Read Kurmanji Încîl Samûêl II, 8 Bible Online

Samûêl II, 8 - Kurmanji Încîl bible

Samûêl II, 8

¹Piştî demekê Dawid Filîstiyan têk bir û ew kirin bin nîrê xwe û Meteg-Ammayê ji destên Filîstiyan derxist.

²Wî Moaviyan jî têk bir. Wan bi awayekî dirêjkirî rêz kirin û bi benikê pîva. Herdu rêzên ku pîva kuşt, rêzek hemû sax hişt. Moavî bûn xulam û bacdarên Dawid.

³Dawid, Hadadezerê kurê Padîşahê Sovayê Rehovî têk bir. Wî dixwest careke din padîşahiya xwe li Çemê Firatê ava bike.

⁴Dawid hezar û heft sed siwarî û bîst hezar peyayên wî girtin. Sed hespên ji bo erebeyên şer ne tê de, wî hemû hesp seqet kirin.

⁵Aramiyên Şamê ji bo ku piştgiriya Hadadezerê Padîşahê Sovayê bikin hatin. Dawid ji Aramiyan bîst û du hezar kes kuştin.

⁶Paşê li welatê Aramiyên Şamê, leşkerên xwe bi cih kirin. Ew jî bûn xulam û bacdarên wî. Dawid bi ku ve çû Xudan ew bi ser xist.

⁷Dawid mertalên zêr ên di destên serleşkerên Hadadezer de hildan û ew birin Orşelîmê.

⁸Herwiha ji Betah û Bêrotayê gelek tûnc talan kir ku ev herdu bajar di bin destê Hadadezer de bûn.

⁹Toiyê Padîşahê Hamatê bihîst ku Dawid hemû artêşa Hadadezerê belav kiriye.

¹⁰Toî, ji bo ku silavê bide Dawidê Padîşah û serketina wî ya li dijî Hadadezer pîroz bike, kurê xwe Yoram şand ba wî. Çimkî Toî herdem li dijî Hadadezer şer kiribû. Di destê Yoram de diyariyên ji zêr, zîv û tûnc hebû.

¹¹Dawidê Padîşah zêr û zîvên ji miletên ku têk biribûn, pêşkêşî Xudan kir.

¹²Wî zora Aramiyan, Moaviyan, Ammoniyan, Filîstiyan û Amalêqiyan biribû û ew ji wan standibûn. Bi ser de jî wî talanê Hadadezerê kurê Rehovê Padîşahê Sovayê jî biribû. Wî hemûyan pêşkêşî Xudan kir.

¹³Nav û dengê Dawid bilind bû. Gava vegeriya li Geliyê Xwê hijdeh hezar Edomî kuştin[10].

¹⁴Li her derên Edomê leşkerên xwe bi cih kirin. Edomî bûn xulamên Dawid. Xudan li her derî Dawid serfiraz kir.

¹⁵Dawid li seranserê Îsraîlê padîşahî kir. Wî rastî û edaletê da gelê xwe.

¹⁶Yoavê kurê Serûyayê, serleşkerê artêşê bû. Yehoşafatê kurê Ahîlûd dîroknivîsê dewletê bû.

¹⁷Sadoqê kurê Ahîtûv û Ahîmelekê kurê Aviyatar kahin bûn. Seraya nivîsende bû.

¹⁸Benayayê kurê Yehoyada serbazê parêzvanên Dawid, Kerêtî û Peletiyan bû. Kurên Dawid jî kahin bûn.