Read Kurmanji Încîl Samûêl II, 15 Bible Online

Samûêl II, 15 - Kurmanji Încîl bible

Samûêl II, 15

¹Avşalom ji xwe re erebeyeke şer, hesp û ji bo ku li pêş wî baz bidin pêncî mirov amade kirin.

²Serê sibê zû radibû, li kêleka riya ku diçe dergehê bajêr disekinî. Ji kesên ji bo doza xwe diçûn ba padîşah dipirsî: «Tu ji ku yî?» Ji kîjan eşîra Îsraîlê bûna digotin.

³Avşalom jê re wiha digot: «Tiştê ku tu dibêjî baş û heq e, lê belê bi navê padîşah kesekî ku li te guhdarî bike tuneye.»

⁴Piştre wî berdewam kir: «Xwezî li ser vî welatî ez bibûma desthilatdar! Kesên doz an jî meseleyên wan hebin bila bihatana ba min. Min jî mafên wan bida wan.»

⁵Gava kesek nêzîkî wî bibûya û xwe li ber wî deverû bavêta erdê, Avşalom destê xwe dirêj dikir, bi zilam digirt û ew maçî dikir.

⁶Li hemû Îsraîliyên ku ji bo doza wan binêre dihatin ba padîşah, wisa dikir. Bi vî awayî ket dilê Îsraîliyan.

⁷Piştî çar salan[17] Avşalom ji padîşah re got: «Destûr bide ez herim Hevronê û soza xwe pêk bînim ku min dabû Xudan.

⁸Ji ber ku ez li bajarê Geşûra xulamê te Aram dijiyam, min gorî pêşkêş kiribû û gotibû: ‹Heger Xudan dîsa min vegerîne Orşelîmê, ezê herim li Hevronê[18] biperizim wî.›»

⁹Padîşah got: «Bi xêr û xweşî here.» Lê gava Avşalom diçû Hevronê,

¹⁰ji eşîrên Îsraîl re bi dizî qasid şandin û wiha got: «Çawa ku we dengê boriyê bihîst, bêjin: ‹Avşalom li Hevronê bû padîşah!›»

¹¹Ji Orşelîmê du sed kesên ku gazî wan kirine, bêyî ku ji bûyeran agahdar bin, bi niyeta baş, bi Avşalom re çûn.

¹²Avşalom dema ku qurban serjê dikirin, şêwirmendê Dawid Ahîtofêlê Gîloyî jî ji bajarê Gîloyê anîbû. Bi vî awayî serhildan xurt bû. Çimkî civata dida pey Avşalom her diçû zêdetir dibû.

¹³Qasidek hat ba Dawid û got: «Îsraîlî bi dil û can baweriya xwe bi Avşalom anîn.»

¹⁴Li ser vê yekê Dawid tevahiya peywirdarên xwe yên li ba wî li Orşelîmê diman re wiha got: «De em rabin û birevin! An na emê ji destê Avşalom xilas nebin. Em bilezînin! An na, Avşalom wê bi lez li pey me bê, me tune bike. Wê bajar bide ber şûran.»

¹⁵Peywirdarên padîşah wiha got: «Xweyê me padîşah çi biryarê bide, em amade ne pêk bînin.»

¹⁶Bi vî awayî padîşah, bi tevahiya malbata xwe ya ku pê bawer bûn re da rê. Lê ji bo ku xweyîtî li qesrê bikin deh cariye li wir hiştin.

¹⁷Padîşah û kesên li ba wî li ber avahiya herî dawî ya li bajêr sekinîn.

¹⁸Kerêtî û Peletiyên ku parêzvanên Dawid bûn, di ber padîşah re derbas bûn. Şeş sed leşkerên Gatî ku ji Gatê dabûn pey wî jî, di ber padîşah re derbas bûn.

