Read Kurmanji Încîl Samûêl II, 4 Bible Online

Samûêl II, 4 - Kurmanji Încîl bible

Samûêl II, 4

¹Îş-Boşêtê[4] kurê Şawûl li Hevronê bû û bi kuştina Avnêr tirsiya. Tevahiya gelê Îsraîlê jî di nav tirsekê de bû.

²Du serekrêbirên Îş-Boşêt hebûn. Ew kurên Rîmmonê Bîrotî bûn. Ji eşîra Binyamînî bûn. Navê yekî Baena, yê din Rêxav bû. Bîrot ji eşîra Binyamîn dihat hesibandin.

³Bîrotî reviyabûn Gittayîmê. Heta îro jî bi xerîbî li wê derê dimînin.

⁴Kurekî bi navê Mefîboşêtê[5] Yonatanê kurê Şawûl hebû, herdu lingên wî jî kulek bûn. Dema xebera mirina Şawûl û Yonatan ji Yîzreyêlê gihîşt, Mefîboşêt pênc salî bû. Dadika wî ew hilgirtibû û revandibû. Lê mixabin, ji ber ku xwestibû bi lez bireve zarok ketibû û kulek bibû.

⁵Rêxav û Baenayê kurên Rîmmonê Bîrotî, bi rê ketin. Dema di germa nîvro de gihîştin mala Îş-Boşêt, Îş-Boşêt pal dabû û bêhna xwe dida.

⁶Çawa ku genim bistînin ketin nav malê. Wê demê Îş-Boşêt li oda razanê li ser cihê xwe, dirêjkirî bû.

⁷Zilaman lê xist û ew kuştin. Serê wî jê kirin û bi xwe re birin. Rêxav û Baenayê birayê wî reviyan û tevahiya şevê di riya Eravayê de meşiyan.

⁸Serê Îş-Boşêt anîn Hevronê ba Dawidê Padîşah û gotin: «Va ye serê Îş-Boşêtê kurê Şawûlê neyarê te ku dixwest te bikuje! Xudan îro heyfa xweyê min padîşah ji Şawûl û ji ziriyeta wî stand.»

⁹Lê Dawid ji kurên Bîrotê Rîmmonî, Rêxav û birayê wî Baena re got: «Ez bi navê Xudanê Jîndar ku canê min ji hemû tengasiyan rizgar kiriye,

¹⁰dibêjim min zilamê ku mirina Şawûl ji min re aniye ku jê kirî xebereke baş aniye, zeft kir û li Zîqlagê kuşt. Xelata ku min ji bo wê xeberê dabûyê ev bû!

¹¹Xilasiya mirina kesên xerab ku yekî rast li mala wî, di nav nivînên wî de kuştiye tuneye! Niha ezê we ji rûyê erdê winda nekim û heyfa wî ji we nestînim?»

¹²Paşê emir li zilamên xwe kir û herdu bira li wir hatin kuştin. Dest û piyên wan jêkirin û cendekê wan li kêleka hewza Hevronê daleqandin. Serê Îş-Boşêt jî birin û li Hevronê di gora Avnêr de veşartin.