Read Kurmanji Încîl Samûêl II, 5 Bible Online

Samûêl II, 5 - Kurmanji Încîl bible

Samûêl II, 5

¹Hemû eşîrên Îsraîl yên li Hevronê hatin ba Dawid û jê re gotin: «Em xwîn û goştê te ne.

²Dema ku berê Şawûl padîşahê me bû, di şer de fermandarê Îsraîlê tu bûyî. Xudan ji te re got: ‹Gelê min ê Îsraîlê tê birêve bibî, tê li ser wan bibî serwer.›»

³Hemû rîspiyên Îsraîlî hatin Hevronê ba Dawidê Padîşah. Padîşah li Hevronê li ber Xudan bi wan re peymanek çêkir. Wan jî Dawid wek Padîşahê Îsraîlê kifş kirin.

⁴Dawid di sî saliya xwe de bû padîşah û çil salan padîşahî kir.

⁵Li Hevronê heft sal û şeş mehan ji Cihûdayê re, li Orşelîmê jî sî û sê salan ji hemû Îsraîl û Cihûdayê re padîşahî kir.

⁶Padîşah tevî zilamên xwe ji bo ku êrîşî Yevûsiyan bike ku ew li Orşelîmê dijiyan, bi rê ketin. Yevûsiyan ji Dawid re got: «Tê nekevî vê derê! Kor û kulek jî dikarin zora te bibin.» Wiha difikirîn: «Dawid nikare bikeve vir.»

⁷Lê Dawid Keleha Siyonê bi dest xist. Paşê navê wê bû Bajarê Dawid.

⁸Dawid wê rojê wiha got: «Her kî ku Yevûsiyan têk bibe, bila ew di coya avê re êrîşî ‹Kor û kulekan› bike ku Dawid ji wan nefretê dike.» Sedema ku dibêjin «Kor û kulek nikarin bikevin qesrê» ev e.

⁹Dawid li keleha «Bajarê Dawid» rûnişt ku wî ev nav lê kiribû. Dawid ji Mîlloyê destpê kir, derdorê ber bi hêla hûndir ve ava kir.

¹⁰Her ku diçû hêza Dawid mezintir dibû. Xwedayê Karîndar Xudan pê re bû.

¹¹Hîramê Padîşahê Sûrê ji Dawid re qasid, darên sedrê, necar û hosteyên keviran şandin ku ji bo Dawid qesrek çêkir.

¹²Bi vî awayî Dawid fêm kir ku Xudan wî li ser Îsraîlê kiriye padîşah. Çimkî ji bo xatirê gelê wî Îsraîlê, padîşahiya wî mezin kir.

¹³Piştî ku Dawid ji Hevronê vegeriya, li Orşelîmê dîsa ji bo xwe cariye û jin anîn. Dawid dîsa bû bavê kur û keçan.

¹⁴Navê zarokên Dawid yên ku li Orşelîmê çêbûn ev in: Şammûa, Şovav, Natan, Silêman,

¹⁵Yîvhar, Êlîşûa, Nefeg, Yafiya,

¹⁶Êlîşama, Êlyada û Êlîfelet.

¹⁷Dema ku Filîstî bihîstin Dawid li ser Îsraîlê wek padîşah hatiye kifşkirin, hemû artêşa Filîstî ji bo li Dawid bigerin ketin rê. Dawidê ku bi vê yekê hesiya, çû kelehê.

¹⁸Filîstî hatibûn û li Deşta Refayîmê belav bûbûn.

¹⁹Dawid ji Xudan pirs kir û got: «Ez êrîşî Filîstiyan bikim, tê wan radestî min bikî?» Xudan jê re got: «Bike, bêguman ezê wan radestî te bikim.»

²⁰Li ser vê yekê Dawid çû Baal-Perasîmê û li wê derê Filîstiyan têk bir. Paşê got: «Çawa av her tiştî diqelişîne û derbas dibe, Xudan dijminên min ji pêşiya min qelaştin û derbas bû.» Ji ber vê yekê, navê wir danîn Baal-Perasîm[6].

²¹Filîstiyan pûtên xwe li wir hiştin. Dawid û zilamên wî jî wan birin û çûn.

²²Filîstî careke din hatin û li Deşta Refayîmê belav bûn.

²³Dawid ji Xudan pirsî. Xudan jê re got: «Ji vî aliyê ve êrîş neke! Wan ji paş ve dorpêç bike û li ber darên belesanê êrîşî wan bike.

²⁴Gava te ji jora darên belesanê dengê meşê bihîst, bilezîne. Wateya vê ev e, ez li pêş te çûme ku artêşa Filîstiyan têk bibim.»

²⁵Dawid li gorî emrê Xudan kir û ji Gevayê heta Gezerê, Filîstî têk birin.