¹⁹Padîşah ji Îttayê Gatî pirsî û got: «Tu çima bi me re têyî? Vegere û bi padîşahê nû re bimîne. Çimkî tu yekî xerîb î ku ji welatê xwe hatiye nefîkirin.

²⁰Tu hê nû hatî. Ez bixwe nizanim ezê îro bi ku ve herim, ezê çawa te bi xwe re bigerînim? Bi birayên xwe re vegere. Bila dilsozî û dilovaniya Xwedê li ser te be!»

²¹Lê Îttay wiha got: «Xweyê min padîşah, bi navê Xudanê Jîndar û bi serê xweyê xwe padîşah sond dixwim, sax an mirî, tu li ku bî ez xulamê te jî, ezê li wir bim.»

²²Dawid got: «De baş e, derbas be!» Li ser vê yekê Îttayê Gatî, bi hemû zilamên ba xwe û zarokên wan re derbas bûn.

²³Dema ku gel derbas dibû tevahiya gelê li herêmê bi dengekî bilind digiriyan. Padîşah Newala Qîdronê derbas kir. Gel jî ber bi çolê ve meşiya.

²⁴Sadoqê Kahin û Lêwiyiyên ku Sindoqa Peymana Xwedê digerandin jî li wir bûn. Sindoqa Xwedê danîn erdê. Heta ku hemû gel ji bajêr derkeve Aviyatar qurban pêşkêş kirin.

²⁵Piştre padîşah ji Sadoq re got: «Sindoqa Xwedê vegerîne bajêr. Heger dilê Xudan bi min xweş be, wê min vegerîne û sindoqa di cihê xwe de nîşanî min bide.

²⁶Lê ku bêje: ‹Ez ji te ne dilxweş im›, va ye ez li vir im, dilê wî çawa dixwaze, bila wisa bi min bike.»

²⁷Padîşah bi Sadoqê Kahin re gotina xwe wiha berdewam kir: «Ma tu ne zana yî?[19] Kurê xwe[20] Ahîmaes û Yonatanê Aviyatar hilde û pê re bi xêr û silametî vegere bajêr.

²⁸Heta ku min ji we agahiyek baş wergirt, ezê li çolê li bihora kêleka çêm bisekinim.»

²⁹Sadoq û Aviyatar Sindoqa Xwedê birin Orşelîmê û li wir bicih bûn.

³⁰Dawid bi girîn hildikişiya Çiyayê Zeytûnê. Serê wî nixamtî bû û pêxwas diçû, her kesê pê re jî sernixamtî bû û ew jî digiriyan.

³¹Di wê navberê de yekî ji Dawid re got: «Ahîtofêl di nav fesadên alîgirên Avşalom de ye.» Li ser vê yekê Dawid wiha dua kir: «Ya Xudan şêwra Ahîtofêl vala derxe.»

³²Dawid dema gihîşte ser girê perizînê ku gel ji bo perizînê diçû wir, Huşayê Arkî, ser û guhê wî di nav toz û telazê de, bi cilên xwe yê qetiyayî, ew pêşwazî kir.

³³Dawid jê re got: «Heger tu bi min re werî, tê bibî bar ji min re»,

³⁴«Lê ku tu vegerî bajêr û ji Avşalom re bêjî: ‹Ya padîşah, ezê bibim xulamê te! Berê min çawa ji bavê te re xulamî kiribe, niha jî ezê ji te re xulamiyê bikim›, bi vî awayî tê ji bo min şêwra Ahîtofêl vala derxî.

³⁵Sadoqê Kahin û Aviyatarê Kahin wê li wir tevli te bin. Te li qesra padîşah çi bihîstibe, ji wan re bêje.

³⁶Kurên wan Ahîmaesê kurê Sadoq û Yonatanê kurê Aviyatar jî li wir in. Her tiştê we bihîstin, bi riya wan ji min re bişînin.»

³⁷Bi vî awayî dostê Dawid Huşay çû Orşelîmê. Di wê demê de Avşalom jî gihîşte bajêr.