîst, şand pey wan. Çimkî zilamên wî pir şerm dikirin. Padîşah got: «Heta rihê we dirêj bibe, li Erîhayê bimînin, paşê vegerin.»

⁶Gava Ammoniyan dît ku li ber çavê Dawid reş bûne, wan xeber şand Bêt-Rehov û Sovayê. Bîst hezar leşkerên peya yên Aramî, Padîşahê Maexayê û hezar leşkerên wî ji gelê Tovê jî duwanzdeh hezar zilam kirê kirin.

⁷Gava Dawid ev yek bihîst, Yoav û tevahiya mêrxasên xwe yên artêşê şandin.

⁸Ammonî rabûn li ber dergehê bajêr tevdîra şer kirin. Sova û Rehovê Aramiyan, gelê Tovê û zilamên Maexa jî, li derveyî bajêr amadehiya şer kirin.

⁹Yoavê ku li pêş û paş yekîneyên neyaran dîtin, ji leşkerên bijare ên Îsraîliyan hinekên baş hilbijartin û ew li dijî Aramiyan bi cih kirin.

¹⁰Yekîneyên mayî jî, xist bin fermandariya Avîşayê birayê xwe û ew li dijî Ammoniyan bi cih kirin.

¹¹Yoav got: «Heger Aramî zora min bibin, were aliyê min. Lê heger Ammonî zora te bibin, ezê bêm aliyê te.

¹²Wêrek bin! Ji bo xatirê bajarên gelê xwe û Xwedayê xwe, divê em wêrek bin! Bila Xudan bi ya xwe bike.»

¹³Dema Yoav û kesên pê re, ji bo li dijî Aramiyan şer bikin xwe avêtin pêşiyê, Aramî ji ber wan reviyan.

¹⁴Ammoniyên ku dîtin ew direvin, ji ber Avîşay reviyan û ketin bajêr. Li ser vê yekê Yoav bi Ammoniyan re şer nekir û vegeriya Orşelîmê.

¹⁵Aramî li ber Îsraîliyan têk çûn. Loma jî hatin ba hev.

¹⁶Hadadezer xeber şand û gazî Aramiyan kir ku li rojhilatê Firatê bûn. Aramî di bin fermandariya Şovaxê fermandarê artêşa Hadadezer de çûn Hêlamê.

¹⁷Dema Dawid bi vê yekê hesiya, artêşa Îsraîlê da hev. Çemê Ûrdunê derbas kir û gihîşt Hêlamê. Aramî li dijî Dawid ketin sefan û pê re şer kirin.

¹⁸Lê belê Aramî ji ber Îsraîliyan reviyan. Dawid ji wan heft sed şerkerên erebeyên şer û çil hezar leşkerên siwarî kuştin. Li Şovaxê fermandarê artêşa Hadadezer jî xist û ew li wir mir.

¹⁹Hemû padîşahên di bin fermandariya Hadadezer de têk çûn. Loma bi Îsraîliyan re rûniştin, serî li ber wan tewandin. Piştî vê yekê êdî Aramî nema alîkariya Ammoniyan kir.