Read Kurmanji Încîl Samûêl II, 16 Bible Online

Samûêl II, 16 - Kurmanji Încîl bible

Samûêl II, 16

¹Dema ku Dawid hinek serê gir derbas kir, Sîvayê xulamê Mefîboşêt pêşwaziya wî kir. Sîva li ser pişta du keran bi barê du sed nanî, sed weşî mewîj, sed heb fêkiyên teze û meşkek şerab hat.

²Padîşah ji Sîva pirsî: «Te ev ji bo çi anîn?» Sîva got: «Ker ji bo malbata padîşah lê siwar bin, nan û fêkiyên teze jî ji bo xwarina xulaman, şerab jî ji bo dema kesên ku westiyan vexwin!»

³Padîşah pirsî: «Neviyê xweyê te Şawûl li ku ye?» Sîva got: «Li Orşelîmê dimîne. Ew difikirî ku Mala Îsraîl wê îro padîşahiya bapîrê min paş ve bide min.»

⁴Padîşah got: «Her tiştê Mefîboşêt yê te ye.» Sîva got: «Ez li ber te xwe ditewînim, xweyê min padîşah! Bila dilê te hergav bi min xweş be.»

⁵Dema Dawidê Padîşah gihîşte Bahûrîmê, yekî bi navê Şîmiyê kurê Gêra ku ji Mala Şawûl bû hat. Wî naletê dibarand.

⁶Hemû leşker û parêzvan bi Dawid re bûn. Şîmî dîsa jî kevir davêtin wan.

⁷Wî nalet dibarand û digot: «Ji vir here lo zilamê destbixwîn, belqitiyo!»

⁸Te li ser xwîna Mala Şawûl, padîşahî stand. Loma jî Xudan tu ceza kirî. Xudan padîşahî da kurê te Avşalom. Ji ber ku tu destbixwîn î, ev têkçûn hat serê te.

⁹Kurê Serûyayê Avîşay ji padîşah re got: «Ev kûçikê mirî, çima wê ji xweyê min padîşah re nifiran bike? Bihêle ez herim serê wî jê bikim.»

¹⁰Lê padîşah got: «Ev ne karê we ye, kurên Serûyayê! Madem Xudan jê re gotiye: ‹Ji Dawid re nifiran bike›, kî dikare jê re bêje: ‹Tu çima wisa dikî?›»

¹¹Piştre Dawid ji Avîşay û leşkerên wî re got: «Kurê min bixwe dixwaze min bikuje, loma li tiştê ku ev Binyamînî dike, şaş nemînin! Dev jê berdin hema bila nifiran bike! Çimkî Xudan wisa xwestiye û ew jî dike.

¹²Dibe ku Xudan tengasiya min bibîne û nifirên li min hatine kirin ji min re bike qencî.»

¹³Dawid û zilamên wî riya xwe berdewam kirin. Şîmiyê ku li dijî Dawid, li qûntara çiyê dimeşiya dema ku diçû nifir lê dikirin. Wî kevir diavêtê, ax û xwelî lê direşand.

¹⁴Padîşah û gelê li ba wî qels û bêqewet gihîştin cihê ku dixwestin herinê, li wir bêhna xwe vedan.

¹⁵Avşalom û gelê Îsraîlê ketibûn Orşelîmê, Ahîtofêl jî bi Avşalom re bû.

¹⁶Dostê Dawid Huşayê ji Arkê, dema ku gihîşt ba Avşalom, wiha qîriya: «Bijî padîşah! Bijî padîşah!»

¹⁷Avşalom ji Huşay pirs kir: «Girêdayîna te bi hevalê te re ev e? Tu çima bi hevalê xwe re neçûyî?»

¹⁸Huşay got: «Ezê alîgirê wî kesî bim ku ji aliyê Xudan û tevahiya gelên Îsraîlê ve hatiye hilbijartin. Ezê li ba wî bimînim.

¹⁹Ma ezê ji bilî Avşalomê kurê Dawid, xizmeta kê bikim? Min çawa ji bavê te re xizmet kiribe, ezê ji te re jî wisa xizmetê bikim.»

²⁰Avşalom ji Ahîtofêl re got: «Divê em çi bikin? Şîretekê li me bike.»

²¹Ahîtofêl wiha got: «Bi wan cariyeyan re razê ku bavê te ji bo xweyîtiyê li qesrê bikin hiştibû. Bi vî awayî, wê tevahiya Îsraîlê bibihîze ku te nefreta bavê xwe qezenc kiriye û kesên ku piştgiriya te dikin, wê tev xwe bêtir bihêz bibînin.»

²²Li ser banê qesrê ji Avşalom re konek çêkirin. Avşalom li ber çavê hemû Îsraîliyan bi cariyên bavê xwe re raza.

²³Di wan rojan de şîretên ku Ahîtofêl dikirin, wekî şîretên zilamekî wiha bûn ku peyvên Xwedê belav dikirin. Dawid jî, Avşalom jî, şîretên wî wisa qebûl dikirin.