Read Kurmanji Încîl Samûêl II, 11 Bible Online

Samûêl II, 11 - Kurmanji Încîl bible

Samûêl II, 11

¹Di biharê de padîşah diçûn şer. Dawid jî bi fermandarên xwe re, Yoav û tevahiya artêşa Îsraîlê şand şer. Dema wan Ammonî têk birin û bajarê Rabbayê dorpêç kir. Dawid li Orşelîmê ma.

²Carekê Dawid berê êvarê ji nav nivînên xwe rabû, çû ser banê qesrê li wê derê geriya. Dît ku jinek li ser bên serê xwe dişo. Jinik pir xweşik bû.

³Dawid ji bo ku fêm bike ew kî ye kesekî şand. Zilam got: «Jinik Bat-Şevaya keça Êliyam û jina Ûriyayê Hîtîtî ye.»

⁴Dawid ji bo ku jinikê bînin, qasid şandin. Jinik hat ba Dawid. Dawid bi jinikê re raza ku demek berê ji adet pak bibû. Dawiyê jinik vegeriya mala xwe.

⁵Jinikê fêm kir bi zaro maye. Ji Dawid re xeber şand û got: «Ez bi zaro me.»

⁶Li ser vê yekê, Dawid, bi Yoav re xeber şand ku Ûriyayê Hîtîtî were ba wî. Yoav Ûriya şand ba Dawid.

⁷Ûriya hat ba wî, Dawid pirsa Yoav, artêşê û rewşa şer, jê kir.

⁸Paşê ji Ûriya re got: «Here mala xwe, li kêfa xwe binêre.» Ûriya ji qesrê derket, Dawid xelatek li pey şand.

⁹Lê belê, Ûriya neçû mala xwe, li gel hemû zilamên padîşahê xwe, li ber dergehê qesrê raza.

¹⁰Dema Dawid pê hesiya ku Ûriya neçûye malê, jê pirsî: «Ev demeke dirêj e tu ne li malê yî, westiyayî çima neçûyî mala xwe?»

¹¹Ûriya bersiv da û got: «Sindoq jî, Îsraîlî û Cihûdayî jî, li çardaxê dimînin. Fermandarê min Yoav û zilamên xweyê min li çolan dimînin. Di vê rewşê de, ezê çawa karibim bikevim mala xwe ji bo ku ez bixwim vexwim û bi jina xwe re razim? Bi serê te ezê qet tiştekî wiha nekim.»

¹²Li ser vê yekê Dawid got: «Îşev jî li vir bimîne, ezê sibe te bişînim.» Ûriya wê rojê û roja din jî li Orşelîmê ma.

¹³Dawid şand pey Ûriya. Heta ku ew serxweş kir, pê da xwarin û vexwarin. Dema bû êvar Ûriya ji bo ku razê, bi zilamên xweyê xwe re çû cihê razanê. Dîsa neçû mala xwe.

¹⁴Serê sibê Dawid nameyek ji Yoav re nivîsand û bi Ûriya re şand.

¹⁵Di nameyê de nivîsand: «Ûriya di eniya herî dijwar a şer de bi cih bike û xwe ji berê bide alî ku bê kuştin.»

¹⁶Dema Yoav bajar dorpêç kir, Ûriya li cihê ku dizanibû zilamên egîd li wê derê ne bi cih kir.

¹⁷Xelkê bajêr derketin bi leşkerên Yoav re şer kirin. Ji leşkerên Dawid hin kes hatin kuştin. Ûriyayê Hîtîtî jî, di nav kuştiyan de bû.

¹⁸Yoav ji bo ku hal û meseleyên şer ji Dawid re bêje, qasidekî şand.

¹⁹Ji qasid re got: «Hal û mesela şer ji padîşah re bêje.

²⁰Heger padîşah hêrs bibe û ev pirs ji te bike: ‹Ji bo ku bi wan re şer bikin, hûn çima evqas nêzîkî bajêr bûn? Ma we nizanibû ku wê ji ser bircan tîran bavêjin we?

²¹Ma nayê bîra we ku Avîmelekê kurê Yerûbbeşet[12] çawa hat kuştin? Li Têvêsê ji ser bircê, jinikek kevirê destêr neavêt ser û ew nekuşt? Madem wisa bû hûn çima ewqas nêzîkî bircê bûn?› Wê gavê tê bêjî ‹Xulamê te Ûriyayê Hîtîtî jî mir.›»

²²Qasid rabû çû. Dema hat ba Dawid, hemû gotinên Yoav ji Dawid re gotin:

²³«Ew zilam ji me xurtir derketin. Ji bajêr derketin li çolê bi me re şer kirin. Lê me ew, ber bi dergehê bajêr ve ajotin.

²⁴Li ser vê yekê tîravêjan ji ser bircan tîr barandin. Ji zilamên padîşah hinek mirin, xulamê te Ûriyayê Hîtîtî jî mir.»

²⁵Dawid ji qasid re got: «Ji Yoav re bêje: ‹Bila ev bûyer te xemgîn neke! Ne diyar e ku wê di şer de kî bimire. Êrîşeke dijwar bibin ser bajêr û wêran bikin!› Bi van gotinan wêrekiya wî zêde bike.»

²⁶Jina Ûriya, gava bi mirina mêrê xwe hesiya, şîna wî kir.

²⁷Gava wextê şînê derbas bû, Dawid qasid şand pey wê û ew anî qesra xwe. Ew bû jina wî û kurek jê re anî. Lê ev tiştê Dawid kir bi Xudan xweş nehat.