Read Kurmanji Încîl Samûêl II, 6 Bible Online

Samûêl II, 6 - Kurmanji Încîl bible

Samûêl II, 6

¹Dawid hemû zilamên bijare yên li Îsraîlê civandin. Hejmara wan sî hezar kes bû.

²Dawid û artêşa wî rabûn çûn Baalaya Cihûdayê[7] ku Sindoqa Xwedayê ku bi navê Xudanê Karîndar tê zanîn û di navbera xerûbên ser Sindoqê de text çêkiriye bînin.

³Sindoqa Xwedê, ji mala Avînadavê li ser gir hildan û danîn ser erebeyeke nû. Herdu kurên Avînadav, Ûzza û Ahyo erebeya nû ya ku Sindoqa Xwedê li ser bû, diajotin. Ahyo li pêşiya Sindoqê dimeşiya.

⁵Dawid û tevahiya Mala Îsraîl li ber Xudan, bi hemû hêza xwe li çeng, tembûr, def, zîl û zengilan dixistin.

⁶Dema ku gihîştin ser Bêndera Naxon ga terpilîn. Ûzza destê xwe dirêj kir Sindoqa Xwedê girt.

⁷Hêrsa Xudan li Ûzzayê ku bi bêrûmetî tevgeriya re rabû û wî li erdê xist. Ew li wir, li kêleka Sindoqa Xwedê mir.

⁸Dawid hêrs bû ku Xudan li Ûzza xist. Ji wê rojê û pê ve ji vir re Pêrês-Ûzza[8] tê gotin.

⁹Dawid wê rojê ji Xudan tirsiya û got: «Çawa dibe ku Sindoqa Xudan tê ba min?»

¹⁰Êdî nexwest ku Sindoqa Xudan bi xwe re bibe Bajarê Dawid. Ji dêla wê ew bir mala Ovêd-Edomê Gatî.

¹¹Sindoqa Xudan li mala Ovêd-Edomê Gatî sê mehan ma. Xudan Ovêd-Edom û hemû malbata wî pîroz kir.

¹²Ji Dawidê Padîşah re wiha gotin: «Xudan ji ber Sindoqa Xwedê Ovêd-Edom, hemû malbata wî û her tiştê wî pîroz kir.» Bi vî awayî Dawid çû û Sindoqa Xwedê ji mala Ovêd-Edom bi kêfxweşî anî Bajarê Dawid.

¹³Yên ku Sindoqa Xudan hildigirtin piştî ku şeş gav avêtin, Dawid conegayek û golikekî dermale qurban kirin.

¹⁴Dawidê ku kirasê kahintiyê[9] yê kitan li xwe kiribû, li hizûra Xudan bi hemû hêza xwe direqisî.

¹⁵Dawid û tevahiya Mala Îsraîl, bi qîrînên kêfê û dengê boriyê, Sindoqa Xudan dianî.

¹⁶Dema ku Sindoqa Xudan gihîşt Bajarê Dawid, Mîkala keça Şawûl di pencereyê re nêrî. Dema ku dît Dawidê Padîşah li hizûra Xudan direqise û lotikan davêje, Mîkalê di dilê xwe de ew biçûk dît.

¹⁷Sindoqa Xudan anî û li cihê ku Dawid ji bo wê, di hûndirê konê de çêkiriye danî. Dawid qurbanên aştî û şewitandinê pêşkêşî Xudan kirin.

¹⁸Piştî ku Dawid qurbanên aştî û şewitandinê pêşkêş kirin, bi navê Xudanê Karîndar gel pîroz kir.

¹⁹Li wir li tevahiya jin û mêran, li hemû civaka Îsraîlê her kesî naneke somin û nanikên xurme û tirî belav kirin. Paşê hemû vegeriyan malên xwe.

²⁰Dema ku Dawid ji bo pîrozkirina malbata xwe vegeriya malê, Mîkala keça Şawûl derket derve ku pêşwaziya wî bike. Ji Dawid re got: «Padîşahê Îsraîlê, îro çi navekî xweş bi pey xwe xist! Mîna kesekî bêqîmet, te xwe li ber xulam û cariyên xwe tazî kir.»

²¹Dawid got: «Ez li ber Xudan reqisîm. Çimkî wî ez li cihê bavê te û hemû ziriyeta wî hilbijartim û wek serwer li ser gelê xwe Îsraîlê şandim! Helbet ezê li ber Xudan bireqisim!

²²Bi ser de ezê xwe ji vê û zêdetir jî biçûk bixim, ezê di çavê xwe de nizim bim. Lê ew cariyên ku tu behsa wan dikî, wê min rûmetdar bikin.»

²³Mîkala keça Şawûl heta roja mirinê jî zarok neanîn.