Read Kurmanji Încîl Samûêl II, 12 Bible Online

Samûêl II, 12 - Kurmanji Încîl bible

Samûêl II, 12

¹Xudan Natan şand ba Dawid. Natan hat û jê re got: «Li bajarekî du kes hebûn. Yek ji wan dewlemend, yek ji wan jî feqîr bû.

²Gelek pez û dewarên kesê dewlemend hebûn.

³Lê kesê feqîr, ji bilî berxekê pê ve tiştekî wî tunebû. Wî ew berx ji xwe re kirîbû û xweyî dikir. Berx li ba wî, tevî zarokên wî mezin bû. Ji xwarina zilam dixwar vedixwar, di paşila wî de radiza. Wekî keçika wî bû.

⁴Paşê, rojek rêwiyek hat ba mirovê dewlemend. Zilam ji bo ku ji merivê xwe re xwarin amade bike, dil neda ku ji pêz an jî dewarên xwe yekî serjê bike, çû berxa feqîr anî û ji mêvanê xwe re serjê kir.»

⁵Dawid li mirovê dewlemend pir hêrs bû, ji Natan re got: «Bi navê Xudanê Jîndar, kesê ku wiha kiriye mirinê heq dike!

⁶Ji ber ku wiha kiriye û li ber neketiye, divê ji dêla berxê ve, çar qatê wê bide.»

⁷Li ser vê yekê Natan ji Dawid re got: «Ew mirov tu yî! Xwedayê Îsraîl Xudan dibêje: ‹Min te ji bo Îsraîlê kifş kir û ji destê Şawûl xilas kir.

⁸Min mala xweyê te da te, min jinên wî jî xist paşila te. Min Mala Îsraîl û Cihûda jî da te. Heger ev hindik bûna, minê hê jî bida te!

⁹Te çima ew tişt di çavê Xudan de xerab e kir û te peyva wî kêm dît? Te Ûriyayê Hîtîtî bi şûr kuşt, te bi şûrê Ammoniyan ruhê wî stand. Te jina wî jî ji xwe re anî.

¹⁰Loma jî wê tu caran şûr ji ser mala te kêm nebe. Çimkî te jina Ûriyayê Hîtîtî ji xwe re anî û ez bêrûmet kirim.›

¹¹«Xudan wiha berdewam kir: ‹Ezê ji ziriyeta te xerabiyê li te bikim. Ezê li ber çavên te jinên te ji te bistînim û bidim cîranê te. Wê nava rojê bikevin paşila jinên te.

¹²Belê, te ew kar bi dizî kir, lê ezê vê yekê li ber çavê hemû gelê Îsraîlê di nava rojê de bikim!›»

¹³Dawid got: «Min li ber Xudan guneh kir.» Natan jê re got: «Xudan gunehê te efû kir, tê nemirî.

¹⁴Lê tu bi vê yekê bûyî sedem ku dijminên wî Xudan kêm bibînin. Loma jî ev kurê te yê bûye, wê bimire.»

¹⁵Piştre Natan vegeriya mala xwe. Xudan li wî zarokî xist. Kir ku zarokê ji jina Ûriyayê ku ji Dawid bû nexweş bikeve.

¹⁶Dawid ji bo zarok, lavayî Xwedê kir û rojî girt. Ew çû mala xwe û şevên xwe bi raketina li erdê derbas kir.

¹⁷Rîspiyên qesrê hatin ku wî ji erdê rakin. Lê Dawid nexwest ji erdê rabe, xwarinê jî bi wan re nexwar.

¹⁸Roja heftan zarok mir. Peywirdarên Dawid tirsiyan ku xebera mirina zarok bidin Dawid. Ji ber ku digotin: «Hê zarok sax bû em pê re axivîn, lê guhdariya me nekir. Niha emê çawa jê re bêjin zarok miriye? Wê tiştekî bîne serê xwe.»

¹⁹Gava Dawid dît peywirdar di nav xwe de dikin pistepist, fêm kir ku zarok miriye. Ji wan pirsî: «Ma zarok mir?» Gotin: «Belê, mir.»

²⁰Li ser vê yekê Dawid ji erdê rabû. Xwe şûşt, bêhnên xweş li xwe kir û cilên xwe guhertin. Çû Mala Xudan û perizî wî. Paşê zivirî mala xwe û xwarin xwest û xwar.

²¹Xizmetkarên wî jê pirsîn: «Tu çima wiha tevdigerî? Dema ku zarok dijiya te rojî digirt, digiriyayî. Lê piştî ku mir tu rabûyî dest bi xwarinê dikî.»

²²Dawid wiha bersiva wan da: «Dema ku zarok dijiya min rojî digirt û digiriyam. Ji ber ku, min digot: ‹Ma kî dizane, dibe ku Xudan keremê bide, ew ji min re bibexişîne û zarok bijî.›

²³Lê zarok mir. Êdî ez çima rojiyê bigirim? Ma ez dikarim wî vegerînim? Ezê herim ba wî, lê wê neyê ba min.»

²⁴Dawid jina xwe Bat-Şevayê aş kir. Çû ba wê û pê re raza. Wê kurek anî û navê wî Silêman danî. Xudan jê hez kir.

²⁵Xudan bi riya Natan xeber şand û navê kurik Yedîdya[13] danî.

²⁶Di vê navberê de, Yoavê ku li dijî bajarê Rabbayê, bi Ammoniyan re şer dikir, taxa qesrê jî bi dest xist.

²⁷Paşê Yoav qasid şandin ba Dawid û got: «Min li dijî bajarê Rabbayê şer kir û kaniyên avên wan bi dest xistin.

²⁸Niha tu bermayiyên artêşê bide hev, bajêr dorpêç bike û bi dest bixe. Wisa bike ku ez bajêr bi dest nexim û bajar bi navê min neyê bibîranîn.»

²⁹Dawid hemû leşkerên xwe berhev kirin û çû bajarê Rabbayê, li dijî bajêr şer kir û bi dest xist.

³⁰Taca Padîşahê Ammoniyan[14] ji serê wî hilda. Taca ku bi kevirên hêja hatibû nexşkirin û giraniya wê bi qasî telantek[15] zêr bû da serê Dawid. Dawid ji bajêr gelek talan bir.

³¹Gelê ku li wê derê dijiya, ji malên wan derxist ew di karên ku bi birek, tevir û bivir dihatin kirin de, di çêkirina kelpîçan de da xebitandin. Dawid vê yekê li tevahiya bajarên Ammonê pêk anî. Paşê bi artêşa xwe re vegeriya Orşelîmê.