Read Kurmanji Încîl Samûêl II, 21 Bible Online

Samûêl II, 21 - Kurmanji Încîl bible

Samûêl II, 21

¹Di serdema Dawid de, sê salan li ser hev xela hebû. Dawid ji Xudan pirsî. Xudan got: «Şawûl û malbata wî bûn sebebê vê xwînê, Şawûl Gîvonî dan kuştin.»

²Padîşah gazî Gîvoniyan kir û bi wan re peyivî. — Gîvonî ne ji ziriyeta Îsraîliyan bûn. Ew bermayiyê Amoriyan bûn. Îsraîlî sond xwaribûn ku dest nedin wan. Lê Şawûlê ku ji bo gelê Îsraîl û Cihûdayê sax bihêle kedeke mezin dabû, dixwest ku wan tune bike. —

³Dawid ji Gîvoniyan pirsî: «Ji bo we ez dikarim çi bikim? Ji bo ku hûn gelê Xudan pîroz bikin, ezê çawa sûc bidim bexişandin?»

⁴Gîvoniyan bersiva wî dan: «Em ji malbata Şawûl ne zêr ne jî zîv dixwazin, em naxwazin Îsraîliyekî bikujin.» Dawid got: «Hûn çi dixwazin ezê bikim.»

⁵Wan ji padîşah re got: «Heft kurên wî mirovî bidin me ku qira me anî. Wî fen û fût li me kir ku em li ser axa Îsraîlê nemînin.

⁶Emê wan bikujin û li bajarê Gîvaya Şawûlê kifşkiriyê Xudan, li hizûra Xudan daleqînin.» Padîşah got: «Ezê wan bidim we.»

⁷Lê padîşah, bi kurê Şawûl Yonatan re, ji bo sonda ku li ber Xudan xwaribû, Mefîboşêtê kurê Yonatan parast.

⁸Di şûna wî de, du kurên Rispa keça Ayayê, yên bi navê Armonî û Mefîboşêt ku ji Şawûl anîbû dinyayê û pênc kurên ku ji Edriyêlê kurê Barzîllayê Meholayiyê ku ji keça Şawûl Mêravê anîbû dinyayê hilda.

⁹Dawid wan da destê Gîvoniyan. Gîvoniyan ew li çiya, li hizûra Xudan daleqandin. Her heft jî hema wî çaxî, di cih de mirin. Ew di rojên destpêka dirûtina ceh de hatin kuştin.

¹⁰Rispaya keça Aya, çûx hilda û ji bo xwe li ser zinarekî raxist. Di rojên dirûtina pêşîn heta ku baran bi ser miriyan de bariya, Rispa li wir ma. Cendekan nava rojê ji teyrên ezmanan, bi şev jî ji heywanên çolê parastin.

¹¹Cariya Şawûl, kirinên keça Rispaya keça Aya ji Dawid re got.

¹²Dawid çû hestiyên Şawûl û yên kurê wî Yonatan ji xelkê Yavêş-Gîladê standin. Roja ku Filîstiyan li çiyayê Gilboayê Şawûl kuşt, cendekê wî û cendekê kurê wî, li qada Bêtşeanê daleqandibûn. Xelkê Yavêş-Gîladê jî cendek bi dizîka ji wir anîbûn.

¹³Dawid hestiyên Şawûl û kurê wî Yonatan ji wir anîn. Hestiyên heft kesên ku hatibûn darvekirin jî berhev kirin.

¹⁴Hestiyên Şawûl û Yonatanê kurê wî, di gora Qîşê bavê Şawûl de veşartin ku li Sêlaya herêma Binyamînê bû. Hemû fermanên padîşah bi cih anîn. Piştî vê yekê Xwedê bersiv da lavakirinên li ser welêt.

¹⁵Di navbera Îsraîlî û Filîstiyan de ji nû ve şer derket. Dawid û zilamên wî çûn li dijî Filîstiyan şer kirin. Di wê navberê de Dawid ji hal ket.

¹⁶Yişbî-Benovê Filîstî yê ji kurên Refayiyan xweyê rimeke tûncîn bû ku giraniya serê wî nêzîkî sê sed şekelî[23] bû. Wî şûrekî nû girê dabû û dixwest Dawid bikuje.

¹⁷Lê Avîşayê kurê Serûyayê xwe gihande hewara Dawid. Êrîş kir û ew kuşt. Ji wir û pêde zilamên Dawid sond xwarin û jê re gotin: «Ji bo ku qendîla Îsraîlê netefe, tu carekî din bi me re neyê şer.»

¹⁸Piştî demekê bi Filîstiyan re li Govê careke din şer derket. Di wî şerî de, Sîbbexayê Huşayî yekî bi navê Saf kuşt ku Refayî bû.

¹⁹Di navbera Îsraîlî û Filîstiyan de li Govê dîsa şer derket. Êlhananê kurê Yarê-Oregîmê Bêtlehmî Golyatê Gatî kuşt. Destiyê rimê Golyat, wek darê tevnê bû.

²⁰Li Gatê careke din şer derket. Li wir zilamekî wekî hûtan hebû. Dest û lingên wî şeştilî bûn. Bi giştî bîst û çar tiliyên wî hebûn. Ew jî ji ziriyeta Refa bû.

²¹Zilam dema ku gef li Îsraîliyan xwar, Yonatanê kurê Şîmayê birayê Dawid, ew kuşt.

²²Her çar ji wan jî ji ziriyeta Refa, ji Gatê bûn. Ew ji aliyê Dawid û zilamên wî ve hatin kuştin.