Read Kurmanji Încîl Samûêl II, 23 Bible Online

Samûêl II, 23 - Kurmanji Încîl bible

Samûêl II, 23

¹Gotinên Dawid ên dawîn ev in: Dawidê kurê Yêşa Zilamê ku Xwedayê Aqûb ew bilind kiriye, Yê ku Xwedê ew kifş kiriye Stranbêjê Îsraîlî ku tê hezkirin, wiha dibêje:

²Ruhê Xudan bi riya min dibêje, Gotina wî li ser zarê min e.

³Xwedayê Îsraîl peyivî, Zinarê Îsraîl ji min re got: «Bila serwerê mirovan li ser rastiyê be, Bila bi tirsa Xwedê serweriyê bike.

⁴Ew wekî rojeke bê ewr, Wekî şewqa serê sibê tê dîtin. Bi biriqîna wî, piştî baranê di axê de giya şîn dike.»

⁵Mala min jî bi Xwedê re ma, ne wisa ye? Bi min re peymaneke heta hetayê çêkir, Peymaneke bi her awayî tekûz û ewle. Ew herdem esse min rizgar dike, Daxwazên min bi cih tîne.

⁶Kesên xerab jî, Wekî striyên ku bi destan nayên girtin, Wê bi tevahî bên avêtin.

⁷Kesê ku dest bide striyan, Bi amûreke hesin, An jî bi destiyê rim bikeve, Wê ew strî li cihê xwe, bi giştî bên şewitandin.

⁸Navên leşkerên Dawid ên herî leheng ev in: Yoşêv-Başşevetê Tahkemonî ku wekî Edînoyê Esniyî jî tê nasîn û rêberê sê kesan bû. Wî di êrîşekê de heşt sed kes kuştin.

⁹Yê duyê, Êlazarê kurê Dodoyê Ahohî, yek ji sê kesên li ba Dawid ku li dijî Filîstiyên li Pas-Dammîmê[25] kom bûbûn re serî hildabû. Di wê navberê de Îsraîlî paş ve vekişiyabûn.

¹⁰Lê Êlazar rabû, heta ku destê wî westiya û bi şûr ve zeliqî Filîstî kuştin. Wê rojê Xudan serfiraziyeke mezin pêk anî. Îsraîlî ji bo ku tenê kuştiyan bişelînin hatin ba Êlazar.

¹¹Yê sisiyan, Şammayê kurê Agêyê Hararî bû. Dema ku Filîstî li Lahayê li kêleka zeviya nîskan kom bûbûn, leşkerên Îsraîlî ji ber wan reviyabûn.

¹²Lê Şamma di nava zeviyê de sekinîbû û wir parastibû, Filîstî kuştibûn. Xudan serfiraziyeke mezin pêk anîbû.

¹³Dema çinînê, ji sî leşkerên leheng sisê li ba Dawid, derbasî Şikefta Edûllamê bûbûn. Komeke Filîstiyan li Deşta Refayîmê artêşgeh danîbû.

¹⁴Di wê navê de Dawid li sitargehê, hêza duyê yê Filîstî jî li Bêtlehmê bûn.

¹⁵Dawid bi hêvî got: «Xwezî yekî ji bîra li ber dergehê Bêtlehmê av ji min re bianiya.»

¹⁶Ev her sê, ji nava artêşgeha Filîstiyan derbas bûn û ji bîra li ber dergehê Bêtlehmê av kişandin û ji Dawid re anîn. Lê Dawid nexwest vexwe. Wî av rijand û pêşkêşî Xudan kir

¹⁷û got: «Ya Xudan kirina vê bila ji min dûr be. Ma ez xwîna van her sê kesên ku canê xwe avêtine xeterê û ji min re av anîne vexwim?» Ji ber vê yekê nexwest avê vexwe. Mêrxasiya van her sê leşkerên leheng, bi wî awayî bû.

¹⁸Avîşayê birayê Yoav kurê Serûyayê rêberê sê mêrxasên din bû. Rima xwe bilind kir û sê sed kes kuştin. Ji ber vê bi qasî her sê kesan nav da.

¹⁹Ew pêşengê her sê kesan bû û di nav wan de kesê herî navdar bû. Lê yek ji sê leşkerên herî leheng nehat hesibandin.

²⁰Benayayê Qavseyêliyê kurê Yehoyada şervanekî wêrek bû. Karên mezin pêk anî. Du Moaviyên dilşêr[26] kuştin. Herwiha di rojeke berfê de daket çalekê û li wir şêrekî kuşt.

²¹Yekî gir ê Misrî jî kuştibû. Di destê kesê Misrî de rim hebû. Benaya bi darekî meşiya ser wî. Çawa rim ji destê wî ragirt, ew bi rima wî kuşt.

²²Tiştê ku Benayayê kurê Yehoyada kiribûn ev bûn. Bi vê riyê, ew jî bi qasî hersê lehengan navdar bû.

²³Benaya her çiqas di nav sih kesan de yê herî navdar jî bû, lê ew ji sisiyan nehat hesibandin. Dawid ew kir fermandarê parêzvanên xwe.

²⁴Kesên din ku di nav sî leşkerên leheng de dihatin hesibandin ev in: Esahêlê birayê Yoav, Êlhananê kurê Dodoyê ji Bêtlehmê,

²⁵Şammayê Harodî, Êlîqayê Harodî,

²⁶Helesê Peletî, Îrayê kurê Îqqêşê Teqoayî,

²⁷Aviyezerê Enatotî, Mevunnayê Huşayî,

²⁸Salmonê Ahohî, Mahrayê Netofayî,

²⁹Hêlevê kurê Baenayê Netofayî, Îttayê kurê Rîvayê ji Gîvaya Binyamîniyan,

³⁰Benayayê Pîretonî, Hiddayê ji geliyên Gaeşê,

³¹Avî-Elbonê Ervayî, Ezmawetê ji Barhûmê,

³²Êlyahbayê Şaelbonî, Yaşênê Gûnî, Yonatan,

³³Şammayê ji Hararê, Ahiyamê kurê Şararê ji Hararê,

³⁴Êlîfeletê kurê Ahasbayê Maexayî, Êliyamê kurê Ahîtofêlê Gîloyî,

³⁵Hesrayê Karmelî, Paerayê ji Aravê,

³⁶Yîgalê kurê Natanê Sovayî, Baniyê Gadî,

³⁷Seleqê Ammonî, Nahrayê Bîrotiyê çekdarê Yoavê kurê Serûyayê,

³⁸Îrayê Yattîrî, Garêvê Yattîrî

³⁹û Ûriyayê Hîtîtî. Tev sî û heft kes bûn.